ތިނަދޫ ސިޓީ މަގުތައް ޒަމާނީ ފެންވަރަކަށް ތަރައްޤީކުރުމުގެ މަޝްރޫޢުގެ ތިންވަނަ ފިޔަވަހީގެ އެއްބަސްވުމުގައި މިއަދު ސޮއިކޮށްފިއެވެ.
ކޮންސްޓްރަކްޝަން މިނިސްޓްރީން ތިނަދޫ ސިޓީ މަގުތައް ތަރައްޤީކުރަން ޙަވާލުކޮށްފައިވަނީ ރޯޑް ޑިވެލޮޕްމެންޓް ކޮޕަރޭޝަން (އާރުޑީސީ) އަށެވެ. ތިނަދޫ ސިޓީގެ މަގުތައް ތަރައްޤީކުރުމުގެ ތިންވަނަ ފިޔަވަހީގެ މަސައްކަތްކުރުމަށް ކޮންސްޓްރަކްޝަން މިނިސްޓްރީން މިއަދު ވަނީ އާރުޑީސީއާއެކު އެއްބަސްވުމެއްގައި ސޮއިކޮށްފައެވެ.
މި އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. ޢަބްދުﷲ މުއްޠަލިބެވެ. އަދި އާރުޑީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އިބްރާހީމް ނަޡީމްއެވެ. މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ އަދި ތިނަދޫ ދެކުނު ދާއިރާގެ މެންބަރު މުޙައްމަދު އަލްސަން އަޙްމަދު ވަނީ ބައިވެރިވެވަޑައިގެންފައެވެ.
ތިނަދޫ ސިޓީ މަގުތައް ޒަމާނީ ފެންވަރަކަށް ތަރައްޤީކުރުމުގެ ތިންވަނަ ފިޔަވަހީގެ ދަށުން، ޖުމްލަ 50 މަގެއްގައި ތާރު އަޅައިގެން ޒަމާނީ ފެންވަރަކަށް ތަރައްޤީކުރުމަށް ވަނީ ހަމަޖެހިފައެވެ. މީގެ އިތުރުން މަގުތަކުގައި ފެން ހިންދާ ނިޒާމުގެ މަސައްކަތްތައްވެސް ކުރުމަށް ވަނީ ހަމަޖެހިފައެވެ.
ތިނަދޫ ސިޓީގެ މަގުތައް ތަރައްޤީކުރުމުގެ ތިންވަނަ ފިޔަވަހީގެ މަސައްކަތް އާރުޑީސީއާއި ޙަވާލުކޮށްފައިވަނީ ޖުމްލަ 140 ދުވަސްތެރޭ ނިންމާ ގޮތަށެވެ. މި މަސައްކަތަށް 341 މިލިއަނެއްހައި ރުފިޔާ ޚަރަދުވާނެ ކަމަށް ކޮންސްޓްރަކްޝަން މިނިސްޓްރީން ލަފާކުރެއެވެ.
