ބައިނަލްއަގުވާމީ ކަނޑުގެ ސަރަހައްދުން ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް ދަތުރުކުރަމުންދިޔަ ގްލޯބަލް ޞުމޫދު ފްލޮޓިއްލާ އަށް ހުރަސްއަޅައި، އިޒްރޭލުގެ ސިފައިން މިއަދު ހަމަލާދީފައެވެ. އެ ފްލޮޓިލާއިން ވަގުތުން ދައްކަމުންދިޔަ ލައިވް ބްރޯޑްކާސްޓްތަކުން ފެންނަ ގޮތުގައި، އިޒްރޭލުގެ ނޭވީ ސިފައިން ވަނީ އެއް ބޯއްޓަށްފަހު އަނެއް ބޯއްޓަށް އަރާފައެވެ.
އިޒްރޭލުގެ ދުވަހު ނޫހެއް ކަމަށްވާ ”ޔެދިއޮތު އަހްރޮނޮތު“ އިން ރިޕޯޓްކޮށްފައިވާ ގޮތުގައި، އިޒްރޭލު ސިފައިން ވަނީ އެ އުޅަނދުތަކުގައި ތިބި އެކްޓިވިސްޓުން ހައްޔަރުކޮށްފައެވެ. އަދި އިޒްރޭލުން ވެރިވެގަނެފައިވާ ފަލަޞްޠީނުގެ ބަނދަރަށް އެމީހުން ގެންދިއުމުގެ ކުރިން، ”ފްލޯޓިން ޕްރިޒަން“ ގެ ގޮތުގައި ސިފަކޮށްފައިވާ ނޭވީ މަނަވަރަކަށް އެމީހުން ބަދަލުކުރަމުންދާ ކަމަށްވެސް ރިޕޯޓްކޮށްފައިވެއެވެ.
މިކަން ހިނގަމުންދިޔަ ވަގުތު ގްލޯބަލް ޞުމޫދު ފްލޮޓިއްލާ އިން ނެރުނު ބަޔާނެއްގައި ބުނެފައިވަނީ އަސްކަރީ އުޅަނދުތައް އެމީހުންގެ ގާފިލާއާ ކައިރިވަމުންދާ ކަމަށެވެ.
”އަހަރެމެން ޣައްޒާ އާއި ދިމާލަށް ދަތުރު ކުރިއަށް ގެންދާއިރު މިތިބީ ހައި އެލާޓުގައި. ބިރުދައްކައިގެން އަހަރެމެން ފަހަތަކަށް ނުޖެއްސޭނެ،“ އެ ބަޔާނުގައި ބުނެފައިވެއެވެ.
ޔަހޫދީން ކުރަމުންދާ ޣައްޒާގެ ޙިޞާރު ފޫއަޅުވައިލަން އައު ފްލޮޓިއްލާއެއް ތުރުކީން ފުރައިފި
54 ބޯޓުގެ މައްޗަށް އެކުލެވޭ މި ފްލޮޓިލާ ދަތުރު ފެށީ ބުރާސްފަތި ދުވަހު ތުރުކީގެ މެޑިޓަރޭނިއަން ސަރަހައްދެއް ކަމަށްވާ މާމަރިސް އިންނެވެ. މިއީ އިޒްރޭލުމް ޣައްޒާ ބަންދުކޮށްފައި އޮތް އޮތުން މުގުރާލުމަށް ކުރި އާ މަސައްކަތެކެވެ.
