އިންޑިއާގެ ޖަރްކަންޑްގެ ރާންޗީން ނިއު ދިއްލީއަށް ދަތުރުކުރަމުން ދިޔަ އެއާ އެމްބިއުލްންސެއް ވެއްޓިއްޖެއެވެ. އެ ބޯޓު ވެއްޓުނީ ރޭގެ ވަގުތެއްގައި ޖަރްކަންޑްގެ ޗަތުރާ ޑިސްޓްރިކްޓަށެވެ.
މި ހާދިސާ ހިނގިއިރު ބޯޓުގައި ހަތް މީހަކު ތިއްބެވެ. އެއީ ބަލިމީހާގެ އިތުރުން ޑޮކްޓަރަކާއި ޕެރަމެޑިކް އަކާއި ދެ އެޓެންޑެންޓެއްގެ އިތުރުން، ޕައިލެޓެއްގެ އިތުރުން ކޯ ޕައިލެޓެކެވެ. މި ހާދިސާގައި ބޯޓުން ދަތުރު ކުރި އެންމެން މަރުވެފައިވާކަމަށް މީޑިއާތަކުން ވަނީ ރިޕޯޓުކޮށްފައެވެ.
ދިއްލީގެ ރެޑްބާޑް އެއާވޭސް ޕްރައިވެޓް ލިމިޓެޑުން އޮޕަރޭޓްކުރާ ބީޗްކްރާފްޓް ކިންގް އެއާ ބީއީ9އެލް މަރުކާގެ އެ މަތިންދާބޯޓު ރާންޗީން ފުރީ ރޭ 7:11 ގައެވެ. އިންޑިއާގެ ނޫސް އޭޖެންސީތަކުން ރިޕޯޓް ކޮށްފައިވާ ގޮތުގައި ވެއްޓިފައިވާ މަތިންދާބޯޓު ބައިތަކުން އެނގޭ ގޮތުގައި އެއީ ޓާބޯޕްރޮޕް މަތިންދާބޯޓެކެވެ.
އެ ބޯޓު ދިއްލީއަށް ޖައްސާނެ ކަމަށް އޭރު ލަފާ ކުރި ގަޑިއަކީ ރޭ 10:00 އެވެ. ނަމަވެސް އެ ބޯޓާއި އެއާ ޓްރެފިކް ކޮންޓްރޯލާއި ރޭ 7:34 ގައި ވަނީ ގުޅުން ކެނޑިފައެވެ. އެ ބޯޓު ވެއްޓުނު ޗަތުރާ ޑިސްޓްރިކްޓަކީ އެ ސްޓޭޓުގެ ވެރިރަށް ރާންޗީއާ 130 ކިލޯމީޓަރު ދުރުގައި އޮންނަ ސަރަހައްދެކެވެ.
ޗަޓްރާގެ ސުޕްރިންޓެންޑެންޓް އޮފް ޕޮލިސް އެޗްޓީ އަށް ވިދާޅުވީ ފުލުހުން އެ ސަރަހައްދަށް ގޮސްފައިވާ ކަމަށާއި އެ ހާދިސާއާ ގުޅޭ އިތުރު ތަފްސީލް ފަހުން ހާމަކުރާނެ ކަމަށެވެ.
