އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި ކަމަށް ތުޙުމަތުކުރެވޭ އޭނާގެ ފިރިމީހާ، މާވިން އެސްވައި ވާގަސް ޖަލުގައި ހުރެ އިސްލާމް ދީން ޤަބޫލުކޮށްފިއެވެ.
މާވިން އިސްލާމް ދީން ޤަބޫލުކޮށްފައިވާކަން އެނގުނީ ކްރިމިނަލް ކޯޓުގައި މިއަދު ބޭއްވި އަޑުއެހުމުގައެވެ. އިސްލާމް ދީން ޤަބޫލުކުރުމަށްފަހު މާވިން ވަނީ އޭނާގެ ނަން ޔޫސުފްއަށް ބަދަލުކޮށްފައެވެ. މިކަމާ ގުޅިގެން މިނިސްޓްރީ އޮފް އިސްލާމިކް އެފެއަރޒްއިން ވަނީ ކްރިމިނަލް ކޯޓަށް ސިޓީއެއްވެސް ފޮނުވައިފައެވެ.
މާވިން އިސްލާމް ދީން ޤަބޫލުކޮށްފައިވާތީ، އޭނާގެ މައްޗަށް ދަޢުލަތުން ކުރާ ދަޢުވާ ސާބިތުވެއްޖެނަމަ ކަނޑައަޅާ އަދަބަށް ބަދަލެއް ގެންނަންޖެހޭނެ ކަމަށް ދަޢުލަތުން ދެކޭތޯ ދިފާޢީ ވަކީލު ސުވާލު ކުރެއްވުމުން، އެކަމާ މެދު ގޮތެއް ނިންމުމަށް ވަޤުތު ދިނުމަށް ދަޢުލަތުން ވަނީ އެދިފައެވެ.
މިއަދު ބޭއްވި ޝަރީޢަތުގެ އަޑުއެހުމުގައި ޚުލާޞާ ބަޔާން އިއްވުން އޮތް ނަމަވެސް، ބައެއް ލިޔެކިޔުންތައް ފުރިހަމައަށް ނުލިބޭތީ ތައްޔާރުވާންޖެހޭ ބައެއް ކަންކަމަށް ތައްޔާރުވުމަށް ދިފާޢީ ވަކީލު އިތުރު ވަގުތަށް އެދުމުން، މައްސަލަ ބައްލަވާ ޣާޒީ މުޒައްމިލު ނާސިރު ވަނީ އަންނަ މާރިޗު މަހާއި ހަމައަށް އެ ފުރުޞަތު ދެއްވައިފައެވެ.
މީގެ ހަތަރު އަހަރުކުރިން 2021 ވަނަ އަހަރުގެ އޮކްޓޫބަރު މަހުގެ ތެރޭގައި މޭރީ ގްރޭސްގެ ބޮލަށާއި ކަރަށް ހަމަލާދީ ނޭވާހާސްކޮށްލައިގެން އޭނާ މަރާލި ކަމުގެ ތުޙުމަތުގައި މާވިންގެ މައްޗަށް ޤަޞްތުގައި މީހަކު މެރުމުގެ ކުށް ދަޢުލަތުން ކުރެއެވެ. މޭރީ މަރުވީ އަމިއްލައަށް ދަންޖެހިގެން ކަމަށް ބުނެ ހޮސްޕިޓަލަށް ގެންދިޔަ ނަމަވެސް، ފުލުހުންގެ ތަޙުޤީޤަށް ޝައްކުކުރެވޭ އެތަށް ކަމެއް ފާހަގަވުމާ ގުޅިގެން މާވިން ވަނީ ހައްޔަރުކޮށްފައެވެ.
ފުލުހުން ބެލި ބެލުމުގައި، މި ހާދިސާ ހިނގީ މާވިން އާއި އައިޖީއެމްއެޗްގެ އީއާރުގައި މަސައްކަތްކުރި ނަރުހެއް ކަމުގައިވާ ލަމްހާގެ ލޯބީގެ ގުޅުމުގެ ތެރެއިން އުފެދުނު މައްސަލަތަކެއްގެ ސަބަބުން ކަން ހާމަވެފައިވެއެވެ. މި މައްސަލައާ ގުޅިގެން ލަމްހާގެ މައްޗަށް ވެސް ދަޢުލަތުން ވަނީ ދަޢުވާ އުފުލައިފައެވެ. ލަމްހާގެ މައްޗަށް ދަޢުލަތުން އުފުލާފައިވާ ދަޢުވާއަކީ މީހަކު މެރުމުގައި ބައިވެރިވުމުގެ ކުށުގެ ދަޢުވާއެވެ. މީގެ އިތުރުން ހުއްދަ ނޫން ބޭސްތަކެއް ގެންގުޅުނު މައްސަލާގައި ވެސް ލަމްހާގެ މައްޗަށް ދަޢުލަތުން ވަނީ ދަޢުވާ ކޮށްފައެވެ.
