ޤައުމަށް ރީތި ނަން ހޯދައިދޭ ކޮންމެ ކުއްޖަކަށް ހިތްވަރު ދޭންޖެހޭ ކަމަށް ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދޮށީ ފިރިހެން ދަރިކަލުން އުމައިރު މުޙައްމަދު މުޢިއްޒު ކުޅިވަރު އެވޯރޑަށް ނޮމިނޭޓްވުމާއި ގުޅުވައިގެން އިދިކޮޅުގެ ފަރާތްތަކުން ދައްކަމުން އަންނަ ދޮގު ވާހަކަތަކަށް ރައްދުދެއްވަމުން އެކްސްގައި ޙިއްޞާކުރެއްވި ޕޯސްޓެއްގައެވެ. މިކަމާ ގުޅިގެން ޝުޖާއު ކުރެއްވި ޕޯސްޓުގައި ވިދާޅުވީ، އުމައިރަކީ ހުނަރުވެރި މޮޅު ޓޭބަލް ޓެނިސް ކުޅުންތެރިއެއް ކަމަށާއި، އޭނާ ހުނަރުވެރި އެތްލީޓަކަށްވީ މިއަދަކުނޫން ކަމަށެވެ.
ޤައުމަށް ރީތި ނަންހޯދައިދޭ ކޮންމެ ކުއްޖަކަށް ހިތްވަރު ދޭންޖެހޭކަން ފާހަގަކުރައްވަމުން ޝުޖާއު ވިދާޅުވީ، ރާއްޖޭގައި ނެތިގެން މި އުޅެނީ މިފަދަ އާދަތައް ކަމަށާއި، މިފަދަ ކަންކަން ސިޔާސީ ކުރުން ބަލައިނުގަނެވޭ ކަމަށެވެ.
https://x.com/ibrahimshujaau/status/2022394359162044708
ޝުޖާއު ވިދާޅުވީ، އެވޯރޑު ލިބޭނީ އެވޯރޑް ޙައްޤުވާ ފަރާތަކަށް އެކަނި ކަމަށާއި، އުމައިރު ކުޅިވަރުގެ ދާއިރާއިން ރަން ވަނަތައް ހޯދަން ފެށީ މިއަދަކުނޫން ކަމަށެވެ. އުމައިރަކީ ނިމިދިޔަ އެމްޑީޕީ ސަރުކާރުގައިވެސް ޓޭބަލް ޓެނިހުގައި ފާހަގަކޮށްލެވޭ ހުނަރުވެރި މޮޅު ކުޅުންތެރިއެއްކަން ފާހަގަކުރައްވަމުން ޝުޖާއު ވިދާޅުވީ، ކޮންމެ ކަމެއް ސިޔާސީކޮށް ކުދިންގެ ކުރިމަގު ބަނަވާގޮތަށް ލިޔުންތައް ލިޔުމަކީ ބަލައިގަނެވޭނެ ކަމެއްނޫން ކަމަށެވެ.
އުމީ ކުޅިވަރު އެވޯރޑަށް އުމައިރު ނޮމިނޭޓްވުމާއި ގުޅިގެން އެމްޑީޕީއަށް ނިސްބަތްވާ ފަރާތްތަކުން އަދި ކާކުކަން ނޭނގޭ އެކައުންޓްތަކުން އަންނަނީ އުމައިރަށް ނިސްބަތްކޮށް އެތަކެއް ދޮގު ވާހަކަތަކެއް ފަތުރައި، ގަނާކޮށް ފުރައްސާރަކުރަމުންނެވެ. ފުރައްސާރަކުރާ މީހުން ބުނާގޮތުގައި އުމައިރު ކުޅިވަރު އެވޯރޑަށް ނޮމިނޭޓްވެފައިވަނީ އެއްވެސް ކުޅިވަރު މުބާރާތެއްގައި ބައިވެރިނުވެ އަދި އެއްވެސް މުބާރާތަކުން ފާހަގަކޮށްލެވޭ ކާމިޔާބީއަކާއި މެޑައްޔެއްވެސް ނުލިބި ހަމައެކަނި ރައީސްގެ ދަރިކަލުންނަށް ވީތީއެވެ. ނަމަވެސް މި ވާހަކަތަކަކީ ދޮގު ވާހަކަތަކެއްކަމަށް ހެކިދޭ އެތަކެއް ކަމެއް ފެންނަން އެބަހުއްޓެވެ.
އުމައިރަށް ކުރަމުންދާ ފުރައްސާރައިގެ ދިފާޢުގައިވެސް އެތައް ބަޔަކު ނުކުމެ ދަނީ ޙަޤީޤަތް ހާމަކުރަމުންނެވެ. އެގޮތުން ކުޅިވަރުގެ ދާއިރާއިން ފާހަގަކޮށްލެވޭ އެތައް ބަޔަކު މިކަން ކުށްވެރިކޮށް ވާހަކަދައްކާފައިވެއެވެ.
ކުޅިވަރު އެވޯރޑްގެ ކެޓަގަރީތަކަށް ނޮމިނޭޓްވެފައިވާ ފަރާތްތައް ސްޕޯޓްސް މިނިސްޓްރީން މިހާރު އިޢުލާންކޮށްފައިވާއިރު ރައީސްގެ ދަރިކަލުން ނޮމިނޭޓްވެފައިވަނީ، 2024 ވަނަ އަހަރުގެ ޒުވާން ކުޅުންތެރިންގެ ފިރިހެން ކެޓަގަރީއަށެވެ. އުމައިރު ނޮމިނޭޓް ކޮށްފައިވަނީ ޓޭބަލް ޓެނިސް އެސޯސިއޭޝަނުންނެވެ.
ފާހަގަކޮށްލެވޭ ގޮތުގައި ސްޕޯޓްސް އެވޯރޑް 2025 މިދިޔަ އަހަރު ލަސްވެ، އެ ޙަފްލާ ބާއްވާފައި ނުވެއެވެ. އެހެންކަމުން ސްޕޯޓްސް އެރވޯޑް 2025 އަށް ނޮމިނޭޓްވެފައިވާ ހުރިހާ ކުދިންނަކީވެސް 2024 ވަނަ އަހަރު އެކި ކުޅިވަރު ތަކުން ރަންވަނަތަކާއި، ކާމިޔާބީތައް ހޯދައިގެން ނޮމިނޭޓްވީ ކުދިންނެވެ. އެހެންކަމުން މި އަހަރު ބާއްވާ އެވޯރޑަކީ 2025 ވަނަ އަހަރުގެ އެވޯރޑުކަން ސާފުކޮށް ފެންނަން އެބައޮތެވެ.
