ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި، ސްްރީލަންކާގެ ނުފޫޒުގަދަ ބުދު ދީނުގެ އިސް ހާމުދުރެއް ހައްޔަރުކޮށްފިއެވެ. އުމުރުން 71 އަހަރުގެ ޕަލްލެގަމަ ހެމަރަތަނަ ހައްޔަރުކޮށްފައިވަނީ ހޮނިހިރު ދުވަހު، ވެރިރަށް ކޮލަމްބޯގެ ޕްރައިވެޓް ހޮސްޕިޓަލެއްގައި ފަރުވާ ހޯދަމުން ދަނިކޮށެވެ. އޭނާ ހޮސްޕިޓަލުގައި އެޑްމިޓްވީ އޭނާގެ މައްޗަށް ޖިނާއީ ތަހުގީގެއް ހިންގަމުން ދަނިކޮށެވެ.
ހެމަރަތަނަގެ މައްޗަށް ތުހުމަތު ކުރެވެނީ 2022 ވަނަ އަހަރު، އޭނާ އިސްކޮށް ހުންނަ އަނޫރާދަޕޫރާގެ ފައްޅިއެއްގެ ތެރޭގައި 11 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމަށެވެ. ކަމާބެހޭ ފަރާތްތަކުން ބުނިގޮތުގައި، މި އަމަލު ހިންގުމުގައި އެހީތެރިވެދިން ކަމުގެ ތުހުމަތުގައި އެ ކުއްޖާގެ މަންމަވެސް މިހާރު ވަނީ ހައްޔަރުކޮށްފައެވެ.
ސްްރީލަންކާގެ ’ޑެއިލީ ނިއުސް‘ އިން ރިޕޯޓްކޮށްފައިވާ ގޮތުގައި، ޤައުމުން ބޭރަށް ދިއުން މަނާކޮށްފައިވާ ހެމަރަތަނަ ހައްޔަރުކުރީ، އޭނާ ހައްޔަރުކުރުން ލަސްވަމުންދާތީ ކުޑަކުދިން ރައްކާތެރިކުރުމާ ބެހޭ އިދާރާތަކުން ޝަކުވާ ހުށަހެޅުމާ ގުޅިގެން، އަނޫރާދަޕޫރާގެ ޗީފް މެޖިސްޓްރޭޓް ނެރުނު އަމުރެއްގެ ދަށުންނެވެ. ކޯޓުން ވަނީ ހެމަރަތަނަ ހައްޔަރުކޮށް ”ލަސްނުކޮށް“ ކޯޓަށް ހާޒިރުކުރުމަށް ފުލުހުންނަށް އަމުރުކޮށްފައެވެ.
ބުދިސްޓު ހާމުދުރުންތަކެއް ލަންކާއަށް މަސްތުވާތަކެތި އެތެރެކުރަން އުޅެނިކޮށް ހައްޔަރުކޮށްފި
