އިންޑިއާގެ ބޮޑުވަޒީރު ނަރެންދުރަ މޯދީ ރަސްމީ ދަތުރެއްގައި ކުރިއަށް އޮތް ބުދަ ދުވަހު އިޒްރޭލަށް ދާނެކަން އެ ގައުމުގެ ބޮޑުވަޒީރު ބެންޖަމިން ނަތަންޔާހޫ އިއުލާނުކޮށްފިއެވެ.
މި ދަތުރަކީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް އެޅޭ މުހިންމު ފިޔަވަޅެއްގެ ގޮތުގައި ވަނީ ސިފަކޮށްފައެވެ.
ކެބިނެޓް ބައްދަލުވުމެއް ފަށަމުން ނަތަންޔާހޫ ބުނީ، އިންޑިއާގެ ބޮޑުވަޒީރު ނަރެންދުރަ މޯދީ އިޒްރޭލަށް ގޮސް އެ ގައުމުގެ ގާނޫނު ހަދާ މަޖިލިސް، ސެނެޓުގައި ތަގުރީރު ކުރާނެކަމަށެވެ.
އަދި އެ ތަގުރީރު ކުރާ ވަގުތު މަޖިލީހުގެ ހުރިހާ މެންބަރުން އެތަނުގައި ތިބޭނެ ކަމަށް އުންމީދު ކުރާ ކަމަށްވެސް އޭނާ ބުނެފައިވެއެވެ.
އިންޑިއާ އާއި އިޒްރޭލާ ދެމެދު އޮތް ގުޅުމާ ބެހޭގޮތުން ވާހަކަދައްކަމުން ނަތަންޔާހޫ ބުނީ ދެ ގައުމުގެ ގުޅުމުގެ ފޭރާން މިހާރުވެސް އޮތީ ވަރަށް ބޮޑަށް ވަރުގަދަވެފައި ކަމަށެވެ.
”މި ގުޅުމުގެ ފޭރާން ވަނީ ވަރުގަދަވެފައި. އަދި [މޯދީ] އައުމުން އެއަށް ވުރެ ވެސް ބޮޑަށް ވަރުދަގަވެގެން ދާނެ،“ ނަތަންޔާހޫ ބުނެފައިވެއެވެ.
ނަތަންޔާހޫ އިތުރަށް ފާހަގަކުރިގޮތުގައި އިގްތިސާދީ، ޑިޕްލޮމެޓިކް އަދި ސަލާމަތީ ކަންކަމާ ގުޅުން ހުރި ދާއިރާތަކުން ދެ ގައުމުގެ ދެމެދުގައި އޮތް ގުޅުން އަންނަނީ ދުވަހުން ދުވަހަށް ރަނގަޅުވަމުންނެވެ.
މިއީ ބޮޑުވަޒީރުކަމުގެ މަގާމުގައި ހުރެ މޯދީ އިޒްރޭލަށް ކުރާ ފުރަތަމަ ދަތުރެއް ނޫނެވެ. މީގެ ކުރިން 2017 ވަނަ އަހަރުވެސް މޯދީ ވަނީ އިޒްރޭލަށް ރަސްމީ ދަތުރެއް ކޮށްފައެވެ. އަދި އޭގެ ކުރީ އަހަރު ބެންޖަމިން ނަތަންޔާހޫ ވަނީ އިންޑިއާއަށް ޒިޔާރަތްކޮށްފައެވެ.
