މިއީ ސޯޝަލް މީޑިއާއިން ކުޑަކުދިންގެ ނަފްސާނީ ދުޅަހެޔޮކަމަށް ކުރާ ނޭދެވޭ އަސަރުތަކާ ގުޅިގެން ހުށަހެޅިފައިވާ ގިނަ ދައުވާތަކުގެ ތެރެއިން، އެމެރިކާގެ ސްޓޭޓަކާއެކު ޓިކްޓޮކުން ގާއިމުކުރި މިފަދަ ފުރަތަމަ އެއްބަސްވުމެވެ.

މި އެއްބަސްވުމުގެ ދަށުން އެލަބާމާގައި ޓިކްޓޮކް ބޭނުންކުރާ ކުޑަކުދިންނަށް ދުވާލަކު އެޕް ބޭނުންކުރެވޭނެ އެންމެ ގިނަ ވަގުތަކީ ދެ ގަޑިއިރު ކަމަށް ކަނޑައެޅުމާއި، ކޮންމެ 15 މިނެޓަކުން އެޕް ބޭނުންކުރުން މެދުކަނޑާލަންޖެހޭ ގޮތްެ ހެދުމުގެ އިތުރުން، އުމުރު ކަށަވަރުކުރުމުގެ ވަސީލަތްތައް ވަރުގަދަކުރަން ޖެހެއެވެ. މީގެ އިތުރުން، ޓިކްޓޮކުން އެލަބާމާއަށް މަދުވެގެން 100 މިލިއަން އެމެރިކާ ޑޮލަރު ދައްކަންޖެހޭނެއެވެ. އަދި އެމެރިކާގެ މުޅިއެކު 40 ސްޓޭޓެއްގެ އެޓާނީ ޖެނެރަލުން ކަނޑައެޅިފައިވާ މުއްދަތެއްގެ ތެރޭގައި މިފަދަ އެއްބަސްވުންތަކުގައި ސޮއިކޮށްފިނަމަ، އެލަބާމާއަށް ލިބޭ ފައިސާގެ އަދަދު 300 މިލިއަން ޑޮލަރަށް އިތުރުވެގެންދާނެއެވެ.

މި އެއްބަސްވުމާ ގުޅިގެން ޓިކްޓޮކްގެ އެމެރިކާގެ ތަރުޖަމާނަކު ބުނީ، މިއީ ކުޑަކުދިން ރައްކާތެރިކުރުމަށްޓަކައި އެ ކުންފުނިން ގެންގުޅޭ ވަސީލަތްތައް އިތުރަށް ވަރުގަދަކުރުމަށް ވެފައިވާ ވަޢުދާ އެއްގޮތަށް ނިންމި ނިންމުމެއް ކަމަށެވެ. އަދި ވޭތުވެދިޔަ އަހަރު ޓިކްޓޮކާ ދެކޮޅަށް މައްސަލަ ހުށަހެޅުއްވި އެލަބާމާގެ އެޓާނީ ޖެނެރަލް ސްޓީވް މާޝަލް ވިދާޅުވީ މިއީ އެލަބާމާގެ ބެލެނިވެރިންނަށް ލިބުނު ވަރަށް ބޮޑު ކާމިޔާބީއެއް ކަމަށެވެ.

މި ޝަރީއަތަކީ ޓިކްޓޮކްގެ އެތެރޭގެ ހިންގުންތަކާ ބެހޭ މަޢުލޫމާތު އާންމުންނަށް އެނގިގެންދާނެ މަދުން ނޫނީ ނުފެންނަ ފުރުޞަތަކަށް ވާނެ ކަމަށް ބެލެވުނު ޝަރީއަތެކެވެ. ސަބަބަކީ ޓިކްޓޮކުން ކުރިންވެސް މިފަދަ ކޯޓު މައްސަލަތައް ޝަރީއަތަށް ދިއުމުގެ ކުރިން ސުލްހަކޮށް، އެ ކުންފުނީގެ އެތެރޭގެ މަޢުލޫމާތުތައް ސިއްރުގެ ގޮތުގައި ބެހެއްޓުމަށް މަސައްކަތްކޮށްފައިވާތީއެވެ.

އެލަބާމާގެ ދައުވާގައި ބުނެފައިވަނީ، ޓިކްޓޮކްގައި ހުއްޓުމެއްނެތި ދައްކާ ވީޑިއޯތަކުގެ ސަބަބުން މިއީ އެންމެ ބޮޑަށް ދެވިހިފާ މީޑިއާ ޕްލެޓްފޯމަށް ވެފައިވާ ކަމަށާއި، އެޕްގެ އަލްގޮރިޒަމުން ކުޑަކުދިންނަށް އަނިޔާވެރިކަމާއި އަމިއްލައަށް ގެއްލުންދިނުމާ ގުޅޭ ނުރައްކާތެރި ވީޑިއޯތައް ދައްކައި، ކުޑަކުދިންގެ ނަފްސާނީ މައްސަލަތައް އިތުރުކުރުވާ ކަމަށެވެ. މީގެ ސަބަބުން އެލަބާމާގެ އެމަރޖެންސީ ރޫމްތަކަށް އަމިއްލައަށް ގެއްލުންދީގެން ގެންދެވޭ ކުދިންގެ އަދަދު އިންތިހާއަށް އިތުރުވެފައިވާ ކަމަށްވެސް ދައުވާގައިވެއެވެ.

އޭގެ އިތުރުން، ގޫގުލް، އެޕަލް އަދި މައިކްރޯސޮފްޓްގެ އެޕް ސްޓޯރުތަކުގައި ޓިކްޓޮކަކީ ކުޑަކުދިންނަށް ރައްކާތެރި އެޕެއްގެ ގޮތުގައި ރޭޓްކުރުމަށްޓަކައި، ޖިންސީ އަދި އަނިޔާވެރި މާއްދާތައް ކުޑަކުދިންނަށް ނުފެންނާނެހެން ހުރަސްއެޅޭ ކަމަށް ބުނެ ޓިކްޓޮކުން ދޮގު މަޢުލޫމާތު ދީފައިވާ ކަމަށާއި، އެމެރިކާގެ ބޭނުންކުރާފަރާތްތަކުގެ މަޢުލޫމާތު ޗައިނާ ސަރުކާރަށް ފޯރުކޮށްދިނުމާ ގުޅޭގޮތުން އޮޅުވާލާފައިވާ ކަމަށްވެސް އެލަބާމާއިން ތުހުމަތުކުރެއެވެ.

އެލަބާމާގެ ދައުވާގައިވާ ގޮތުން، ޓިކްޓޮކުން އުމުރު އޮޅުންބަލަނީ ބޭނުންކުރާ ފަރާތުން ބުނާ އުމުރަކަށް ބަލައިގެން ކަމަށްވީ ނަމަވެސް، އެކައުންޓެއް ނުހަދައިވެސް ވީޑިއޯ ބެލޭ ގޮތްެ ހެދުމުން އުމުރުގެ ހުރަސްތަކުން ރެކެވޭ ގޮތްވެއެވެ. އަދި އެކައުންޓެއް ނެތަސް ބަލާ ވީޑިއޯތަކުގެ މަޢުލޫމާތު ކުންފުނިން އެއްކުރެއެވެ. މީގެ ސަބަބުން ކުޑަކުދިންނަށް ޚާއްޞަކޮށްފައިވާ ”ކިޑްސް މޯޑް“ ގެ ބޭނުން ކެނޑިގެންދާ ކަމަށާއި، ”ފިލްޓާ ބަބުލް“ ތަކުގެ ތެރޭގައި ކުދިން ބަންދުވެ، އިތުރަށް ނުރައްކާތެރި އަދި އަނިޔާވެރި މާއްދާތަކަށް ހުށަހެޅޭ ކަމަށް ދައުވާގައިވެއެވެ.

މި ތުހުމަތުތަކަށް ރައްދުދެމުން ޓިކްޓޮކުން ބުނެފައިވަނީ، އެ ކުންފުނީގެ ޕްލެޓްފޯމް ފަރުމާކޮށްފައިވަނީ ކުޑަކުދިންގެ ރައްކާތެރިކަމަށް އިސްކަންދީގެން ކަމަށް ބުނެފައެވެ. އަދި އެމެރިކާގެ ފެޑެރަލް ކޮމިއުނިކޭޝަންސް ޑީސެންސީ އެކްޓްގެ ސެކްޝަން 230 ގެ ދަށުން، އޮންލައިން ޕްލެޓްފޯމްތަކުގައި ބޭނުންކުރާ ފަރާތްތަކުން އުފައްދާ މާއްދާތަކުގެ މަސްއޫލިއްޔަތުން އެ ކުންފުނިތައް އިސްތިސްނާވާ ކަމަށް ޓިކްޓޮކުން ވަނީ ވަކާލާތުކޮށްފައެވެ.

ޓިކްޓޮކުގެ އިތުރުން މެޓާ ޕްލެޓްފޯމްސް، ސުނެޕް އިންކް އަދި އަލްފަބެޓްގެ ޔޫޓިއުބާ ދެކޮޅަށްވެސް ކުޑަކުދިންގެ ނަފްސާނީ ދުޅަހެޔޮކަމަށް އަސަރުކުރާ ކަމަށް ބުނެ އެތައް ހާސް އަމިއްލަ ފަރުދުންނާއި، ސްކޫލް ޑިސްޓްރިކްޓްތަކާއި މުނިސިޕަލިޓީތަކުން ވަނީ މައްސަލަ ހުށަހަޅާފައެވެ. އަދި އެމެރިކާގެ މަދުވެގެން 27 ސްޓޭޓަކުންނާއި ވޮޝިންގްޓަން ޑީސީއިން ވަނީ ޓިކްޓޮކާ ދެކޮޅަށް މިފަދަ ދައުވާތައް ކޮށްފައެވެ. ޓިކްޓޮކުން ވަނީ މީގެ ކުރިން ޝަރީއަތަށް ތައްޔާރުވި ފަސް ކުއްޖެއްގެ މައްސަލައާއި ކެންޓަކީގެ ސްކޫލް ޑިސްޓްރިކްޓަކުން ހުށަހެޅި މައްސަލަވެސް ކޯޓުން ބޭރުގައި ސުލްހަކޮށްފައެވެ.

ވޭތުވެދިޔަ މަހު މެޓާ ކުންފުނިން ވަނީ ކުށް ގަބޫލުނުކޮށް، އެމެރިކާގެ 47 ސްޓޭޓަކާއި ވޮޝިންގްޓަން ޑީސީއާއެކު 17.1 ބިލިއަން ޑޮލަރުގެ ބޮޑު ސުލްހައިގެ އެއްބަސްވުމެއް ގާއިމުކޮށްފައެވެ. އިންސްޓަގްރާމާއި ފޭސްބުކްގައި ކުޑަކުދިންގެ އުސޫލުތަކަށް ބަދަލުގަންނަން މެޓާއިން އެއްބަސްވި އިރު، އެ ފައިސާގެ ތެރެއިން 5 ބިލިއަން ޑޮލަރު ދެއްކުން ޝަރުތުކޮށްފައިވަނީ ޓިކްޓޮކާއި، ސުނެޕް އަދި ޔޫޓިއުބުންވެސް އެފަދަ ބަދަލުތަކެއް ގެނައުމާ ގުޅުވައިގެންނެވެ. އެކަމަކު މިކަމާ ގުޅިގެން ޓިކްޓޮކުން އާންމުކޮށް އެއްވެސް އެއްޗެއް ބުނެފައެއް ނުވެއެވެ.

މެޓާގެ އެއްބަސްވުމެކޭ އެއްގޮތަށް، އެލަބާމާއާއެކު ޓިކްޓޮކުން ހެދި އެއްބަސްވުމުގައިވާ ގޮތުން، ވާދަވެރި ސުނެޕް، ގޫގުލް އަދި މެޓާއިން ބަދަލުތައް ގެނެސްފިނަމަ، ޓިކްޓޮކުން އިތުރު ފިޔަވަޅުތައް އަޅަންޖެހޭނެއެވެ. އޭގެ ތެރޭގައި ރޭގަނޑު ގަޑިތަކުގައި އެޕް ބޭނުންކުރުން މަނާކުރުމާއި، ސޯޝަލް މީޑިއާގައި ހޭދަކުރާ ވަގުތު އިތުރަށް ކުޑަކުރުން ހިމެނެއެވެ. ނަމަވެސް، ވަކިވަކި ސްޓޭޓްތަކަށް ޚާއްޞަކޮށްގެން މިފަދަ ބޮޑެތި ބަދަލުތައް އެޕްތަކަށް ގެނައުމަކީ އަމަލީގޮތުން ކުރަން ދަތުރުކަމެއްކަން ފާހަގަކުރެވެއެވެ.

ދައުލަތުގެ މީޑިއާ ޕީއެސްއެމްއިން ގެނެސްދޭ ”ނޭޝަން ޗެޓް“ ޕްރޮގްރާމުގައި ވާހަކަފުޅުދައްކަވަމުން ރައީސު މުޢިއްޒު ވިދާޅުވީ، ވެރިކަމާ ހަވާލުވެވަޑައިގެންނެވިއިރު އިގުތިސާދީ ގޮތުން ބޮޑެތި ގޮންޖެހުންތަކަކާ ކުރިމަތިލާން ޖެހުނު ކަމުގައި ވިޔަސް، ސަރުކާރުގެ އެންމެ ބޮޑު އަމާޒަކަށްވީ ގައުމު ބަނގުރޫޓުވިޔަނުދީ ސަލާމަތްކުރުމާއެކު، ރައްޔިތުންނަށް ބޭނުންވާ ޒަރޫރީ މުދަލާއި ހިދުމަތްތައް މެދުކެނޑުމެއްނެތި ފޯރުކޮށްދިނުން ކަމަށެވެ.

ސަރުކާރުން އެޅި ހަރުދަނާ އިގުތިސާދީ ފިޔަވަޅުތަކުގެ ނަތީޖާއެއްގެ ގޮތުން، މިދިޔަ ފެބުރުވަރީ މަހު ރާއްޖޭގެ ތާރީހުގައި ފުރަތަމަ ފަހަރަށް ދައުލަތުގެ ރިޒާވް 1.2 ބިލިއަން ޑޮލަރަށް އުފުލުނުކަން އެމަނިކުފާނު ފާހަގަކުރެއްވިއެވެ. އަދި މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލި، އިގުތިސާދީ ގޮތުން އިތުރު ގޮންޖެހުންތަކެއް ކުރިމަތިވި ނަމަވެސް، 500 މިލިއަން ޑޮލަރުގެ ސުކޫކް ހިމެނޭހެން ދައުލަތުން އަދާކުރަންޖެހޭ ބޮޑެތި ދަރަނިތައް ކާމިޔާބުކަމާއެކު ދައްކައި ހަލާސްކޮށްފައިވާ ކަމަށްވެސް ވިދާޅުވިއެވެ.

ރައީސް މުޢިއްޒު ވިދާޅުވީ، ސަރުކާރުގެ ވިސްނުމަކީ ރައްޔިތުންގެ ބޮލުގައި އެޅިފައިވާ ދަރަނިތައް ވީހާވެސް ބޮޑަކަށް ކުޑަކުރަމުން، ރައްޔިތުންގެ ދިރިއުޅުމުގެ ހަރަދުތައް ކުޑަކުރުމަށް މަސައްކަތްކުރުމާއެކު ރާއްޖޭގައި އިންވެސްޓްކުރާ ފަރާތްތަކުގެ އިތުބާރު އިތުރުކުރުން ކަމަށެވެ. އަދި މާތްﷲ ގެ ވާގިފުޅާއެކު، މިހާރު ކުރިއަށްދާ މަސައްކަތްތަކުގެ ތެރެއިން ދައުލަތުގެ ރިޒާވްގެ ހާލަތުވެސް އިތުރަށް ރަނގަޅުވެގެންދާނެ ކަމުގެ ޔަގީންކަން އެމަނިކުފާނު ވަނީ ދެއްވައިފައެވެ.

މީގެއިތުރުން، ދަރަނި އަދާކުރުމުގައި ހަމައެކަނި ރަސްމީ ރިޒާވަކަށް ބަރޯސާނުވެ، ސޮވެރިން ޑިވެލޮޕްމެންޓް ފަންޑު (އެސްޑީއެފް) ވަރުގަދަކުރުމުގެ މަސައްކަތްވެސް ހަލުވިކަމާއެކު ކުރިއަށްދާކަން އެމަނިކުފާނު ފާހަގަކުރެއްވިއެވެ. އަދި މިހާރު ތަންފީޒުކުރަމުންދާ އިގުތިސާދީ ސިޔާސަތުތަކުގެ ހެޔޮ ބަދަލުތައް، ކުރިއަށް އޮތް ހަމަސްދުވަހުގެ ތެރޭގައި ފެންނަން ފަށާނެކަމަށްވެސް ވިދާޅުވިއެވެ. ރާއްޖެއިން ބޭރަށް ކުރައްވާ ރަސްމީ ދަތުރުފުޅުތަކުގެ ތެރެއިން ބާއްވަވާ އިންވެސްޓްމަންޓް ފޯރަމްތަކުގެ މުހިންމުކަމަށް އަލިއަޅުއްވާލައްވަމުން ރައީސް ވިދާޅުވީ، ފަތުރުވެރިކަމާއި މަސްވެރިކަން ފަދަ މައިގަނޑު ދާއިރާތައް ސިންދަފާތުކޮށް، ބައިނަލްއަގުވާމީ ބޮޑެތި ކުންފުނިތަކުގެ އިންވެސްޓްމަންޓްތައް ރާއްޖެއަށް ގެނައުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ.

އެގޮތުން، މިހާރު ފަށާފައިވާ އައިލާ މަޝްރޫއާއި، ރަސްމާލޭގައި އީގަލް ހިލްސްއާ ހަވާލުކޮށްގެން ކުރިއަށްގެންދާ މަޝްރޫއުގެ އިތުރުން، ދުނިޔޭގެ މަޝްހޫރު ޓެކް ކުންފުނި ގޫގުލްއިން ރާއްޖޭގައި ހިންގުމަށް ހަމަޖެހިފައިވާ މަޝްރޫއު ފާހަގަކުރައްވައި، މިފަދަ ބޮޑެތި އިންވެސްޓްމަންޓްތަކާއެކު ރާއްޖެއާމެދު ބައިނަލްއަގުވާމީ މުޖުތަމައުގެ އިތުބާރު އަބަދުވެސް ދަމަހައްޓަވާނެ ކަމުގެ ޔަގީންކަން ރައީސް މުޢިއްޒު ދެއްވިއެވެ.

ކެޕްޓަން އަންވަރު އިސްނަންގަވައިގެން، އޯޝަންއެކްސް މެރިން، މެރިންވައިބް އަދި އުކުޅަސް ކައުންސިލް ގުޅިގެން އިންތިޒާމުކުރާ މި ތިން ދުވަހުގެ ކޮންފަރެންސްގައި، ޢަމަލީ ތަމްރީނުތަކުގެ އިތުރުން ކަނޑުދަތުރުފަތުރުގެ ދާއިރާއަށް އަލަށް ތަޢާރަފުވެފައިވާ އެންމެ ފަހުގެ ޓެކްނޮލޮޖީއާއި އާލާތްތަކުގެ ލައިވް ޑެމޮންސްޓްރޭޝަންތައް ކުރިއަށްދާނެއެވެ.

މި ތަމްރީނު ޕްރޮގްރާމްގައި މައިގަނޑު ގޮތެއްގައި އަލިއަޅުވާލާނީ ކަނޑުމަތީގެ މަސައްކަތްތަކަކީ ރައްކާތެރި، ޒަމާނީ އަދި ހަރުދަނާ މަސައްކަތްތަކަކަށް ހެދުމަށް އެހީތެރިވެދޭ ޓެކްނޮލޮޖީއާއި ހުނަރުތަކުގެ މައްޗަށެވެ. މީގެ ތެރޭގައި އެކޯ ސައުންޑަރ، ބާރޑް ރާޑަރ، ބޭރު އިންޖީނު (އައުޓްބޯޑް އިންޖީނު)، ނެވިގޭޝަން ސިސްޓަމްތައް އަދި ކަނޑުދަތުރުފަތުރާ ގުޅުންހުރި އެހެނިހެން އިލެކްޓްރޯނިކް ވަސީލަތްތައް ހިމެނެއެވެ. މި ތަމްރީނުތައް ކުރިއަށް ގެންދަވާނީ ސިމްރަޑްގެ ސީނިއަރ ޕްރޮޑަކްޓް މެނޭޖަރ އެޑަމް ކިންގްގެ އިތުރުން، ރާއްޖޭގެ މަސްވެރިކަމާއި ކަނޑުދަތުރުފަތުރުގެ ދާއިރާގައި ދިގު މުއްދަތެއްގެ ތަޖުރިބާ ހޯއްދަވާފައިވާ ސިމްރަޑްގެ ލައިސަންސްޑް ޓެކްނީޝަނެއް ކަމަށްވާ ކެޕްޓަން އަންވަރެވެ.

މި ޓްރެއިނިންގްގެ މައިގަނޑު އަމާޒަކީ އުޅަނދުފަހަރުގެ ވެރިންނާއި އޮޕަރޭޓަރުންނެވެ. މީގެ އިތުރުން ވިޔަފާރި އުސޫލުން މަސްވެރިކަން ކުރާ ފަރާތްތަކާއި، ޗާޓަރ އަދި ޑައިވް އޮޕަރޭޓަރުންނާއި، މެރިން ސާމާނު ވިއްކާ ފަރާތްތަކުގެ އިތުރުން ދޯނިފަހަރާއި މަސްވެރިކަމުގެ ސިނާޢަތުގައި ހަރަކާތްތެރިވާ ގިނަ ފަރާތްތަކަކުން މި އިވެންޓުގައި ބައިވެރިވެފައިވެއެވެ.

މި އިވެންޓާ ގުޅޭގޮތުން ކެޕްޓަން އަންވަރު ވިދާޅުވީ، ”މި ޓްރެއިނިންގްގެ މައިގަނޑު މަޤްޞަދަކީ ކަނޑުމަތީގައި ޢަމަލީ ގޮތުން ހަރަކާތްތެރިވާ ފަރާތްތަކަށް ބޭނުންވާ ޒަމާނީ ޓެކްނޮލޮޖީއާއި ޢަމަލީ މަޢުލޫމާތު ސީދާ އެފަރާތްތަކާ ހަމައަށް ފޯރުކޮށްދިނުން،“ ކަމަށެވެ. އަދި ”މިއީ ދިވެހިރާއްޖޭގެ މެރިން ދާއިރާގައި މަސައްކަތްކުރާ ފަރާތްތަކަށް އައު ކަންކަން ދަސްކުރުމަށާއި، ޒަމާނީ ޓެކްނޮލޮޖީ ތަޖުރިބާކުރުމަށާއި، މި ސިނާޢަތުގެ މުސްތަޤްބަލު ބައްޓަންކުރަމުންދާ މަޝްހޫރު ބްރޭންޑްތަކާ ގުޅުން ބަދަހިކުރުމަށް ލިބިގެންދާ ވަރަށް އަގުހުރި ފުރުޞަތެއް،“ ކަމަށްވެސް އޭނާ ވިދާޅުވިއެވެ.

މި އިވެންޓުގެ ޓައިޓަލް ސްޕޮންސަރަކީ ދިވެހި އިންޝުއަރެންސް އެވެ. މީގެ އިތުރުން ސިމްރަޑް، އޯޝަންއެކްސް، އުކުޅަހު ކައުންސިލް، މެރިން ވައިބް، ޕްރިންޓްލެބް، އިންކްޑް، އަދި ކޮރަލް ޓްރާންސްފަރ އިން ދަނީ މި އިވެންޓަށް ފުރިހަމަ އެއްބާރުލުން ދެމުންނެވެ.

ޕީއެސްއެމްގެ ”ނޭޝަންސް ޗެޓް“ ޕޮޑްކާސްޓުގައި މައުލޫމާތު ހިއްސާކުރައްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ކޮންޓްރެކްޓް ކުރެވިގެން މަސައްކަތް ނުފެށި ހުރި ބިން ހިއްކުމުގެ މަޝްރޫޢުތައް ކުރިއަށްގެންދިއުމަށް އިތުރު ޑްރެޖަރެއް ސެކިއުރ ކުރެވިފައިވާ ކަމަށެވެ. އަދި މިއަހަރު ނިމުމުގެ ކުރިން އެ ޑްރެޖަރު ގެނެވުމާއެކު، މަޑުޖެހިފައިވާ ގިނަ މަޝްރޫޢުތަކެއްގެ އަމަލީ މަސައްކަތް އެކީގައި ފެށިގެންދާނެ ކަމަށް އެމަނިކުފާނު ފާހަގަކުރެއްވިއެވެ.

ޤައުމީ ތަރައްޤީގެ މަސައްކަތްތަކަށް މަޑުޖެހުމެއް އައީ މެދުއިރުމަތީގައި ފެށުނު ހަނގުރާމައާ ގުޅިގެން މުޅި ދުނިޔެއަށް ކުރިމަތިވި މާލީ ތާށިކަމުގެ ސަބަބުން ކަމަށް ރައީސް ވިދާޅުވިއެވެ. ނަމަވެސް، ދައުލަތުގެ ހަރަދުތައް އަލުން ތަރުތީބުކޮށްގެން އެޅި ފިޔަވަޅުތަކާއެކު، އެ ދަތިތަކުން އަރައިގަނެވި މަޝްރޫޢުތައް އަލުން ހިންގާލެވޭނެ މަގު މިހާރު ފަހިވެފައިވާ ކަމަށް އެމަނިކުފާނު ވިދާޅުވިއެވެ.

ސަރުކާރުގެ އެންމެ ގިނަ ތަރައްޤީގެ މަޝްރޫޢުތައް ހިންގާ އެމްޓީސީސީގެ ހިންގުން ހަރުދަނާކޮށް، އެ ކުންފުންޏަށް ބޭރު ފައިސާ ލިބޭނެ އިންތިޒާމުތައް ހަމަޖައްސަވަމުންދާކަން ފާހަގަކުރައްވަމުން ރައީސް ވިދާޅުވީ، މަޝްރޫޢުތަކަށް ބޭނުންވާ ބޮޑުހިލައާއި އެހެނިހެން ވަސީލަތްތައް ކުރިއަށް އޮތް ތަނުގައި ލަސްތަކެއް ނުވެ ލިބެން ފަށާނެ ކަމަށެވެ.

ރައީސް މުޢިއްޒު ވިދާޅވި ގޮތުގައި، ސަރުކާރުގެ އަމާޒަކީ އެމްޓީސީސީއަކީ ހަމައެކަނި ދައުލަތުގެ މަޝްރޫޢުތަކަށް ބަރޯސާވާ ކުންފުންޏަކަށް ނުހަދައި، އަމިއްލަ ބޮޑެތި ވިޔަފާރިތަކުގެ މަސައްކަތްތައް ވެސް ނަގައިގެން އަމިއްލައަށް އާމްދަނީ ހޯދޭނެ ފެންވަރަށް އެ ކުންފުނީގެ ޤާބިލުކަން އިތުރުކޮށް ވަރުގަދަކުރުމެވެ.

ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ގެނެސްދޭ މި ފޯރަމް އޮންނާނީ އާދިއްތަ ދުވަހުގެ ރޭ 21:00 ގައެވެ. ދެ ގަޑިއިރުގެ މި ފޯރަމުގައި ތިން މިނިސްޓަރަކު ބައިވެރިވެވަޑައިގަންނަވައެވެ. މި ފޯރަމްގައި ބައިވެރިވެވަޑައިގަންނަވާނީ:

• ޔޫތް މިނިސްޓަރު ޢަބްދުﷲ ރާފިޢު
• ފިޝަރީޒް މިނިސްޓަރު އަޙްމަދު ޝިޔާމް
• ހޯމް މިނިސްޓަރު ޢަލީ އިޙްސާން

މި ފޯރަމުގައި މިނިސްޓަރުންނާ ސުވާލުކުރުމުގެ ފުރުސަތު މިހާރު ވަނީ އާންމުންނަށް ހުޅުވާލައިފައެވެ. އެގޮތުން، ފޯރަމް ކުރިއަށްދާ މާލަމަށް ހާޒިރުވެގެންނާއި، ’ޕީއެސްއެމް އެއަރ‘ އެޕްލިކޭޝަން މެދުވެރިކޮށް ސުވާލު ފޮނުވޭނެ އިންތިޒާމު ވަނީ ހަމަޖައްސައިފައެވެ. ސަރުކާރުގެ ހިންގުން ދެފުށް ފެންނަ ގޮތެއްގައި ކުރިއަށްގެންދިއުމުގެ މަގުސަދުގައި ”އަހާ“ ސިލްސިލާ ފޯރަމްތައް ފަށާފައިވަނީ 2024 ވަނަ އަހަރުގެ ޖެނުވަރީ މަހުގެ ތެރޭގައެވެ.

މީގެއިތުރުން، ރައްޔިތުންގެ ކަންބޮޑުވުންތައް ސީދާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ހިއްސާކުރުމަށް ”ރައްޔިތުންގެ އަޑު“ ގެ ނަމުގައި ޕްރޮގްރާމެއް ކުރިއަށްދާއިރު، ސަރުކާރުގެ ސިޔާސަތުތަކާ ގުޅޭގޮތުން ރައީސުލްޖުމްހޫރިއްޔާ މައުލޫމާތު ދެއްވާ ”ނޭޝަން ޗެޓް“ ޕްރޮގްރާމް ވެސް ޕީއެސްއެމް މެދުވެރިކޮށް ދަނީ ގެނެސްދެމުންނެވެ.

އެމެރިކާގެ ސިންސިނާޓީ ޔުނިވަސިޓީގެ ޑޮކްޓަރު އެމިލީ އާރް. ފިޝާ އާއި އެކަމަނާގެ ދިރާސާ ޓީމުން ’ނިއުރޯލޮޖީ‘ ޖާނަލްގައި ޝާއިއުކޮށް، ދިރާސާއަކުން ދައްކާ ގޮތުގައި، ފަހަކަށް އައިސް ޒުވާނުންގެ މެދުގައި ސިކުނޑީގެ ސްޓްރޯކް ޖެހޭ މިންވަރު ދަނީ ނުހަނު އިތުރުވަމުންނެވެ. އުމުރުން 20 އަހަރާއި 54 އަހަރާ ދެމެދުގެ މީހުންނަށް އުމުރުގެ ކުރީކޮޅު ސްޓްރޯކް ޖެހުމުގެ ނުރައްކާ ކުރިއަށްވުރެ ބޮޑަށް އިތުރުވެފައިވީ ނަމަވެސް، މި ބަދަލު އަންނަންޖެހުނު ސަރީހަ ސަބަބެއް ސައިންސްވެރިންނަށް އަދިވެސް މުޅިން ސާފުވެފައެއް ނުވެއެވެ.

ސިންސިނާޓީ ޔުނިވަސިޓީގެ މެޑިކަލް ޓީމުން 1993 އިން 2020 އަށް ކުރި މި ދިރާސާއަށް ބަލާއިރު، އެ މުއްދަތުގެ ތެރޭގައި ޒުވާނުންނަށް މުޅިން އަލަށް ސްޓްރޯކް ޖެހޭ މިންވަރު ވަނީ ގާތްގަނޑަކަށް ދެގުނައަށް އުފުލިފައެވެ. މިގޮތުން 1993 ގައި ކޮންމެ އެއްލައްކަ ޒުވާނުންގެ ތެރެއިން ސްޓްރޯކް ޖެހުނީ 34 މީހުންނަށް ކަމަށްވާއިރު، 2020 އާ ހަމައަށް އައިއިރު އެ އަދަދު ވަނީ 62 އަށް އުފުލިފައެވެ. މީގެ ތެރެއިން އެންމެ ގިނައީ ސިކުނޑިއަށް ލޭފޮނުވައިދޭ ނާރުތައް ބެދިގެން ދިމާވާ ”އިސްކީމިކް“ ސްޓްރޯކްގެ ހާދިސާތަކެވެ.

ސްޓްރޯކް ޖެހޭ ޒުވާނުންގެ ސިއްހީ ހާލަތަށް ބަލާއިރު، މަތީ ލޭގެ ޕްރެޝަރާއި ހަކުރުބަލި އަދި ހިތުގެ ވިންދު އަވަސްވުމުގެ މައްސަލަތައް ހުންނަ މީހުންގެ އަދަދު އިތުރުވެފައިވާކަން ފާހަގަކުރެވެއެވެ. މީގެ އިތުރުން މަސްތުވާތަކެއްޗާއި މަރިއުވާނާ ބޭނުންކުރާ ޒުވާނުންގެ ނިސްބަތްވެސް ކުރިއަށްވުރެ ބޮޑަށް އިތުރުވެފައިވާކަން ދިރާސާއިން ދައްކައެވެ. ނަމަވެސް، ސައިންސްވެރިން ފާހަގަކުރާ ގޮތުގައި މިއީ ހަމައެކަނި މި މައްސަލަ އިތުރުވާ ސަބަބެއް ކަމަށް ނިންމޭކަށް ނެތެވެ.

މި ނުރައްކާތެރި ތަރައްގީއަކީ ހަމައެކަނި އެމެރިކާއަށް އެކަނި މެދުވެރިވެގެން އުޅޭ ކަމެއް ނޫނެވެ. ދުނިޔޭގެ އެކި ކަންކޮޅުތަކުގައި، ހާއްސަކޮށް އާމްދަނީ މަދުންނާއި މެދުފަންތީގެ އާމްދަނީ ލިބޭ ގައުމުތަކުގައި ޒުވާނުންނަށް ސްޓްރޯކް ޖެހޭ މިންވަރު ދަނީ އިތުރުވަމުންނެވެ. އިނގިރޭސިވިލާތުގެ އޮކްސްފޯޑް ޔުނިވަސިޓީގެ ދިރާސާތަކުން އެނގޭ ގޮތުގައި، ސިއްހީ ގޮތުން އެއްވެސް މައްސަލައެއް ނެތް އަދި ދުންފަތުގެ އިސްތިއުމާލު ނުކުރާ ޒުވާނުންނަށްވެސް ސަބަބެއް ނޭނގި ސްޓްރޯކް ޖެހޭ މިންވަރު ވަނީ އިތުރުވެފައެވެ.

މިކަމާ ގުޅިގެން ސައިންސްވެރިން ލަފާކުރަނީ، ލޭގެ ނާރުތަކުގައި ސަރުބީ އުފެދުމުގެ އިތުރުން، ވައި ނުސާފުވުމާއި، މަސައްކަތުގެ ވަގުތު ދިގުވުމާއި، ނަފްސާނީ ތަންގީޒު (ސްޓްރެސް) އަދި ޑިޕްރެޝަން ފަދަ ކަންކަމަކީވެސް މި މައްސަލައަށް މަގުފަހިކުރާ އާ ސަބަބުތަކަށް ވެދާނެ ކަމަށެވެ. އަދި ސިކުނޑީގެ އެމްއާރުއައި ޓެސްޓުތައް ފުޅާދާއިރާއެއްގައި ކުރެވެން ފެށުމުން، ކުރިން ނޭނގި ހުންނަ ސްޓްރޯކްތައް ދެނެގަނެވޭ މިންވަރު އިތުރުވުމަކީވެސް އަދަދުތައް މަތިވާން މެދުވެރިވި އެއް ސަބަބެވެ.

ސްޓްރޯކް ޖެހޭ މީހުން ސަލާމަތްވާ މިންވަރު ކުރިއަށްވުރެ ކުޑަކޮށް ރަނގަޅުވި ނަމަވެސް، ޒުވާން އުމުރުގައި ސްޓްރޯކެއް ތަހައްމަލުކުރަން ޖެހުމަކީ ދިރިއުޅުމަށް ބޮޑެތި ގޮންޖެހުންތަކެއް ކުރިމަތިކުރުވާ ކަމެކެވެ. ސްޓްރޯކުން ސަލާމަތްވާ ގިނަ ޒުވާނުންނަށް ވިސްނުމާއި ހަނދާން ބެހެއްޓުމުގައި ދަތިތަކާ ކުރިމަތިލާންޖެހޭއިރު، ވަޒީފާއަށް އަނބުރާ ނުނުކުމެވުމާއި ނަފްސާނީ އެކި މައްސަލަތައް ކުރިމަތިވެއެވެ.

ސައިންސްވެރިން އިރުޝާދު ދެނީ ޒުވާން އުމުރުގައި ސިއްހަތަށް ސަމާލުކަންދީ، ސްޓްރޯކަށް މަގުފަހިކުރާ ކަންކަމުން ރައްކާތެރިވުމަށް އަވަސް ފިޔަވަޅުތަކެއް އަޅަންޖެހިފައިވާ ކަމަށެވެ.

ވޭތުވެދިޔަ ދެ އަހަރުގެ ތެރޭގައި މި މަޝްރޫއަށް ބޮޑެތި ކުރިއެރުންތަކެއް ލިބިފައިވާއިރު، މިހާރު ކުރިއަށްދަނީ މާލެއާއި ވިލިމާލެ ގުޅުވައިދޭ ބައިގެ އެންމެ ފަހުގެ ފިނިޝިންގ މަސައްކަތްތަކެވެ. އެގޮތުން، މި އަހަރުގެ އޮގަސްޓް މަހުގެ ފަހުކޮޅު ވަނީ މާލެއާއި ވިލިމާލެއާ ދެމެދު ބުރިޖުގެ ސްޓްރަކްޗަރ ގުޅާލުމުގެ ތާރީޚީ ލަނޑުދަނޑި ހާސިލްކޮށްފައެވެ. މުޅި މަޝްރޫއުގައި ޖުމްލަ 6.7 ކިލޯމީޓަރުގެ ސަރަހައްދެއް ތަރައްގީކުރާއިރު، މާލެއިން ވިލިމާލެއަށް ގުޅާލެވޭ ބައިގެ ދިގުމިނަކީ 2.05 ކިލޯމީޓަރެވެ.

މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓުން ހާމަކުރި ގޮތުގައި، މާލެ-ވިލިމާލެ ސެގްމެންޓުގައި މިހާރު ކުރިއަށްދަނީ ދެކޮޅަށް ދުއްވާ ލޭންތައް ވަކިކުރުމަށް ޖަހާ މީޑިއަން ބެރިއަރުތަކުގެ މަސައްކަތާއި، ތާރު އެޅުމުގެ ކުރިން ޑެކްގައި ފުރިހަމަކުރަންޖެހޭ ތައްޔާރީތަކެވެ. މީގެއިތުރުން، ރައްކާތެރިކަމުގެ ރެއިލިންގ ހަރުކުރުމާއި، މަގުބައްތި އަދި ސީސީޓީވީ ކެމެރާ ނިޒާމު ގާއިމުކުރުމުގެ މަސައްކަތްތައްވެސް އެއްފަސްކޮށް ދަނީ ކުރެވެމުންނެވެ.

މި ސަރުކާރުން ވެރިކަމާ ހަވާލުވި މަރުހަލާގައި މި މަޝްރޫއު އޮތީ ބޮޑުތަނުން މަޑުޖެހިފައެވެ. އަދި އެއިރު ނިމިފައިވަނީ މަޝްރޫއުގެ އެންމެ 29 އިންސައްތަ މަސައްކަތެވެ. ނަމަވެސް، ރައްޔިތުންގެ ލާބަޔާއި މަންފާއަށްޓަކައި ފަށާފައިވާ ތަރައްގީގެ އެއްވެސް މަޝްރޫއެއް ހުއްޓާނުލުމުގެ ސިޔާސަތުގެ ދަށުން، ސަރުކާރުން ވަނީ ކޮންޓްރެކްޓަރާއި އިންޑިއާ ސަރުކާރާއެކު މަތީ ފެންވަރުގެ މަޝްވަރާތަކެއް ބާއްވައި، މަސައްކަތުގެ ދުވެލި ވަރަށް ބޮޑަށް ހަލުވިކޮށްފައެވެ.

ސަރުކާރުގެ މައިގަނޑު އަމާޒަކީ 2027 ވަނަ އަހަރުގެ ނިޔަލަށް މި މުޅި މަޝްރޫއު އެއްކޮށް ނިންމައި އާންމު ޚިދުމަތަށް ހުޅުވާލުމެވެ. އެގޮތުން، ވިލިމާލެއިން ގުޅިފަޅަށް އަދި ގުޅިފަޅުން ތިލަފުއްޓަށް ގުޅާލުމުގެ މަސައްކަތްތަކުގެ އިތުރުން، އެ ރަށްތަކުގެ ހައިވޭތައް ތަރައްގީކުރުމުގެ މަސައްކަތްތައްވެސް ތާވަލާ އެއްގޮތަށް ބާރަށް ކުރިއަށް އެބަދެއެވެ.

އިންޑިއާގެ ލައިން އޮފް ކްރެޑިޓް އަދި ދިވެހި ސަރުކާރުގެ ބަޖެޓުން ޚަރަދުކޮށްގެން ހިންގާ 500 މިލިއަން އެމެރިކާ ޑޮލަރުގެ މި މަޝްރޫއަކީ، ގްރޭޓަރ މާލެ ސަރަހައްދުގެ އިގުތިސާދީ އަދި އިޖުތިމާއީ ހަރަކާތްތަކަށް އިންގިލާބީ ބޮޑު ބަދަލެއް ގެނުވާނެ އުމްރާނީ ތަރައްގީގެ މުހިންމު ބިނާއެކެވެ.

އޭއެފްސީގެ އެގްޒެކްޓިވް ކޮމިޓީން ނިންމި މި ނިންމުމާއެކު، އެފްއޭއެމުން ކުރިން އަނބުރާ ދައްކަންޖެހޭ 253،030 ޑޮލަރު (ގާތްގަނޑަކަށް 3.9 މިލިއަން ރުފިޔާ) ދައްކަން ނުޖެހޭ ގޮތަށް ވަނީ ހަމަޖައްސައިދީފައެވެ. އަދި އަންނަ އަހަރުން ފެށިގެން އޭއެފްސީގެ މާލީ އެހީއަށް އެދުމުގެ ފުރުސަތު ރާއްޖެއަށް އަލުން ވަނީ ހުޅުވާލާފައެވެ.

މި ފައިސާއަކީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ ދައުރުގައި އޭއެފްސީން ދިން ފައިސާ ނަހަމަ ގޮތުގައި ބޭނުންކޮށްފައިވާތީ އަނބުރާ ދެއްކުމަށް އެ ފެޑެރޭޝަނުން އަންގާފައިވި ފައިސާއެކެވެ. މާލީ އެހީ ހޯދުމުގެ ފުރުސަތު ރާއްޖެއަށް ބަންދުވީ 2024 ވަނަ އަހަރުގެ ތެރޭގައެވެ.

އެފްއޭއެމްގެ މިހާރުގެ ރައީސް އަހުމަދު ތޯރިގް (ޓޮމް) އިސްވެ ހުންނަވައިގެން އޭއެފްސީގައި އެދިވަޑައިގެންފައިވަނީ، ދިވެހި ފުޓްބޯޅައިގެ ހާލަތު ރަނގަޅުކުރުމަށްޓަކައި އެ ފައިސާ މައާފުކޮށްދީ، މާލީ އެހީ އަލުން ލިބޭނެ މަގު ތަނަވަސްކޮށްދިނުމަށެވެ. އެއާއެކު އޭއެފްސީން ވަނީ އެފްއޭއެމްގެ ހުށަހެޅުމާ އެއްގޮތަށް އެ ދެ ކަންތައްވެސް ކޮށްދީފައެވެ.

އެފްއޭއެމްގެ ފައިސާއަށް ހިޔާނާތްތެރިވެ، އަމިއްލަ ކަންކަމަށް ބޭނުންކުރިކަން ސާބިތުވެ ބައްސާމް މިވަގުތު 32 އަހަރުގެ ޖަލު ހުކުމެއް ތަންފީޒުކުރައްވަމުން ދާއިރު، ފީފާއިން ވަނީ އޭނާ 1.23 މިލިއަން ޑޮލަރުން ޖޫރިމަނާކޮށް، ފުޓްބޯޅައިގެ ހުރިހާ ހަރަކާތަކުން މުޅި އުމުރަށް ސަސްޕެންޑްވެސް ކޮށްފައެވެ.

ދައުލަތުގެ މީޑިއާ ޕީއެސްއެމްގެ ”ނޭޝަން ޗެޓް“ ޕްރޮގްރާމުގައި ވާހަކަފުޅުދައްކަވަމުން ރައީސް މުޢިއްޒު ވަނީ، 2040 ވަނަ އަހަރުގެ ނިޔަލަށް ރާއްޖެއަކީ ތަރައްގީވެފައިވާ ގައުމަކަށް ހެއްދެވުމަށް ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް އަލިއަޅުއްވައިލައްވާފައެވެ.

އެމަނިކުފާނު ފާހަގަކުރެއްވި ގޮތުގައި، މި އަމާޒު އެންމެ ފުރަތަމަ އިއުލާނުކުރެއްވީ 2024 ވަނަ އަހަރު ބޭއްވުނު އދގެ އާންމު މަޖިލީހުގައެވެ. އަދި އެ ޕްލެޓްފޯމް ހިޔާރުކުރެއްވީ ގައުމުގެ ތަސައްވުރާއި އުންމީދުތައް މުޅި ދުނިޔެއަށް ހާމަކޮށްދިނުމަށް ލިބޭ އެންމެ މުހިންމު ބައިނަލްއަގުވާމީ މައިދާނަކީ އެއީ ކަމަށްވާތީ ކަމުގައި ވިދާޅުވިއެވެ.

ވެރިކަން ބަދަލުވާ ކޮންމެ ފަހަރަކު ގައުމުގެ މިސްރާބު ބަދަލުވެ، ބޮޑެތި މަޝްރޫއުތައް ހުއްޓުމަކަށް އައުމަކީ ތަރައްގީއަށް އެޅޭ ބޮޑު ހުރަހެއްކަން ފާހަގަކުރައްވަމުން، ރައީސް ވިދާޅުވީ ގައުމީ ތަރައްގީގެ މާސްޓަރ ޕްލޭން އެކުލަވައިލަނީ ރައްޔިތުންގެ ފުރިހަމަ ހިޔާލާއި ބައިވެރިވުމާއެކު ކަމަށެވެ. އަދި ވެރިކަން ބަދަލުވި ނަމަވެސް، މި ޕްލޭނަށް އެއްވެސް މެދުކެނޑުމެއް ނައިސް ކުރިއަށްދާނެ ކަމުގެ ޔަގީންކަން އެމަނިކުފާނު ދެއްވިއެވެ.

މީގެއިތުރުން، ކުރިއަށް އޮތް ތަނުގައި އަންނަ ސަރުކާރުތަކަށް މި ޕްލޭނުގެ މައިގަނޑު އަމާޒުތައް ފަސޭހައިން ބަދަލުނުކުރެވޭނެހެން ހެދުމަށްޓަކައި، މި ޕްލޭނަށް ގާނޫނީ ބާރުވެރިކަމާއި ހިމާޔަތް ހޯދައިދިނުމުގެ ގޮތުން ހާއްސަ ގާނޫނެއް އެކުލަވައިލުމުގެ މަސައްކަތް ސަރުކާރުން ކުރައްވަމުން ގެންދަވާ ކަމަށްވެސް ވިދާޅުވިއެވެ.

ގައުމީ ތަރައްގީގެ މި ޕްލޭން ބިނާކުރެވެނީ ދިވެހިންގެ ސަގާފަތާއި އިސްލާމީ ރިވެތި އުސޫލުތަކާއި އަހުލާގު ދެމެހެއްޓުމާއެކު، އިގުތިސާދު ސިންދަފާތުކޮށް ވަރުގަދަކުރުމާއި، ރައްޔިތުންގެ ދިރިއުޅުމުގެ ފެންވަރު މަތިކުރުމާއި، އިޖުތިމާއީ އަދުލުވެރިކަމާއި، ތިމާވެށީގެ ދެމެހެއްޓެނިވިކަން ކަށަވަރުކުރުމުގެ އިތުރުން ދައުލަތުގެ މުއައްސަސާތައް ހިންގުން ހަރުދަނާކުރުމުގެ މައްޗަށެވެ.

ޕީއެސްއެމްއިން ގެނެސްދޭ ”ނޭޝަން ޗެޓް“ ޕްރޮގްރާމުގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، އެމަނިކުފާނު ވެރިކަމާ ހަވާލުވެވަޑައިގެންނެވި އިރު ސަރުކާރު ކުންފުނިތަކުގައި 18،000 އަށްވުރެ ގިނަ މުވައްޒަފުން ތިބި ކަމަށެވެ. އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ރައްޔިތުންގެ މަޖިލީހުގެ ކޮމިޓީއާ ހިއްސާކުރި މައުލޫމާތުތަކަށް ބަލާއިރު، އެ ހުރިހާ މުވައްޒަފުންނަކީވެސް ވޭތުވެދިޔަ އެމްޑީޕީ ސަރުކާރުން ވަޒީފާ ދީފައިވާ ފަރާތްތައްކަން ހާމަވާ ކަމަށް ރައީސް ފާހަގަކުރެއްވިއެވެ.

ރައީސް ވިދާޅުވި ގޮތުގައި، ކުންފުނިތައް ރައިޓް ސައިޒްކުރަން ސަރުކާރުން ފަށާފައިވާ ހަރުދަނާ ފިޔަވަޅުތަކުގެ ތެރެއިން، މުވައްޒަފުންގެ އަދަދު މިހާރު ވެސް ވަނީ ބޮޑުތަނުން މަދުކުރެވިފައެވެ. އަދި މާތްﷲ ގެ ވާގިފުޅާއެކު، މިއަހަރު ނިމުމުގެ ކުރިން ކުންފުނިތަކުގައި މުވައްޒަފުން ބައިތިއްބާނީ އެ ކުންފުންޏެއްގެ ހިންގުމަށް ކޮންމެހެން ބޭނުންވާ މިންވަރަށް ކަމަށް އެމަނިކުފާނު ވިދާޅުވިއެވެ.

”މި މަސައްކަތް ކުރިއަށް ގޮސް އިރާދަކުރެއްވިއްޔާ މިއަހަރު ނިމެންވާއިރު ކުންފުނިތަކުގެ މުވައްޒަފުންގެ އަދަދު ހުންނާނީ ކުންފުނިތަކަށް ބޭނުންވާ ވަރަށް،“ – ރައީސް މުޢިއްޒު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، ސަރުކާރު ކުންފުނިތަކުގެ ހިންގުން ހަރުދަނާކުރުމަށްޓަކައި، ކުންފުނިތަކަށް ބޭކާރު ގޮތުގައި ނަގާފައި ތިބި މުވައްޒަފުން ވަކިކުރަން ޖެހޭ ކަމަށެވެ. ނަމަވެސް އެ މަސައްކަތް ކުރިއަށް ގެންދާނީ ނުހަނު ޒިންމާދާރުކަމާއެކު ކަމުގެ ޔަގީންކަން އެމަނިކުފާނު ދެއްވިއެވެ. މީގެއިތުރުން، ކުންފުނިތަކުން މުވައްޒަފުން ދޫކޮށްލުމުގައި އަމިއްލައަށް އެދިގެން ވަޒީފާއިން ވަކިވުމުގެ ފުރުސަތު ފަހިކޮށްދެމުންދާކަން ރައީސް ފާހަގަކުރެއްވިއެވެ. އެގޮތުން ވަޒީފާއިން ވަކިވާ މުވައްޒަފުންނަށް ހާއްސަ ރިޓަޔަރމަންޓް ޕެކޭޖެއް ހަމަޖައްސައިދިނުމުގެ އިތުރުން، އަމިއްލަ ވިޔަފާރި ފަށަން ބޭނުންވާ ފަރާތްތަކަށް ލޯނު ލިބޭނެ އިންތިޒާމު ވެސް ސަރުކާރުން ހަމަޖައްސަވައިދެއްވާނެ ކަމަށް އެމަނިކުފާނު ވަނީ ވިދާޅުވެފައެވެ.