މިވަގުތު ރާއްޖެއަށް އެންމެ ފައިދާ ހުރި ގޮތަކީ އެކްސްޗޭންޖް ރޭޓް ފްލޯޓްކޮށް، ދޫކޮށްލުން ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ނަޝީދު މި މޭރުމުން ވިދާޅުވީ އެކްސްގައި ޙިއްޞާކުރެއްވި ޕޯސްޓެއްގައެވެ. ނަޝީދު ޙިއްޞާކުރެއްވި ކުރެއްވި ޕޯސްޓުގައި ވިދާޅުވީ، ދިވެހި ރުފިޔާ ޑީވެލިއުކޮށް، އެމެރިކާ ޑޮލަރެއް 20 ރުފިޔާއަށް ބޮޑުކުރި ނަމަވެސް، އެ ރޭޓުގައި ބޭންކުތަކުން ޑޮލަރު ނުލިބޭ ނަމަ ކަޅު ބާޒާރު ގަދަޔަށް ހިނގާނެ ކަމަށެވެ.
Dhivehi Rufiya devalue koh, US dollar eh MVR 20/- ah badhalu kurinamaves, e rate gai Bank thakun dollar nulibey nama kalhu baazaaru gadhayah hi’ngaane. Raajje ah rangalhu gothakee exchange rate mulhin float koh, dhookohlun. Dollar ge agakee baazaaruge thabeeathun kanda elhey hama…
— Mohamed Nasheed (@MohamedNasheed) February 25, 2026
ނަޝީދު ވިދާޅުވީ، ރާއްޖޭގެ މިވަގުތުގެ އިޤްތިޞާދީ ޙާލަތަށް ބަލާއިރު އެންމެ ރަނގަޅު ގޮތަކީ އެކްސްޗޭންޖް ރޭޓް މުޅިން ފްލޯޓްކޮށް، ދޫކޮށްލުން ކަމަށެވެ. ޑޮލަރުގެ އަގަކީ ބާޒާރުގެ ޠަބީޢަތުން ކަނޑައެޅޭ ހަމައެކަނި އަގަށް ހެދުމަކީ މިވަގުތަށް ބުއްދިވެރި ގޮތް ކަމުގައި ދެކެވަޑައިގަންނަވާ ކަމަށް ނަޝީދު ޙިއްޞާކުރެއްވި ޕޯސްޓުގައި އިތުރަށް ވަނީ ވިދާޅުވެފައެވެ.
ރާއްޖޭގެ ކަޅު ބާޒާރުގައި އެމެރިކާ ޑޮލަރެއްގެ އަގު މިވަގުތު ހުރީ 20 ރުފިޔާއަށެވެ. ސަރުކާރުން ވަނީ ޑޮލަރުގެ މި މައްސަލަ ޙައްލުކުރުމަށްޓަކައި ބޭރު ފައިސާއާ ބެހޭ ޤާނޫނަށް އިޞްލާޙުތަކެއް ގެނެސް، ވިޔަފާރިތަކުން ރާއްޖެއަށް ވަންނަ ޑޮލަރު ބޭންކުތައް މެދުވެރިކޮށް މާރުކުރަން ލާޒިމްކޮށްފައެވެ. ސަރުކާރުން ގެނައި މި ހެޔޮ ބަދަލުގެ ނަތީޖާވެސް މިހާރު ދަނީ މަޑުމަޑުން ފެންނަމުންނެވެ.
