ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް ޤައުމީ އެއަރލައިން މޯލްޑިވިއަންގެ ސީޕްލޭން ދަތުރުތައް އއ. ތޮއްޑޫއަށް ފަށައިފިއެވެ.
ތޮއްޑޫއަށް ސީޕްލޭން ދަތުރުތަށް ފެށުން ފާހަގަކުރުމަށް ތޮއްޑޫގައި ވަނީ ސަޤާފީ ޙާރަކާތްތަކާއެކު ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ ދިވެހިބަހާއި ތަރިކައާއި، ބެހޭ މިނިސްޓަރު އާދަމް ނަސީރު އިބްރާހިމެވެ. މި ރަސްމިއްޔާތުގައި އައިލެންޑް އޭވިއޭޝަންގެ ޑެޕިއުޓި މެނޭޖިން ޑިރެކްޓަރ އަލީ ސަލީމް ވަނީ ބައިވެރިވެފައެވެ. އަދި ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާގެ އިސްބޭފުޅުން އަދި ތޮއްޑޫގެ ކައުންސިލްގެ މެމްބަރުންވެސް ވަނީ ބައިވެރިވެފައެވެ.
މި ރަސްމިއްޔާތުގައި ވާހަކަދައްކަމުން އައިލަންޑު އޭވިއޭޝަންގެ ޑެޕިއުޓީ މެނޭޖިން ޑިރެކްޓަރ އަލީ ސަލީމް ވިދާޅުވީ މި މަސައްކަތަކީ ރައީސް ޑރ. މުޢިއްޒުގެ ވަޢުދުގެ ތެރެއިން ޚާއްޞަ އިސްކަމެއްދީގެން ކުރިއަށް ގެންދެވުނު މަސައްކަތެއްކަމަށެވެ.
ސަލީމް ވިދާޅުވީ ފަތުރުވެރިކަން ކުރިއަރާފައިވާ ރަށްރަށަށް އެކި ބޭނުންތަކުގައި ކަނޑުމަގުން ދަތުރުކުން ވެފައިވަނީ ވަރަށް ބޮޑު ތަކުލީފަކަށްކަމަށެވެ. އެހެންނަމަވެސް މި ފެށުނު ދަތުރުތަކާއެކު މިކަމަށް ހައްލު ލިބިގެންދާނެކަމަށް ވިދާޅުވިއެވެ. ސަލީމް ވިދާޅުވީ ތޮއްޑޫއަށް މިފެށި ދަތުރުތައް މެދުނުކެނޑި ކުރިއަށް ގެންދާނެކަމަށެވެ. އަދި ޑިމާންޑު އިތުރުވާނަމަ ދަތުރުތައް އިތުރުކުރާނެކަމަށް ސަލީމް ވިދާޅުވިއެވެ.
”އައިލެންޑް އޭވިއޭޝަންއިން މިފެށި ދަތުރުތައް ހުއްޓުމެއްނެތި ކުރިއަށް ގެންދާނަން. ޑިމާންޑު އިތުރުވާވަރަކަށް ދަތުރުތައް އިތުރުކުރެވިގެންދާނެ. ސަރުކާރުން ބޭނުންވަނީ ރައްޔިތުންނަށް ލުއިފަސޭހަ ، އަދި އިޤްތިސޯދު ގޮތުން ކުރިއެރުވުންކަމަށް ވިދާޅުވި.“ ސަލީމް ވިދާޅުވިއެވެ.
މި ޚިދުމަތް ފެށުމާއި ގުޅިގެން ޓްރާންސްޕޯޓް މިނިސްޓަރ އަމީން ވިދާޅުވީ މިއަދަކީ އަރިއަތޮޅު އުތުރުބުރީ ތޮއްޑޫގެ ރައްޔިތުންނަށް ނުހަނު އުފާވެރި ދުވަހެއްކަމަށެވެ. އެއީ މިއަދު ރަސްމީކޮށް ފެށިގެންދިޔަ ސީޕްލޭން ދަތުރުތަކުގެ ސަބަބުން، ރަށާއި އަތޮޅުގެ ޓޫރިޒަމަށް ފައިދާކުރާނެތީ ކަމަށާއި، އަދި އާންމު ރައްޔިތުންނަށް ވައިގެ މަގުން ދަތުރު ކުރުމުގެ ލުއި ފަސޭހަކަން ވެސް ލިބިގެން ދާނެތީ ކަމަށް މިނިސްޓަރ ވިދާޅުވިއެވެ.
https://twitter.com/ameen3d/status/2021915644376281467
މިނިސްޓަރ ވަނީ ޤައުމާއި ރައްޔިތުންގެ ޙައްޤުގައި ރައީސް ޑރ. މުޢިއްޒު އަޅުއްވަމުން ގެންދަވާ ހަރުދަނާ ފިޔަވަޅުތަކާއި، ރައްޔިތުންގެ ލާބަޔާއި މަންފާއަށްޓަކައި ނިންމަވާ ނިންމެވުންތަކަށް އައްސަރިބަހާ ސާބަސް ދަންނަވާކަމަށް ވިދާޅުވެފައެވެ.
