އެމްޑީޕީގެ މޭޔަރު އާޒިމްގެ އިރުޝާދުގެ ދަށުން ހިނގަމުންއަންނަ މާލެސިޓީ ކައުންސިލްގެ ބެލުމުގެ ދަށުގައިވާ ސިނަމާލެ އަދި މާލެހިޔާގެ ފްލެޓްތައް މަރާމާތު ނުކުރެވި އެތަނުގައި ދިރިއުޅޭ ރައްޔިތުންގެ ޝަކުވާތައް ސަރުކާރަށް ހުށަހެޅުމުން ސަރުކާރުން އެތަން މަރާމާތުކޮށްދޭން ނިންމައިފިއެވެ.
ރައީސް މުޢިއްޒުވަނީ މިމަހުގެ 16 ވަނަ ދުވަހު ސިނަމާލެ އަދި މާލޭހިޔާގެ ފްލެޓްތަކުގައި ދިރިއުޅޭ ފަރާތްތަކާއި ބައްދަލު ކުރައްވާ އެފަރާތްތަކުގެ ކަންބޮޑުވުން އަޑުއައްސަވާފައެވެ. މި ބައްދަލުކުރެއްވުން އޮތީ ރައީސުލްޖުމްހޫރިއްޔާގެ ރަސްމީ ގެކޮޅު، މުލިއާގޭގައިއެވެ. އަރިހުގައި ހައުސިންގް މިނިސްޓަރ އަދި މާލޭގެ މޭޔަރުކަމަށް ސަރުކާރު ހިންގާ ޕާޓީ ޕީއެންސީގެ ފަރާތުން ވާދަކުރައްވާ ކެންޑިޑޭޓް މޫސާ ޖަލީލް ވެސް ބައިވެރިވެ ވަޑައިގެންނެވިއެވެ.
މި ބައްދަލުވުމަށްފަހު ހައުސިންގް މިނިސްޓަރ މުއްޠަލިބު ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިނަމާލެ އަދި މާލެ ހިޔާގައި ދިރިއުޅޭ ފަރާތްތަކާއެކު ބޭއްވެވި ބައްދަލުވުމުގައި އެ ޢިމާރާތްތަކުގެ މެއިންޓެނެންސާ ގުޅޭ ގިނަ މައްސަލަތަކެއް އެފަރާތްތަކުން ފާހަގަކޮށްފައިވާކަމަށެވެ. އެހެންނަމަވެސް އެ ފްލެޓް ތަކަކީ މާލެސިޓީ ކައުންސިލްގެ ބެލުމުގެ ދަށުގައި ވާތަނެއްކަން މިނިސްޓަރ ވަނީ ފާހަގަ ކުރައްވާފައެވެ.
މިއާއިއެކު މިނިސްޓަރ މުއްތަލިބް ވިދާޅުވީ މި ޢިމާރާތްތަކަކީ މާލޭ ސިޓީ ކައުންސިލުގެ ބެލުމުގެ ދަށުގައިހުރި ތަންތަން ނަމަވެސް މިއީ ޢާންމު ރައްޔިތުންގެ ދިރިއުޅުމާއި ރައްކާތެރިކަމާ ގުޅިފައިވާ ކަމަކަށްވާތީ، އެތަންތަން މަރާމާތުކުރުމަށްޓަކައި ހައުސިންގ މިނިސްޓްރީގެ ފަރާތުން އެ ޢިމާރާތްތަކުގެ އެސެސްމެންޓެއް ހެދުމަށް މިހާރު ނިންމާފައިވާ ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިނަމާލެ އަދި މާލެ ހިޔާގައި ދިރިއުޅޭ ފަރާތްތަކާއެކު ބޭއްވެވި ބައްދަލުވުމުގައި އެ ޢިމާރާތްތަކުގެ މެއިންޓެނެންސާ ގުޅޭ ގިނަ މައްސަލަތަކެއް އެފަރާތްތަކުން ފާހަގަކޮށްފައިވެއެވެ. މި ޢިމާރާތްތަކަކީ މާލޭ ސިޓީ ކައުންސިލުގެ ބެލުމުގެ ދަށުގައިހުރި… pic.twitter.com/nIkZlIQ5MJ
— Abdulla Muththalib (@muththo) February 17, 2026
ސިނަމާލެ އަދި މާލޭހިޔާގެ ފްލެޓްތަކުގައި ދިރިއުޅޭ ފަރާތްތަކާއި ބައްދަލު ކުރައްވާ އެފަރާތްތަކުގެ ކަންބޮޑުވުން އަޑުއައްސަވާ އިނާޔަތެއް ދެއްވަން ރައީސް ވަނީ ނިންމަވާފައެވެ.
އެގޮތުން، މި ފްލެޓްތަކަށް ފައިސާ ދެއްކޭގޮތް ނުވުމުގެ ސަބަބުން މިހާތަނަށް އަރާފައިވާ ޖޫރިމަނާ އެއްކޮށް މަޢާފުކޮށްދެއްވުމަށާއި ފްލެޓްތައް ބައުވެ، ސްޓްރަކްޗަރ ހަލާކުވެފައިވާތީއާއި، އެކަމަށް ހައްލެއް ހޯއްދަވައިނުދެވި ގިނަ ދުވަސްވެފައިވާތީ، މި ފްލެޓްތަކުގައި ދިރިއުޅޭ ފަރާތްތަކަށް އިނާޔަތެއްގެ ގޮތުގައި 100،000 ރުފިޔާ ދެއްވުމަށް ރައީސް ވަނީ ނިންމަވާފައެވެ.
ރައީސް މުޢިއްޒު މޭޔަރު ކަމުގައިވެސް އޭރުގެ އެމްޑީޕީ ސަރުކާރުން ކުރިމަތިކުރުވި ދަތިތަކާއިއެކުވެސް ސިނަމާލެ ފްލެޓްތަކުގެ މެއިންޓެއިންސްއަށް ގިނަގުނަ މަސައްކަތްތަކެއް ވަނީ ކުރައްވާފައެވެ.
