ރާއްޖެ އެތެރެކުރަން އުޅުނު 29 މިލިއަނަށްވުރެ ގިނަ ރުފިޔާގެ މަސްތުވާތަކެތި ކަސްޓަމްސްއިން އަތުލައިގަނެފިއެވެ.
މޯލްޑިވްސް ކަސްޓަމްސް ސާވިސްއިން ބުނީ އަތުލައިގަނެފައިވަނީ، މިމަހުގެ 12 ވަނަ ދުވަހު މާލޭ ވިޔަފާރި ބަނދަރު މެދުވެރިކޮށް ކަމަށެވެ. ޓެސްޓްކުރުމުގެ މަރުހަލާއިން އެތަކެއްޗަކީ ހަޝިޝް އޮއިލްކަން ދެނެގަނެވިފައިވާކަމަށް ކަސްޓަމްސްއިން ބުންޏެވެ. މި ތަކެތީގެ ބަރުދަނުގައި 36.43 ކިލޯ ހުއްޓެވެ.
ކަސްޓަމްސްއިން ބުނީ އެތަކެތި އަތުލައިގަނެފައިވަނީ މުދާ ޝިޕްމަންޓެއް ބަލައި ފާސްކުރުމުގެ ތެރެއިން ކަމަށެވެ. މި މައްސަލާގައި ބަޔަކު ނުވަތަ މީހަކު ހައްޔަރުކުރިކަމެއް އަދި ސާފެއް ނުވެއެވެ.
ކަނޑުމަގުން ރާއްޖެއަށް ގެނައި މުދާ ޝިޕްމެންޓެއް، 12 ފެބުރުވަރީ 2026 ވަނަ ދުވަހު ބަލައިފާސްކުރުމުގެ ތެރޭގައި، މަސްތުވާތަކެތިކަމަށް ޝައްކުކުރެވޭ ތަކެތި ވަނީ ފެނިފައި. ފުރަތަމަ މަރުޙަލާގެ ޓެސްޓުތަކުން މިތަކެތި ވަނީ ހަޝިޝް އޮއިލްއަށް ޕޮޒިޓިވްވެފައި. pic.twitter.com/QLXrA3HgT0
— Maldives Customs Service (@CustomsMv) February 14, 2026
ކަސްޓަމްސްއިްނ ވަނީ މިދިޔަ ޑިސެމްބަރުމަހުގެ 27 ވަނަ ދުވަހުވެސް ރާއްޖެ އެތެރެކުރަން އުޅުނު 40 ކިލޯގެ ހަޝިޝް އޮއިލްތަކެއް އަތުލައިގަނެފައެވެ. އެތަކެތީގެ މަގުމަތީ އަގު 32 މިލިއަން ރުފިޔާއަށް އަރާނޭކަމަށް ކަސްޓަމްސްއިން އޭރު ވަނީ ބުނެފައެވެ.
މި ފަހަކަށް އައިސް އަތުލައިގަންނަ ހަޝިޝް އޮއިލް އިތުރުވެފައިވާއިރު، ފުލުހުން ވަނީ މިދިޔަ އަހަރުގެ ނޮވެމްބަރުމަހުގެ ތެރޭގައި އޮޕަރޭޝަން އަލިމަގު ނަމުގައި ޑްރަގާ ދެކޮޅަށް ބޮޑު އޮޕަރޭޝަނެއް ފަށާފައެވެ.
