މީސް މީޑިއާގެ އެކި މަންސަތަކުގައި، ވަކިން ޚާއްޞަކޮށް ޓިކްޓޮކްގައި ފާޅުކަން ބޮޑުގޮތެއްގައި އިސްލާމް ދީނަށް ފުރައްސާރަކުރާ މައްސަލައާ ގުޅިގެން ޓިކްޓޮކްގައި މަޝްހޫރު އަޙުމަދު އާމިރު ނުވަތަ ”ބޫގާ“ ހޯދަން ދިވެހި ފުލުހުންގެ ޚިދުމަތުން އިޢުލާންކޮށްފިއެވެ.
އޭނާ ހޯދުމަށް ފުލުހުން މިއަދު ކުރި އިޢުލާނުގައިވާ ބުނެފައިވަނީ، އަޙްމަދު އާމިރު، ހ. ފިލިކުރިގެ / ކ. މާލެ (51އ) ހޯދަން އިޢުލާނުކުރީ މީސް މީޑިއާގެ އެކި މަންސަތަކުގައި އިސްލާމް ދީނަށް ތައުހީނުކޮށް، ދިވެހި ރައްޔިތުންގެ ދީނީ އެއްބައިވަންތަ ކަމަށް ބުރޫއަރާ ފަދަ ވާހަކަތައް ދެއްކުމާއި، އިސްލާމިކް މިނިސްޓްރީ އުވާލުމަށް ގޮވާލައި ވާހަކަ ދައްކާފައިވާ މައްސަލައާ ގުޅިގެން ކަމަށެވެ.
ފުލުހުން ބުނީ ތަޙުޤީޤު ކުރަމުންދާ މައްސަލައެއްގެ ތަޙުޤީޤަށް ހާޒިރުކުރަން ބޭނުންވެ، އުޅޭ ވަކި ތަނެއް ނޭނގުމުގެ ސަބަބުން، ތަޙުޤީޤަށް ހާޒިރުވުމަށް ބޫގާއަށް ޗިޓު ރައްދު ކުރެވިފައިނުވާ ކަމަށެވެ. އެހެންކަމުން އަންނަ މާރިޗު މަހުގެ 10 ވަނަ ދުވަހުގެ ހަވީރު 16:00 އަށް ސަރޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގއަށް އާމިރު ހާޒިރުވުމަށް ފުލުހުން ވަނީ އަންގައިފައެވެ.
”އެކި އެމްވީ“ އަށް އެނގިފައިވާ ގޮތުގައި ބޫގާ މިހާރު ދިރިއުޅެނީ ޖަޕާނު މީހަކާ އިނދެގެން އެ ޤައުމުގައެވެ.
ފާހަގަކޮށްލެވޭ ގޮތުގައި ބޫގާ ދަނީ އިސްލާމް ދީނަށް ފުރައްސާރަކޮށް، އިސްލާމް ދީނުގެ އަސާސްތަކާ ފުށޫއަރާ އެތަށް ވާހަކަތަކެއް ފާޅުގައި ދައްކަމުންނެވެ. އެގޮތުން މުސްލިމް ފިރިހެނުން ޙިތާނުކުރުމަކީ ކޮންމެހެން ކުރަންޖެހޭ ކަމެއްނޫން ކަމަށާއި އެކަމުގެ ސަބަބުން ދިވެހި ފިރިހެނުން ”ނުކުޅެދޭ“ މީހުންނަށް ބަދަލުވެފައިވާ ކަމަށް ބުނެ ހުތުރުކަން ބޮޑު ވާހަކަތަކެއް ވެސް އޭނާ ވަނީ ދައްކައިފައެވެ.
