ރޯދަ ހަދިޔާގެ ގޮތުގައި ރާއްޖޭގެ ހުރިހާ ގޭބީސީތަކަށް ސަރުކާރުން ދެއްވާ މަސްދަޅު ކޭސް މާލޭ ސަރަޙާއްދުގައި ދޫކުރާނެ އެންމެ ފަހު ތާރީޚަކީ 11 ފެބްރުއަރީ 2026 ވާ ބުދަ ދުވަސް ކަމަށް، ސިޓީސް މިނިސްޓްރީން ހާމަކޮށްފިއެވެ.
ސިޓީސް މިނިސްޓްރީން އެކްސްގައި ހިއްސާކުރި ޕޯސްޓެއްގައި ބުނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް 1447 ވަނަ އަހަރުގެ ބަރަކާތްތެރި ރަމަޟާން މަހަށް ދިވެހި ކޮންމެ ގޭބިސީއަކަށް ސަރުކާރުން ހަދިޔާކުރާ މަސްދަޅު ކޭސް ގްރޭޓަރ މާލެ ސަރަޙައްދުގެ ގޭބިސީތަކަށް ދޫކުރުން ކުރިއަށްދާނީ މި މަހުގެ 11 ވަނަ ދުވަހާއި ހަމައަށް ކަމަށެވެ.
ރޯދަ ހަދިޔާގެ ގޮތުގައި ސަރުކާރުން ދޭ މަސްދަޅު ކޭސް ދޫކުރަން ފެށިތާ 17 ދުވަސްވެފައިވާއިރު މި މަސައްކަތް ފަށާފައިވަނީ ހުސްވި ޖެނުއަރީ މަހުގެ 24 ވަނަ ދުވަހުގެ ރޭގައެވެ. ފާހަގަކޮށްލެވޭ ގޮތުގައި، ކުރީ އަހަރެކޭ އެއްފަދައިން މި އަހަރު ވެސް ރާއްޖޭގެ ކޮންމެ ގޭބިސީއަކަށް ދޫކުރުމަށް ހަމަޖެހިފައިވަނީ 48 ދަޅު ހިމެނޭ މަސްދަޅު ކޭހެވެ. މަސްދަޅު ކޭސް ބެހުމުގެ މަސައްކަތް ކުރިއަށްދާނީ ކޮންމެ ރެޔަކު 20:30 އިން ފެށިގެން 11:00 އާއި ހަމައަށެވެ.
މާލޭ ސަރަހައްދުގައި ޖުމުލަ 15 ތަނަކުން މަސްދަޅު ކޭސް ބެހުމުގެ އިންތިޒާމުތައް ހަމަޖެހިފައިވާއިރު މާލޭގެ އަށް ތަނަކުން، ވިލިމާލޭގެ އެއް ތަނަކުން އަދި ހުޅުމާލޭގެ ހަ ތަނަކުން މަސްދަޅު ކޭސް ލިބޭނެ އިންތިޒާމު ވަނީ ހަމަޖެހިފައެވެ.
މާލޭގައި މަސްދަޅު ކޭސް ލިބޭނެ އިންތިޒާމު ހަމަޖެހިފައިވާ ތަންތަނުގެ ތެރޭގައި:
- މިފްކޯ މަރުކަޒު
- ސޯޝަލް ސެންޓަރު
- އެމްޓީސީސީ ސޯމިލް
- ބޯޅަ ދަނޑު
- ގަލޮޅު ބޯޅަ ދަނޑުގެ ހަތަރު ފަރާތް
ހުޅުމާލޭގައި މަސްދަޅު ކޭސް ލިބޭނެ އިންތިޒާމު ހަމަޖެހިފައިވާ ތަންތަން:
- އުމަރު ޒާހިރު ބިލްޑިން
- ޕޮލްކޯ ޓަވަރު
- މުހައްމަދު ގާސިމް ޕްރީސުކޫލް
- ކާމިލް ދީދީ ސްކޫލް
- ހިޔާ ޓަވަރު 10
- ވިނަރެސް ފްލެޓް
ވިލިމާލޭގައި މަސްދަޅު ކޭސް ދޫކުރުމުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ ވިލިމާލޭ ވެމްކޯ ސައިޓުންނެވެ. ފާހަގަކޮށްލެވޭ ގޮތުގައި މި މަހުގެ 11 ވަނަ ދުވަހަށް ފަހު ރޯދަ ހަދިޔާ ނުނަގާ ގޭބިސީތަކަށް އެ ހަދިޔާ ދޫކުރާނީ މާފަންނުގައި ހުންނަ މިފްކޯ ފިހާރައިންނެވެ.
