އެއްފަހަރު ބޭނުންކޮށްފައި ހުންނަ ފުޅީގައި ކާބޯތަކެތި ބަންދުކޮށްފައި ހުންނަކަން ފާހަގަކުރެވިފައިވާތީ އެކަން އެގޮތަށް ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އެދިއްޖެއެވެ.
މި މައްސަލައާ ގުޅިގެން އެމްއެފްޑީއޭއިން ނެރެފައިވާ ނޫސްބަޔާނެއްގައި ބުނެފައިވަނީ، ކާބޯތަކެތީގެ ވިޔަފާރިކުރާ ފަރާތްތަކުން، ބޯފެނާއި ލުއި ބުއިންތައް ހުސްކޮށްފައިވާ ފުޅިތަކުގައި ކާބޯތަކެތި ބަންދުކޮށް ވިޔަފާރީގައި ބޭނުންކުރަމުންދާކަން އެ އޮތޯރިޓީއަށް މި ފަހަކަށް އައިސް ފާހަގަކުރެވިފައިވާ ކަމަށެވެ.
މި ފުޅިތަކަކީ އެއްފަހަރު ބޭނުންކޮށްފައި އުކާލާ ގޮތަށް ވަކި ވައްތަރެއްގެ ޕްލާސްޓިކް ބޭނުންކޮށްގެން ތައްޔާރުކޮށްފައިވާ ފުޅިތަކެއް ކަމަށާއި މިއީ ހަމައެކަނި ވަކިކަހަލަ އުފެއްދުންތަކަކަށް ބޭނުންކުރެވޭ ޕްލާސްޓިކްގެ ބާވަތެއް ކަމަށް އެމްއެފްޑީއޭގެ ނޫސްބަޔާނުގައި ވަނީ ބުނެފައެވެ.
ނަމަވެސް، ބާޒާރުގައި ތަފާތު އެކި ބާވަތްތަކުގެ ބުއިންތައް މި ފުޅީގައި ބަންދުކޮށްފައި ހުންނަކަން ފާހަގަކުރަމުން އެމްއެފްޑީއޭއިން ބުނެފައިވަނީ، މިކަމުގެ ސަބަބުން ޕްލާސްޓިކްގެ އަސަރު ކާބޯތަކެއްޗަށް ކުރުވައި، އޭގެ ޒަރީޢާއިން އިންސާނުންގެ ޞިއްޙަތަށް ނޭދެވޭ އަސަރުކުރުމުގެ ފުރުޞަތު ވަރަށް ބޮޑު ކަމަށެވެ.
މިކަން މިހެން އޮތުމާއެކު މިފަދަ އެއްފަހަރު ބޭނުންކޮށްފައި ހުންނަ ފުޅީގައި ކާބޯތަކެތި ބަންދު ނުކުރުމަށް އެމްއެފްޑީއޭއިން ވަނީ އެދިފައެވެ.
