މާލޭގެ ބާޒާރުތަކުގައި އޮރެންޖުގެ އަގުތައް އުފުލިއްޖެއެވެ.
އެގޮތުން މިއަދު މާލޭގެ ބައެއް ފިހާރަތަކުން އޮރެންޖެއް ލިބެން ހުރީ 12 ރުފިޔާއަށެވެ. މިއީ އެސްޓީއޯގެ އައުޓްލެޓްތަކުން އޮރެންޖު ލިބޭ އަގަށްވުރެ ދެގުނަ ބޮޑު އަދަދެކެވެ. އެގޮތުން އެސްޓީއޯގެ އައުޓްލެޓްތަކުން އޮރެންޖު ކިލޯއެއް ވިއްކަނީ 40 ރުފިޔާއަށެވެ. އެއީ އޮރެންޖެއް 6 ރުފިޔާގެ މަގުންނެވެ.
ރަމަޟާން މަސް ފެށުމުގެ ކުރިންވެސް މާލޭގެ ބައެއް ފިހާރަތަކުން އޮރެންޖުގެ އަގުތައް ވަނީ އުފުލިފައެވެ. ރަމަޟާން މަސް ފެށުމުގެ ކުރިން އެސްޓީއޯ އިން އޮރެންޖު ޝިޕްމަންޓެއް ގެނެސްފައިވާއިރު، ރަމަޟާން މަސް ނިމުމާ ހަމައަށްވެސް އޮރެންޖެއްގެ އަގު 6 ރުފިޔާއަށް ވުރެ ބޮޑު ނުވާނެ ކަމުގެ ޔަޤީންކަން އެސްޓީއޯއިން ވަނީ ދީފައެވެ.
މީގެ އިތުރުން އެސްޓީއޯއިން ވަނީ އަސާސީ ކާބޯތަކެތީގެ ގޮތުގައި ކަނޑައަޅާފައިވާ 26 ބާވަތް ވިއްކާނެ ރީޓެއިލް އަގުތައް ޢާންމުކޮށްފައެވެ. އެހެންކަމުން އެ ތަކެތީގެ އަގުތައް އޮންލައިންކޮށް ވަގުތުން މިހާރު ބަލައިލެވޭނެއެވެ.
އެސްޓީއޯ އިން ވިއްކާ އަސާސީ ކާބޯތަކެތީގެ އަގުތައް ބައްލަވާލެއްވުމަށް: https://t.co/38BXXefnfW#RoadhaThayyaaru1447 pic.twitter.com/1xW20sf909
— Ministry of Economic Development and Trade (@MoEDmv) February 21, 2026
އެސްޓީއޯ އިން ޢާންމުކުރި ލިސްޓުގައި ހިމެނޭ ކާބޯތަކެތީގެ އަގުތަކަކީ:
މޭވާގެ ބާވަތްތައް (ކިލޯއަކުން):
- ދޮންކެޔޮ: 30 ރުފިޔާ
- ފެހި އާފަލު: 40 ރުފިޔާ
- ރަތް އާފަލު: 42 ރުފިޔާ
- އޮރެންޖު: 40 ރުފިޔާ
- ކަރާ: 17 ރުފިޔާ
- ލުނބޯ: 22 ރުފިޔާ
- ފެޝަން ފުރުޓް: 104 ރުފިޔާ
- އަނބު: 120 ރުފިޔާ
ތަރުކާރީގެ ބާވަތްތައް (ކިލޯއަކުން):
- ފިޔާ: 12 ރުފިޔާ
- އަލުވި: 14 ރުފިޔާ
- ކެރެޓް: 37 ރުފިޔާ
- ކޮޕީފަތް: 75 ރުފިޔާ
- ލޮނުމެދު: 35 ރުފިޔާ
- އިނގުރު: 30 ރުފިޔާ
- ކެބެޖު: 19 ރުފިޔާ
- ބަށި: 57 ރުފިޔާ
މީގެ އިތުރުން، ބިހެއް 2 ރުފިޔާއަށް، މުގު ކިލޯއެއް 42 ރުފިޔާއަށް އަދި ކާށި ކިލޯއެއް 25 ރުފިޔާއަށް އެސްޓީއޯ އިން ލިބޭނެއެވެ.
ހަނޑޫ، ހަކުރު އަދި ފުށުގެ އިތުރަށް އަސާސީ ކާބޯތަކެތީގެ ލިސްޓަށް 23 ބާވަތެއް އިތުރުކޮށް އެސްޓީއޯ އިން ހެޔޮއަގުގައި ވިއްކަން ފެށީ މިދިޔަ 2025 ވަނަ އަހަރުގެ އޮކްޓޫބަރު މަހުގެ 15 ވަނަ ދުވަހުއެވެ. އެ ދުވަހުން ފެށިގެން ހެޔޮ އަގުގައި އެސްޓީއޯގެ އެކި އައުޓްލެޓްތަކުން އަންނަނީ މި ބާވަތްތައް ރީޓެއިލްކޮށް ވިއްކަމުންނެވެ.
