ތާރީޚީ ހެކިތަކަށް ބެލިނަމަވެސް ފޯޅަވައްސާއި ދިވެހިރާއްޖެއާ ހުރި ގުޅުން މާބޮޑު ކަމަށާއި، އެހެންކަމުން ފޯޅަވަހީގެ ސިޔާދަތީ ބާރު މޮރިޝަސްއަށްވުރެ ބޮޑަށް ޙައްޤުވާނީ ދިވެހިރާއްޖެއަށް ކަމަށް އިނގިރޭސިވިލާތުގެ ސިޔާސީ ޕާޓީއެއް ކަމަށްވާ ރިފޯމް ޔޫކޭގެ ލީޑަރު، ނައިޖަލް ފަރާޖް ވިދާޅުވެއްޖެއެވެ.
ފަރާޖް މި މޭރުމުން ވިދާޅުވީ، އިނގިރޭސިވިލާތުގެ ޤާނޫނު ހަދާ މަޖިލީހުގައި ޗާގޯސް ޙަވާލުކުރުމަށް އިނގިރޭސި ސަރުކާރާއި މޮރިޝަސްއާ ދެމެދު ވެެފައިވާ އެއްބަސްވުމުގެ މައްސަލާގައި ބަހުސްކުރައްވަމުންނެވެ. ފަރާޖް ވިދާޅުވީ ފޯޅަވަހީގެ ސިޔާދަތީ މިލްކުވެރިކަން މޮރިޝަސްއާއި ޙަވާލުކުރުމަށް އިނގިރޭސިވިލާތުގެ ސަރުކާރުން ކުރަމުން އަންނަ މަސައްކަތާ މެދު ރާއްޖެއިން ނުތަނަވަސްވެފައިވާ ކަމަށާއި މޮރިޝަސްގެ ދަޢުވާއަށް ރައްދު ދަޢުވާއެއް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ހުށަހެޅުމަށް ރާއްޖެއިން މިހާރު ތައްޔާރުވަމުން އަންނަ ކަމަށެވެ.
The Leader of Reform Party, Rt Hon @Nigel_Farage states categorically in the House of Commons that the Maldives has a better claim to Chagos than Mauritius. Maldives President @MMuizzu has written about this to the UK Prime Minister. pic.twitter.com/vn7FgAAduT
— Farah Faizal 🎈 (@DrFarahFaizal) February 25, 2026
އިނގިރޭސިވިލާތުގެ ސަރުކާރުން ފޯޅަވަހި މޮރިޝަސްއަށް ދިނުމަށް ވެފައިވާ އެއްބަސްވުމާ ދެކޮޅަށް ވާހަކަދައްކަވަމުން ފަރާޖް ވިދާޅުވީ، ފޯޅަވައްސާއި ދިވެހިރާއްޖެއާ ތާރީޚީ ގޮތުންނާއި ސަޤާފީ ގޮތުންނާއި ޖޯގްރަފީ ގޮތުންވެސް ގުޅުންތައް އޮތް ކަމަށެވެ. ނަމަވެސް ފަރަންސޭސީންގެ އިސްތިޢުމާރުގެ ދުވަސްވަރު އެ ރަށްތަކަށް ކިޔަމުން ދިޔަ ދިވެހި ނަންތައް ބަދަލުކުރި ކަމަށް އޭނާ ވަނީ ފާހަގަކުރައްވައިފައެވެ.
މި ހެކިތަކަށް ބެލިނަމަވެސް ފޯޅަވަހީގެ ސިޔާދަތީ ބާރު ހޯދުމުގެ އެއްވެސް ޙައްޤެއް މޮރިޝަސްގެ މައްޗަށް ނެތް ކަމަށާއި ފޯޅަވަހި ހޯދުމަށް ދަޢުވާ ކުރެވޭނެ ހަމައެކަނި ޤައުމަކީ ދިވެހިރާއްޖެ ކަމަށް ފަރާޖް ވަނީ ވިދާޅުވެފައެވެ.
ފަރާޖް ވަނީ އައިސީޖޭއިން މިކަމުގައި ވަކި ގޮތެއް ނިންމަންދެން، ފޯޅަވަހި މޮރިޝަސްއާއި ހަވާލުކުރުމަށް އިނގިރޭސި ޤާނޫނު ހަދާ މަޖިލީހަށް ހުށަހަޅާފައިވާ ބިލުގެ މަސައްކަތް މަޑުޖައްސާލުމަށް ގޮވާލައްވައިފައެވެ.
