ކެއްކުމަށް ބޭނުންކުރާ ގޭސް ލިބުމަށް ދިމާވި ދަތިތައް މިހާރު ޙައްލުކުރެވިފައިވާ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ހާމަކޮށްފިއެވެ.
އެސްޓީއޯއިން ބުނީ ކެއްކުމަށް ބޭނުންކުރާ ގޭސް ލިބުމަށް ދިމާވި ދަތިތައް މިހާރު އެއްކޮށް ޙައްލުކުރެވިފައިވާ ކަމަށާއި، މިއަދުން ފެށިގެން 10 ކިލޯގެ ގޭސް ފުޅި ގަންނަން ލިބޭނެ ކަމަށެވެ.
އެސްޓީއޯއިން ބުނީ، ދުނިޔޭގެ ބާޒާރުގައި ސަޕްލައިކުރުމަށް އެރި ލޮޅުންތަކުގެ ސަބަބުން އެސްޓީއޯގެ ސަބްސިޑަރީ ކުންފުނިކަމަށްވާ މޯލްޑިވްސް ގޭސް މެދުވެރިކޮށް ވިއްކަމުންދިޔަ 10 ކިލޯގެ ގޭސް ފުޅީގެ ބަދަލުގައި ޑިސްކައުންޓް ރޭޓުތަކެއްގައި ވިއްކަމުން ދިޔައީ ހަތް ކިލޯގެ ގޭސް ފުޅި ކަމަށެވެ.
ނަމަވެސް އެ މައްސަލަ މިހާރު ޙައްލުކުރެވިފައިވާކަން ފާހަގަކުރަމުން އެސްޓީއޯއިން ބުނެފައިވަނީ ކުރިއަށް އޮތް ރަމަޟާން މަހުގެ ތެރޭގައި ރައްޔިތުންނަށް އެއްވެސް ދަތިކަމެއްނެތި ގޭސް ފޯރުކޮށްދެވޭނެ ކަމުގެ ޔަޤީންކަންދޭ ކަމަށެވެ.
