މިދިޔަ ޑިސެމްބަރު މަހު، ރެޑްވޭވް ޕްލާޒާއިން، ނެސްކެފޭ ކްލެސިކް ކޮފީ ފުޅިއެއް ވަގަށް ނެގި މީހަކު 32،000 ރުފިޔާއިން ޖޫރިމަނާ ކޮށްފިއެވެ. މި މައްސަލައިގައި ޖޫރިމަނާކޮށްފައިވަނީ ށ. ކޮމަންޑޫ މީހެއްގެ މައްޗަށެވެ.
މި މައްސަލަ ކްރިމިނަލް ކޯޓުން ނިންމި ގޮތުގެ ރިޕޯޓުން އެނގޭ ގޮތުގައި، އެ މީހާ ވަނީ ރެޑްވޭވް ޕްލާޒާއިން 175 ރުފިޔާގެ ކޮފީ ފުޅިއެއް ވަގަށް ނަގައި، އޭނާގެ ޓީޝާޓު ތެރެއަށްލައި ފޮރުވައިގެން ފައިސާ ނުދައްކައި ފިހާރައިން ނުކުމެގެން ދާން މަސައްކަތް ކޮށްފައެވެ.
އެމައްސަލައިގައި އޭނާގެ މައްޗަށް ދައުލަތުން އުފުލާފައިވަނީ އެހެން މީހެއްގެ މުދަލަށް ހުއްދަ ނޫން ގޮތުގައި ބާރު ހިންގުމުގެ ކުށުގެ ދައުވާއެވެ.
އެމައްސަލައިގެ ޝަރީއަތުގައި އޭނާ ވަނީ ކުށަށް އިއުތިރާފުވެ، ލުއި އަދަބެއް ދިނުމަށް އެދިފައެވެ. އެދައުވާއާއި ގުޅިގެން އޭނާގެ މައްޗަށް ފަސް މަހުގެ ޖަލު ހުކުމެއް އައިނަމަވެސް، މައްސަލަ ބެއްލެވި ގާޒީ ޖަލު ހުކުމް، ޖޫރިމަނާގެ އަދަބަކަށް ބަދަލުކޮށްފައެވެ.
އެހެން ކަމުން 175 ރުފިޔާގެ ކޮފީ ފުޅީގެ ބަދަލުގައި އޭނާ ދައުލަތަށް 32،800 ރުފިޔާ ދެއްކުމަށް ވަނީ ހުކުމް ކޮށްފައެވެ.
މި މައްސަލަ ކްރިމިނަލް ކޯޓަށް ހުށަހަޅާފައި ވަނީ މި އަހަރުގެ ޖަނަވަރީ މަހުގެ 28 ވަނަ ދުވަހުއެވެ. މި މައްސަލަ ނިންމާފައި ވަނީ މި މަހުގެ 12 ވަނަ ދުވަހުއެވެ.
