ހުޅުމާލެ ދާއިރާގެ ކުރީގެ ކައުންސިލަރު އަދި 20 ވަނަ ރައްޔިތުންގެ މަޖްލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު، މާލޭސިޓީގެ މޭޔަރު އާދަމް އާޒިމްއަށް 100 އަކުން ސުމެއް ދެއްވައިފިއެވެ.
މެންބަރު ޝުޖާއު އާދަމް އާޒިމްއަށް ބަހުގެ ހަމަލާތަކެއް ދެއްވާފައިމިވަނީ، ސިޓީކައުންސިލްގެ ބެލުމުގެ ދަށުގައިވާ މިސްކިތްތަކުގެ މަރާމާތު ނުނިމިވަނިކޮށް، ރައީސް ޑރ. މުޢިއްޒުގެ ވަޢުދާ އެއްގޮތަށް ރަމަޟާން މަހުގެ ކުރިން 4 މިސްކިތެއް އޭސީކުރުމާއިއެކު އެކަން ފާހަގަ ކުރައްވާ ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
ރައީސްގެ ވަޢުދާއި އެއްގޮތަށް ރޯދައަށް މިސްކިތްތައް ނިންމި ކަމަށް ”އެކިއެމްވީ“ އިން ލިޔެފައިވާ ޚަބަރު ހިއްސާކުރައްވަމުން ޝުޖާއު ވަނީ މޭޔަރު އާޒިމްގެ ބެލުމުގެ ދަށުގައިވާ ޤުއްބު މިސްކިތް ނުނިންމާ ހުރުމުން ފާޑުވިދާޅުވެފައެވެ.
ރައީސް ޑރ @MMuizzu ގެ ވަޢުދާ އެއްގޮތަށް މިސްކިތްތައް ރޯދަމަހަށް ނިމިއްޖެ.@MaleCitymv މޭޔަރަށް ހުޅުމާލެ އާލްސާނީ މިސްކިތް (ގުއްބު މިސްކިތް) ނުނިންމުނު.މިރޭވެސް ހުޅުމާލެ ރައްޔިތުން އާލްސާނީ (ގުއްބު މިސްކިތުގައި) ތަރާވީޚް ނަމާދު ކުރީ މިސްކިތުގެ ނެވިލޯނު އަޅާ ނުނިމެނީސް.100 އަކުން 0… https://t.co/E65heK2gFV
— Ibrahim Shujau (@IbrahimShujaau) February 18, 2026
ޝުޖާއު ވިދާޅުވީ ރައީސް މުޢިއްޒުގެ ވައުދާއި އެއްގޮތަށް މިސްކިތްތައް ރޯދައަށް ނިމުނު ނަމަވެސް މޭޔަރު އާޒިމްއަށް ހުޅުމާލެ ޤުއްބު މިސްކިތް ނުނިންމުނު ކަމަށާއި، ހުޅުމާލޭގެ ރައްޔިތުން އެ މިސްކިތުގައި ތަރާވީޙް ކުރީ ނޮވިލޯންވެސް އަޅާ ނުނިމެނީސް ކަމަށެވެ. އެހެންކަމުން އާޒިމަށް ދެވޭނީ 100 އަކުން ސުމެއް ކަމަށް ޝުޖާއު ވިދާޅުވިއެވެ.
”ރައީސް ޑރ. މުޢިއްޒުގެ ވަޢުދާ އެއްގޮތަށް މިސްކިތްތައް ރޯދަމަހަށް ނިމިއްޖެ. މާލެސިޓީގެ މޭޔަރަށް ހުޅުމާލެ އާލްސާނީ މިސްކިތް (ގުއްބު މިސްކިތް) ނުނިންމުނު. މިރޭވެސް ހުޅުމާލެ ރައްޔިތުން އާލްސާނީ (ގުއްބު މިސްކިތުގައި) ތަރާވީޙް ނަމާދު ކުރީ މިސްކިތުގެ ނެވިލޯނު އަޅާ ނުނިމެނީސް. 100 އަކުން 0 އިނގޭތޯ“ ޝުޖާއު ވިދާޅުވިއެވެ.
ރަމަޟާން މަހަށް މާލޭގެ މިސްކިތްތައް އާބާތުރަ ފިލުވުމަކީ ރައީސް ޑރ. މުޢިއްޒުގެ މޭޔަރު ކަމުގައި ދުރާލާ ކުރެއްވި ކަމެއްކަން ފާހަގަކުރައްވާ ޝުޖާއު ވަނީ ރައީސް މުޢިއްޒުގެ ވެރިކަމުގައި 65 ދުވަހުން ބޮޑުތަކުރުފާނު މަގުގެ ތާރު އަޅާ ނިންމާލިއިރުވެސް، 1 އަހަރުން މޭޔަރު އާޒިމްއަށް މިސްކިތެއްގައި ތަށިމުށި ޖަހާ ނެވިލޯން ނޭޅުނުކަމަށާއި، މިއީ މާލެސިޓީގެ ރައްޔިތުން ވިސްނާލަން ޖެހޭ ކަމެއްކަމަށް ވިދާޅުވެފައެވެ.
”ރައީސް މުޢިއްޒު މާލޭގެ ބޮޑު މަގެއްގަ ތާރުއަޅާ ނިންމައިފި 65 ދުވަހުން. މާލެ ސިޓީ މޭޔަރަށް މިސްކިތެއްގަ ޓައިސް ޖަހާ ނެވިލޯނު ނޭޅޫނު 1 އަހަރުން. މިއީ މާލޭގެ ރައްޔިތުން ވިސްނާލަން ޖެހޭ ކަންކަން“ ޝުޖާއު ވިދާޅުވިއެވެ.
މިސްކިތުގެ މައި ހޯލުގައި 800 މީހުންނަށްވުރެ ގިނަމީހުންނަށް ނަމާދު ކުރެވޭ މިސްކިތްތަކުގެ މައި ހޯލާއި އަންހެނުން ނަމާދުކުރާ ބައި އޭސީ ކުރުމަށް ސަރުކާރުން ފެއްޓެވި މަޝްރޫޢުގެ ދަށުން މާލޭގައި ހުރި ހަތަރު މިސްކިތެއްގެ މައި ހޯލާއި އަންހެނުން ނަމާދުކުރާ ބައި ބަރަކާތްތެރި ރަމަޟާން މަސް ފެށުމުގެ ކުރިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މިއަހަރުގެ ރިޔާސީ ބަޔާނުގައި ވިދާޅުވެފައިވާ ގޮތަށް އޭސީކޮށް މިވަނީ ނިންމާލާފައެވެ.
މި ހަތަރު މިސްކިތް އޭސީކޮށް މިހާރު ނިންމައި ވަނީ ބޭނުންކުރަން ފަށާފައެވެ. އެ މިސްކިތްތަކަކީ، ފުރުޤާން މިސްކިތް، ޖަލާލުއްދީން މިސްކިތް، ވިޔަފާރިވެރިންގެ މިސްކިތް އަދި ހުޅުމާލެ ޢުމަރު ބިން ޚައްޠާބު މިސްކިތެވެ.
މިސްކިތްތައް މަރާމާތުކޮށް އެތަންތަނުގެ އާބާތުރަ ފިލުވުމަކީ ސަރުކާރުން ވަރަށް ބޮޑު އަހައްމިއްޔަތުކަމެއް ދީގެން ކުރަމުން އަންނަ މަސައްކަތްތަކެއްކަން ފާހަގަކޮށްލެވެއެވެ.
