”ހޭންޑީ“ ބްރޭންޑުގެ ބިއްލޫރި ފުޅީގައި ބަންދުކޮށްފައިވާ ފެން ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އަންގައިފިއެވެ.
އެމްއެފްޑީއޭއިން ނެރުނު ނޫސްބަޔާނެއްގައި ބުނެފައިވަނީ، ހޭންޑީ ވޯޓަރ ބޮޓްލިންގ ޕްލާންޓުން އުފައްދާ ’ހޭންޑީ‘ ބްރޭންޑުގެ ބިއްލޫރި ފެން ފުޅިތަކުން ބޯފެނުގައި ހުރެގެން ނުވާނެ ފަދަ ޖަރާސީމުގެ އަސަރުތައް ފެނިފައިވާ ކަމަށެވެ. އެގޮތުން ޖަރާސީމުގެ އަސަރު ފެނިފައިވަނީ ’ހޭންޑީ‘ ބްރޭންޑުގެ 330 އެމްއެލް، 500 އެމްއެލްގެ އިތުރުން 1 ލީޓަރުގެ ބިއްލޫރި ފެން ފުޅިތަކުން ކަމަށް އެ އޮތޯރިޓީން ވަނީ ބުނެފައެވެ.
— MFDA (@MFDA_mv) February 17, 2026
އެމްއެފްޑީއޭއިން ބުނީ، ފެންފުޅިތަކުގެ ތަޙުލީލު ނަތީޖާ ދައްކާގޮތުން، އެ ފެނަކީ ދުނިޔޭގެ ޞިއްޙަތު ޖަމުޢިއްޔާ (ޑަބްލިއުއެޗްއޯ) އިން ކަނޑައަޅާފައިވާ ބޯފެނުގެ މިންގަނޑަށް ފެތޭ ފެނެއް ނޫންކަމަށެވެ. އެހެންކަމުން، އެ އޮތޯރިޓީން ވަކި ގޮތެއް އަންގަންދެން އެ ބްރޭންޑުގެ ބިއްލޫރި ފުޅިތަކުގައި ބަންދުކޮށްފައިވާ ފެން ބޭނުން ނުކުރުމަށް އެމްއެފްޑީއޭއިން ވަނީ އިލްތިމާސްކޮށްފައެވެ.
މިކަމާ ގުޅޭގޮތުން އިތުރު މަޢުލޫމާތު ސާފުކުރުމަށް ބޭނުންވާ ފަރާތްތަކުން އެ އޮތޯރިޓީގެ ނަންބަރު 3034213 ނުވަތަ 7603204 އަށް ގުޅުއްވައި މަޢުލޫމާތު ސާފުކުރުމަށް ވަނީ އެދިފައެވެ.
