ރަމަޟާން މަހާ ދިމާކޮށް ހުޅުމާލޭ ފުރުތަމަ ފިޔަވަހީގައި އެސްޓީއޯ ޕީޕަލްސް ޗޮއިސްގެ އައު އައުޓްލެޓެއް ހުޅުވައިފިއެވެ.
ހުޅުމާލެ ފޭސް 1 ގައި ހުންނަ ރެއިން ކޮރަލް ރެޒިޑެންސް ޢިމާރާތުގައި ޤާއިމުކޮށްފައިވާ އެސްޓީއޯގެ އައުޓްލެޓް ހުޅުއްވައިދެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ. ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 08:30 އިން ފެށިގެން ރޭގަނޑު 22:00 އާއި ހަމައަށް އަދި ހުކުރު ދުވަހުގެ ހަވީރު 16:00 އިން ފެށިގެން ރޭގަނޑު 22:00 އާއި ހަމައަށް އެ އައުޓްލެޓް ހުޅުވިފައި ހުންނާނެއެވެ.
އެސްޓީއޯގެ މި އައުޓްލެޓުން އަސާސީ ކާބޯތަކެތީގެ ގޮތުގައި އިކޮނޮމިކް މިނިސްޓްރީން ކަނޑައަޅާފައިވާ ހުރިހާ ތަކެއްޗެއް ރީޓެއިލްކޮށް ލިބެން ހުރިއިރު، ކުރިއަށް އޮތްތަނުގައި ވިޔަފާރިވެރިންނަށް ވެސް ހޯލްސޭލްކޮށް މި ތަކެތި ދޫކުރަން ފަށާނެ ކަމަށް އެސްޓީއޯއިން ބުންޏެވެ. އެސްޓީއޯ ޕީޕަލްސް ޗޮއިސްގެ އައު އައުޓްލެޓެއް ހުޅުމާލޭގައި ހުޅުވަން ނިންމީ ގިނަ ބައެއްގެ އެދުމުގެ މަތިން ކަމަށް އެ ކުންފުނިން ވަނީ ހާމަކޮށްފައެވެ.
މީގެ އިތުރުން އިކޮނޮމިކް މިނިސްޓްރީން ކަނޑައަޅާފައިވާ އަސާސީ ކާބޯތަކެތީގެ 26 ބާވަތާއި، މަޝްހޫރު ބްރޭންޑްތައް ކަމަށްވާ ހިޓާޗީ، އެލްޖީ އަދި ފިލިޕްސް ބްރޭންޑުގެ ގޭތެރެއަށް ބޭނުންވާ އެކިއެކި ސާމާނުވެސް މި އައުޓްލެޓުން ލިބެން ހުންނާނެ ކަމަށް އެސްޓީއޯއިން ވަނީ މަޢުލޫމާތު ދީފައެވެ.
އިކޮނޮމިކް މިނިސްޓްރީން އަސާސީ ކާބޯތަކެތީގެ ގޮތުގައި ކަނޑައަޅާފައިވާ ތަކެތި ހެޔޮ އަގުތަކެއްގައި ޢާންމުންނަށް ފޯރުކޮށްދޭނެ ކަމުގެ ފުރިހަމަ ޔަޤީންކަން އެސްޓީއޯއިން ވަނީ ދީފައެވެ.
