ވެލާނާ އިންޓަރނޭޝަނަލް އެއަރޕޯޓުގެ ޓްރެފިކް ފްލޯއަށް ބޮޑު ބަދަލެއް ގެނެސްފިއެވެ.
މި ބަދަލާ ގުޅިގެން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ނެރެފައިވާ ދެންނެވުމެއްގައި ބުނެފައިވަނީ، ވެލާނާ އިންޓަރނޭޝަނަލް އެއަރޕޯޓްގެ ޑޮމެސްޓިކް އޮޕަރޭޝަންތައް ކުރީގެ އިންޓަރނޭޝަނަލް ޓަރމިނަލަށް ބަދަލުކުރުމާއި ގުޅިގެން، އެއަރޕޯޓުގެ ޓްރެފިކް ފްލޯއަށް މިއަދުން ފެށިގެން ބޮޑު ބަދަލެއް ގެނައުމަށް ނިންމާފައިވާ ކަމަށެވެ.
އެއަރޕޯޓުގެ ޓްރެފިކް ފްލޯއަށް އެމްއޭސީއެލްއިން ގެނެސްފައިވާ ބަދަލުތަކުގެ ތެރޭގައި، ޑޮމެސްޓިކް ޓަރމިނަލަށް ފަސިންޖަރުން ގޮވައިގެން އަންނަ އުޅަނދުތަކަށް ދެން މަޑުކުރެވޭނީ ކުރީގެ އިންޓަރނޭޝަނަލް ޓަރމިނަލްގެ (ބޮލިބުރު) ކުރިމައްޗަށެވެ. މި ބަދަލާއެކު ކުރީގެ ޑޮމެސްޓިކް ޓަރމިނަލުގެ ގޮތުގައި ބޭނުންކުރަމުން އަންނަ ސަރަޙައްދަށް އުޅަނދުތައް މަޑުކުރުމާއި ފަސިންޖަރުން ބޭލުމަކީ މަނާ ކަމެކެވެ.
ޑޮމެސްޓިކް ޓަރމިނަލުން އަންނަ ފަސިންޖަރުން ޓެކްސީ ހޯދުމަށް ބޭނުންކުރާނީ، އައު އިންޓަރނޭޝަނަލް އެއަރޕޯޓުގެ ޑިޕާޗާ ގޭޓު ސަރަޙައްދުގައި ހެދިފައިވާ ޓެކްސީ ކިޔުއެވެ. މި ބަދަލާއެކު އެއަރޕޯޓުގެ ބަސް ރޫޓުތަކަށް އެއްވެސް ކަހަލަ ބަދަލެއް ނާންނާނެ ކަމަށް އެމްއޭސީއެލްއިން ވަނީ މަޢުލޫމާތު ދީފައެވެ.
އެމްއޭސީއެލްއިން ވަނީ އެއަރޕޯޓުގެ ޚިދުމަތް ހޯދާ ހުރިހާ ފަރާތްތަކުންވެސް މި ބަދަލުތަކަށް ސަމާލުކަން ދިނުމަށް އިލްތިމާސްކޮށްފައެވެ.
