އެމްބިއުލާންސަކަށް ޖާގަނުދީ މަގު ބަންދުކޮށްގެން ޕިކަޕަކުން މުދާ ބޭލި މައްސަލައެއް ޓްރާންސްޕޯރޓް މިނިސްޓްރީން ބަލަން ފަށައިފިއެވެ.
މީސް މީޑިއާގައި މިހާރު ދައުރުވަމުން އަންނަ ވީޑިއޯއަކުން ފެންނަ ގޮތުގައި، ހަނި ގޯޅިއަކުން ސައިރަން އަޅަމުން ދުއްވާފައި ދިޔަ އެމްބިއުލާންސަކަށް ތަން ނުދީ ކުޑަ ޕިކަޕެއް ފިހާރައެއް ކައިރީ މަޑުކޮށްގެން މުދާ ބާލަމުންދިޔަ މަންޒަރު ފެނެއެވެ. މުދާ ބޭލުމަށް ފަހު ޕިކަޕް ދުއްވާލީ ކުޑައިރުކޮޅެއް ފަހުންނެވެ.
މި މައްސަލައާ ގުޅިގެން ޓްރާންސްޕޯރޓް މިނިސްޓްރީން މިއަދު ބުނެފައިވަނީ މިކަން ހިނގާފައިވާ ގޮތް ބެލުމަށް ފަހު ފިޔަވަޅު އަޅަންޖެހޭ ނަމަ، މިނިސްޓްރީން އެ ފަރާތަކާ މެދު ފިޔަވަޅު އަޅާނެ ކަމަށެވެ.
ކާރު ބާރު ބޮޑު މާލޭގެ ހަނި ގޯޅިތަކުގައި، މަގުތައް ބަންދުކޮށްގެން ފިހާރަތަކަށް މުދާ ބޭލުމަކީ ވަރަށް ބޮޑަށް ޢާންމުވެފައިވާ މައްސަލައެކެވެ.
