ރިޔާސީ އިންތިޚާބާއި މަޖިލިސް އިންތިހާބު އެއްފަހަރާ ބޭއްވުމަށް ނުފެންނަ ކަމަށް އެމްޑީޕީގެ ޤައުމީ މަޖިލީހުން ފާސްކޮށްފިއެވެ.
ރައްޔިތުންގެ މަޖްލީހުގެ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް ކުރެއްވި ޕޯސްޓެއްގައި ވިދާޅުވީ 2 އިންތިޚާބު އެއްކޮށްލަން ނުފެންނަ ކަމަށް އެމްޑީޕީގެ ޤައުމީ މަޖްލީހުން ފާސްކޮށްފައިވާ ކަމަށެވެ.
މިއާއިއެކު މީކާއިލް ވަނީ އެ ބަދަލަކީ އަވަސް އަރުވާލައިގެން ސަރުކާރުން ކުރިއަށް ގެންދާ ކަމެއް ކަމަށާއި، އެ ވޯޓާއި ބެހޭގޮތުން އެކަށީގެންވާ ވަރަށް އާންމުން ހޭލުންތެރި ނުކުރެވޭ ކަމަށެވެ. އަދި މިއީ ރައީސް މުޢިއްޒުގެ ރިޔާސީ ދައުރު ދިގު ދަންމާލަން ކުރާ ކަމެއްގެ ގޮތުގައި އެމްޑީޕީން ޤަބޫލުކުރާ ކަމަށް މީކާއިލް ވިދާޅުވިއެވެ.
MDP National Council passes resolution to vote NO to hold presidential & parliamentary elections together.
MDP believes the process is rushed, no adequate time to create public awareness on the pros and cons, and sees this as a pathway for Muizzu to extend his term.#VoteNO
— Meekail Naseem (@MickailNaseem) February 19, 2026
ދެ އިންތިޚާބު އެއްކޮށްލުމަށް ޤާނޫނުއަސާސީއަށް ގެންނަންޖެހޭ ބަދަލުތައް ގެނެވޭނީ ރައްޔިތުންގެ ޢާންމު ވޯޓަކުން އެކަމަށް އަޣުލަބިއްޔަތު ލިބިގެންނެވެ. އެހެންކަމުން ކުރިއަށް އޮތް ލޯކަލް ކައުންސިލްތަކުގެ އިންތިޚާބާއެކު އެ ވޯޓު ނެގުމުގެ މަސައްކަތްކުރުމަށް އަންނަނީ މަސައްކަތްތަކެއް ކުރަމުންނެވެ.
ފާހަގަކޮށްލެވޭ ގޮތުގައި ދެ އިންތިޚާބު އެއްކޮށް ބޭއްވުމަށް ސަރުކާރުން ނިންމި ނިންމުމާ ގުޅިގެން އިދިކޮޅު އެމްޑީޕީން އަންނަނީ އެތަކެއް ތުހުމަތުތަކެއް ކުރަމުންނެވެ. އެގޮތުން ދެ އިންތިޚާބު އެކުގައި ބާއްވަން ސަރުކާރުން މަސައްކަތްކުރަނީ ވޯޓުން ވައްކަން ކުރަން ކަމަށްވެސް އެމްޑީޕީން އަންނަނީ ބުނަމުންނެވެ. ނަމަވެސް މީގެ ކުރިން ޞާލިޙް ވެސް ވިދާޅުވެފައިވަނީ ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބުގެ އިތުރުން ލޯކަލް ކައުންސިލްތަކުގެ އިންތިޚާބު އެކުގައި ބޭއްވުމަކީ އެންމެ ރަނގަޅު ގޮތް ކަމަށްވާތީ ތިން އިންތިޚާބު އެކުގައި ބޭއްވުމަށް ފެނިވަޑައިގަންނަވާ ކަމަށެވެ.
