ކުރިއަށް އޮތް ރަމަޟާން މަހަށް ހުޅުމާލޭ ގްރޭންޑް މިސްކިތް ނުވަތަ މަސްޖިދު އަލް ޝެއިޙް ޤާސިމް ބިން އާލްޘާނީގެ މަރާމާތުގެ މަސައްކަތްތައް ނުނިމި ހުރުމުން ބާރަށު ދާއިރާގެ މެންބަރު އިބްރާހިމް ޝުޖާއު ކަންބޮޑުވުން ފާޅުކުރައްވައިފިއެވެ.
އެ މިސްކިތުގެ މަރާމާތުގެ މަސައްކަތްތައް ނުނިމި ހުރުމުގެ ކަންބޮޑުވުން ޝުޖާއު ފާޅުކުރެއްވީ، މާލޭ ސިޓީ ކައުންސިލުން އެކްސްގައި ޙިއްޞާކުރި ޕޯސްޓަކަށް ރިޕްލައިކުރައްވަމުންނެވެ. މާލޭ ސިޓީ ކައުންސިލުގެ އެ ޕޯސްޓުގައި ވަނީ ބޮޑުތަކުރުފާނު މަގުގެ ދެވަނަ ސެގްމަންޓްގެ މަސައްކަތް އެއްކޮށް ނިމުމުން އެ ސަރަޙައްދު ބައްލަވާލެއްވުމަށް މާލޭ ސިޓީގެ މޭޔަރު އާދަމް އާޒިމް ވަޑައިގަތް ކަމަށެވެ.
ހުޅުމާލެ ރަސްމީ ބޮޑު މިސްކިތް އާލްސާނީ (ގުއްބު މިސްކިތް)ބަރަކާތްތެރި ރަމަޟާން މަހަށް މަރާމާތުކޮށް ނުނިމިއޮތުމަކީ ވަރަށް ހިތާމަކުރާ ކަމެއް.މިއީ ރައީސް ޑރ @MMuizzu ގެ މޭޔާރ ކަމުގައި ވަރަށް އިސްކަންދެއްވާ މަސައްކަތްޕުޅެއް.
ރަމަޟާން މަހަށް މިސްކިތްތައް އާބާތުރަ ފިލުވުމުމުގެ… https://t.co/mIuz8QMqu0— Ibrahim Shujau (@IbrahimShujaau) February 17, 2026
މާލޭ ސިޓީ ކައުންސިލުގެ އެ ޕޯސްޓަށް ރައްދު ދެއްވަމުން ޝުޖާއު ވިދާޅުވީ، ހުޅުމާލެ ރަސްމީ ބޮޑު މިސްކިތް ކަމަށްވާ އާލްޘާނީ މިސްކިތް ބަރަކާތްތެރި ރަމަޟާން މަހަށް މަރާމާތުކޮށް ނުނިމި އޮތުމަކީ ވަރަށް ހިތާމަކުރާ ކަމެއް ކަމަށެވެ. މާލޭ ސަރަޙައްދުގެ ހުރިހާ މިސްކިތްތަކެއް މަރާމާތުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާލޭ ސިޓީގެ މޭޔަރު ކަމުގައި ހުންނެވި ދުވަސްވަރު ވަރަށް ބޮޑު އަހަންމިއްޔަތު ކަމެއް ދެއްވައިގެން ކުރައްވާ މަސައްކަތެއް ކަމުގައި ޝުޖާއު ފާހަގަކުރެއްވިއެވެ.
ރަމަޟާން މަހަށް މިސްކިތްތައް މަރާމާތުކުރުމުގެ މަސައްކަތަކީ ދުރާލާ މިސްކިތްތަކުގައި ހުރި މައްސަލަތައް ދެނެގަނެ އެކަންކަން ޙައްލުކުރުން ކަމަށް ޝުޖާއުގެ ޕޯސްޓުގައި ވަނީ ވިދާޅުވެފައެވެ. ޝުޖާއުގެ ޕޯސްޓުގައި އިތުރަށް ވިދާޅުވީ، އާލްޘާނީ މިސްކިތަކީ ހުޅުމާލޭގެ ރަމްޒު ކަމަށްވީ ހިނދު، އެ މިސްކިތައް ފަރުވާ ކުޑަކޮށްގެން ނުވާނެ ކަމަށެވެ.
ޝުޖާއު މި މޭރުމުން ވިދާޅުވެފައިވާއިރު، އާދަމް އާޒިމްގެ މޭޔަރުކަމުގައި މާލޭ ސިޓީގެ މަރާމާތުކުރަންޖެހޭ އެތަށްތަނެއްގެ މަރާމާތުގެ މަސައްކަތް ނުހިނގާ ވީރާނާވުމަށް ވަނީ ދޫކޮށްލައިފައެވެ. އެގޮތުން އެންމެ ފާހަގަކޮށްލެވޭ ތަންތަނަކީ ސިނަމާލެ އަދި މާލޭ ހިޔާގެ ފްލެޓްތަކެވެ. މަރާމާތުގެ މަސައްކަތްތައް ނުހިނގައި ގިނަ ދުވަސްތަކެއްވުމުގެ ސަބަބުން އެތަންތަނުގެ ޙާލަތު މިހާރު ވަނީ ވަރަށް ބޮޑަށް ދަށަށް ގޮސްފައެވެ.
