ރަށްރަށުގެ ޢާންމު ތަންތަނުގައި ބިކިނީގައި އުޅޭ ފަތުރުވެރިންނާމެދު ހަރުކަށި ފިޔަވަޅު އަޅަން ގޮވާލައި ރައްޔިތުންގެ މަޖިލީހަށް މިއަދު ޕެޓިޝަނެއް ހުށަހަޅައިފިއެވެ.
މި ޕެޓިޝަނަކީ ރާއްޖޭގެ މަޝްޙޫރު ދީނީ ޢިލްމުވެރިޔާ ޒަމްޒަމް ފާރިޝް ރައްޔިތުންގެ މަޖިލީހަށް ހުށަހެޅުއްވި ޕެޓިޝަނެކެވެ. ޝެއިޙް ޒަމްޒަމް ފާރިޝް ޕެޓިޝަން ހުށަހަޅުއްވަމުން ވިދާޅުވެފައިވަނީ، ރަށްރަށުގެ ޢާންމު ތަންތަނުގައި ބިކިނީ ފަދަ ނިވައިކަން ކުޑަ ފޭރާމުގައި ފަތުރުވެރިން އުޅޭ މައްސަލައިގެ ސަބަބުން އިސްލާމީ އަޚުލާޤާއި ދިވެހި ކާބަފައިން ދޫކުރެއްވި ރިވެތި ސަޤާފަތާއި އާދަކާދަތައް ނެތިގެންދިއުމަކީ ގިނަ ބަޔަކު ކަންބޮޑުވާ ސީރިއަސް މައްސަލައެއް ކަމަށެވެ.
އެހެންކަމުން މިހާރު ހުރި ޤަވާއިދުތައް ތަންފީޒުކުރުން ހަރުދަނާކޮށް އެއާ ޚިލާފުވާ ފަރާތްތަކާ މެދު ކަންކުރާނެ ގޮތުގެ އިތުރު ޤާނޫނުތައް ހަދައި، އެ ފަރާތްތަކާ މެދު ޤާނޫނީ ހަރުކަށި ފިޔަވަޅު އެޅޭނެ ނިޒާމެއް އެކަށައަޅައި، އެ މައްސަލަ ޙައްލުކޮށްދެއްވަމަށް ޝެއިޚް ވަނީ އެދިފައެވެ.
ޝެއިޙް ވިދާޅުވީ، މީގެ ކުރިން ވެސް މި މައްސަލައާ ގުޅިގެން މަޖިލީހަށް ސިޓީއެއް ހުށަހަޅުއްވާފައިވާނެ ކަމަށެވެ. މީގެ އިތުރުން، ފަރުދީ ފެންވަރުގައްޔާއި، ޖަމުޢިއްޔާ ފެންވަރުގައި އަދި ޢިލްމުވެރިންގެ ތެރެއިން ވެސް މި މައްސަލައާ މެދު ފިޔަވަޅެއް އެޅުމަށް މަސައްކަތްތަކެއް ކޮށްފައިވާ ކަމަށް ޝެއިޚް ވިދާޅުވިއެވެ.
”މި ޕެޓިޝަން ހުޅުވާލުމާއެކު އަޅުގަނޑުމެން ބޭނުންވީ ވީހައިވެސް އަވަހަކަށް އަޅުގަނޑުމެންގެ ކޮންސާނެއް އޮތީމަ އެ މައްސަލައިގަ އަވަހަށް މަޖިލިސް ތެރެއިން ކަންތައްތަކެއް ކުރެވޭތޯ އެކަމަށް ފިޔަވަޅެއް އަޅަން، ދެން އަނެއްކާ ރޯދަ މަސް ވެސް ގާތްވަމުން އަންނާތީއާއި އެކީގަ ރޯދަ މަހު ވެސް ވަރަށް ގިނަ ޢިލްމުވެރިންނަށް އަންނަ ޝަކުވާއެއްމީ އަދި އެ ބޭފުޅުންގެ ވެސް ވަރަށް ބޮޑު ކޮންސާނެއް މިއީ ރަށްރަށުގައި ރޯދައަށް ތިބޭ ވަގުތުގައި އައުރަ ނިވައިނުކޮށް ނިވައިކަން ކުޑަކޮށް ގެސްޓުން އައިސް އުޅޭތީ،“ — ޝެއިޚް ވިދާޅުވިއެވެ.
ޝެއިޚް ވިދާޅުވީ، މި ޕެޓިޝަނުގައި ސޮއިކުރަން ފެށީ އިއްޔެ 11:00 ގައި ކަމަށާއި، އޭރުން ފެށިގެން މިހާތަނަށް 280 އެއްހައި މީހުން ޕެޓިޝަނުގައި ސޮއިކޮށްފައިވާ ކަމަށެވެ.
ޝެއިޚް ވިދާޅުވީ، ފަތުރުވެރިންގެ ކިބައިން ފެންނަ މިފަދަ ޢަމަލުތަކުގެ ސަބަބުން އެކަމުގެ ނޭދެވޭ އަސަރު ދިވެހި ޅަ ދަރިންނަށް ކުރުމުގެ އިތުރުން، އެ ކުދިން އިސްލާމީ ރިވެތި އަޚުލާޤުގެ މަތީގައި ތަރުބިއްޔަތު ކުރުމަށް ބޮޑެތި ހުރަސްތަކެއް ކުރިމަތިވާ ކަމަށެވެ. މީގެ އިތުރުން މިކަމާ ގުޅިގެން ބެލެނެވެރިންގެ ހޭލުންތެރިކަން އިތުރުކުރުމަށް އިސްލާމިކް މިނިސްޓްރީއާއި ޢިލްމުވެރިން ގުޅިގެން މަޝްވަރާތަކެއް ކުރިއަށްގެންދަވާ ކަމަށް ޝެއިޚް ވިދާޅުވިއެވެ.
ޝެއިޚް ޒަމްޒަމް ފާރިޝް ވަނީ، ވީހައިވެސް ގިނަ ފަރާތްތަކުން މި ޕެޓިޝަނުގައި ސޮއިކުރުމަށް އެދިވަޑައިގެންފައެވެ.
ފާހަގަކޮށްލެވޭ ގޮތުގައި، ރަށްރަށުގެ ޢާންމު ތަންތަނުގައި ފަތުރުވެރިން ނިވައިކަން ކުޑަ ހެދުން ލައިގެން އުޅޭ މައްސަލަ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަމާލުކަމަށް އައުމާއެކު، އެމަނިކުފާނު ވަނީ މިދިޔަ 2025 ވަނަ އަހަރުގެ އޮގަސްޓު މަހު، އއ. އަތޮޅަށް ވަޑައިގެން އެ އަތޮޅު އުކުޅަހު ރައްޔިތުންނާ ބައްދަލުކުރައްވައި ދެއްކެވި ވާހަަކަފުޅުގައި ވެސް އެކަން ފާހަގަކުރައްވައިފަ އެވެ. އަދި ކައުންސިލްތަކަށް ވަރުގަދަ މެސެޖެއް ދެއްވާ ރައީސް ވިދާޅުވީ މިފަދަ މައްސަލަތަކަށް އެކަށީގެންވާ ގޮތެއްގައި ހައްލުގެނެސްގެން ނޫނީ ލޯކަލް ޓްއަރިޒަމް ކުރިނޭރުވޭނެ ކަމަށެވެ. އަދި މިކަމުގައި މުޅި މުޖްތަމަޢުގެ އެހީތެރިކަމާއި އެއްބާރުލެއްވުމަށް ރައީސް ވަނީ އެދިވަޑައިގެންފައެވެ.
