މާލޭ ސިޓީ ކައުންސިލް ޕެރެލައިޒް ކޮށްލި ބޭފުޅަކީ މޭޔަރު އާދަމް އާޒިމް ކަމަށް މާލޭ ސިޓީ ގަލޮޅު ދެކުނު ދާއިރާގެ ކައުންސިލަރު އިބްރާހިމް މުޙައްމަދު (އިބުޓީ) ވިދާޅުވެއްޖެއެވެ.
އިބުޓީ މި މޭރުމުން ވިދާޅުވީ އިއްޔެ ބޭއްވި މާލޭ ސިޓީ ކައުންސިލްގެ ބައްދަލުވުމުގައި ވާހަކަދައްކަވަމުންނެވެ. އެ ބައްދަލުވުމުގައި ވާހަކަދައްކަވަމުން އިބުޓީ ވަނީ، މޭޔަރު އާދަމް އާޒިމް ޕީއެންސީއަށް ނިސްބަތްވާ ކައުންސިލަރުންނާ ގުޅޭގޮތުން ދައްކަވަމުން ގެންދަވާ ދޮގު ވާހަކަތަކަށް ހޫނު ރައްދެއް ދެއްވައިފައެވެ.
އެގޮތުން މޭޔަރު އާޒިމް މީޑިއާތަކަށް ދެއްވާ އިންޓަވިއުތަކުގައި އަދި ވަކިން ޚާއްޞަކޮށް އެމްޑީޕީގެ ޖަލްސާތަކުގައި، މާލޭ ސިޓީ ކައުންސިލްގެ ބައްދަލުުވުންތައް ނުބޭއްވެނީ ކޯރަމް ހަމަނުވާތީ ކަމަށް ވިދާޅުވެ ދައްކަވަމުން ގެންދަވާ ވާހަކަތަކާއި، ފްލޯއަށް ގެންނަ މަސައްކަތްތައް ޕީއެންސީއަށް ނިސްބަތްވާ ކައުންސިލަރުންނަށް ނުނިންމޭ ކަމަށް ވިދާޅުވެ ދައްކަވަމުން ގެންދަވާ ވާހަކަތަކަކީ އެއްވެސް އަސާސެއް ނެތް ދޮގެއް ކަމުގައި އިބުޓީ ވިދާޅުވިއެވެ.
މޭޔަރު އާޒިމް ވަނީ މީގެ ކުޑަ ދުވަސްކޮޅެއް ކުރިން މާލޭ ސިޓީ ޑެޕިއުޓީ މޭޔަރު މުޙައްމަދު ޢަރީޝްއާ ގުޅުވައިގެންވެސް ދޮގު ވާހަކަތަކެއް ދައްކަވައިފައެވެ. އެގޮތުން ޑެޕިއުޓީ މޭޔަރު ޢަރީޝްއަކީ އޭނާގެ ޒިންމާތައް ފުރިހަމައަށް އަދާނުކުރައްވާ ބޭފުޅެއްގެ ގޮތުގައި ސިފަކުރައްވައި ގިނަ ދުވަސްދުވަހު ޢަރީޝް އޮފީހަށް ވަޑައިގަންނަވަނީ ނިދާ ހެދުމާއެކުގައި ކަމަށް އާޒިމް ވަނީ ވިދާޅުވެފައެވެ.
އިބުޓީ ވިދާޅުވީ މާލޭ ސިޓީ މޭޔަރު ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުންނެވި ދުވަސްވަރު މާލޭ ސިޓީ އެކި ދާއިރާތަކަށް ނިސްބަތްވާ ކައުންސިލަރުން އެންމެ ފުރުތަމަވެސް އޮފީހަށް ދިއުމަށްފަހު ކުރާ ކަމަކީ އެއްކޮށް އޮފީސްތެރޭގައި ބްރެކްފާސްޓް ނެގުން ކަމަށާއި، އެއަށްފަހު ކުރަންވީ ހުރިހާ މަސައްކަތްތަކެއް އެއް ކައުންސިލަރަކު އަނެއް ކައުންސިލަރަކާ ޙަވާލުކުރާ ކަމަށެވެ. ނަމަވެސް މިހާ ފުރިހަމަކޮށް ހިންގަމުން އައި ކައުންސިލެއް މޭޔަރު ކަމަށް ހޮވިވަޑައިގަތުމަށްފަހު މޭޔަރު އާޒިމް ޕެރެލައިޒްކޮށްލާފައިވާ ކަމަށް އިބުޓީ ވިދާޅުވިއެވެ.
މޭޔަރު އާޒިމް މިފަދަ މޭރުމަކުން ޕީއެންސީއަށް ނިސްބަތްވާ ކައުންސިލަރުންނާ ދެކޮޅަށް ވާހަކަދެއްކެވި ނަމަވެސް ފެންނަން އޮތް ޙަޤީޤަތަކީ އާޒިމް ގެންދަވަނީ މަޤާމުގެ ބޭނުން ނަހަމަ ގޮތުގައި ހިއްޕަވަމުން ކަމެވެ. މީގެ އިތުރުން ކޮރަޕްޝަނުގެ ސީރިއަސް އެތަށް ތުޙުމަތުތަކެއް އާޒިމްގެ މައްޗަށް މިހާރު ދަނީ ކުރެވެމުންނެވެ.
