ކުރިއަށް އޮތް ހަތަރު ދުވަހު ވެސް ރާއްޖޭގެ އެކި ސަރަޙައްދުތަކަށް ދުންފުހުގެ އަސަރުކުރާނެ ކަމަށް މޫސުމާ ބެހޭ ޤައުމީ އިދާރާ، މެޓް އޮފީހުން ހާމަކޮށްފިއެވެ.
އުތުރާއި މެދު ރާއްޖެތެރޭގެ އަތޮޅުތަކަށް ދުންފުހުގެ އަސަރު ވަނީ ނުރައްކާވާ މިންވަރަކަށް ކޮށްފައެވެ. އެގޮތުން އެ ސަރަޙައްދުތަކުގައި ދުރު ފެންން މިންވަރު ވަނީ ތިން ކިލޯމީޓަރަށްވުރެ ދަށްވެފައެވެ. ކުރިއަށް އޮތް ހަތަރު ދުވަހު ވެސް ދުންފުހުގެ އަސަރު ރާއްޖޭގެ އެކި ސަރަޙައްދުތަކުގައި ހުންނާނެ ކަމަށް އެ އޮފީހުން ލަފާކުރެއެވެ.
ކުރިއަށް އޮތް ހަތަރު ދުވަހު ވެސް އިރު އުތުރުން އަންނަ ވަޔާއެކު، ދުންފުހުގެ އަސަރު ރާއްޖެ މަތީގައި ހުންނާނެ ކަމަށް ބެލެވޭތީ ބޭރުގައި އެކި ހަރަކާތްތަކުގައި އުޅޭ ފަރާތްތަކާއި، ކަނޑުދަތުރުކުރާ ފަރާތްތަކުން ވެސް މިކަމަށް ޚާއްޞަ ސަމާލުކަމެއް ދިނުމަށް މެޓް އޮފީހުން ވަނީ އިލްމާސްކޮށްފައެވެ.
ފުއްޕާމެއާއި ހިތުގެ ބަލިތައް ހުންނަ ފަރާތްތަކަށް ވައި ނުސާފުވުމުގެ ސަބަބުން ބަލި ބޮޑުވުމުގެ ނުރައްކާ އޮންނަކަން ފާހަގަކޮށްލަންޖެހެ އެވެ. އެހެންކަމުން މި ދުވަސްވަރު ބޭރުގައި އުޅޭއިރު ރައްކާތެރިވުމުގެ ގޮތުން މާސްކު އެޅުމަށާއި، ގޭތެރެއަށް ނުސާފު ވައި ވަންނާނެހެން ދޮރުތައް ހުޅުވާފައި ނުބެހެއްޓުމަކީ ވަރަށް މުހިއްމު ކަމެކެވެ.
މިދުވަސްވަރު ރާއްޖޭގެ ވައި މިހާ ބޮޑަށް ނުސާފުވަނީ އިރުވައި މޫސުމުގައި ރާއްޖޭގެ އުތުރުން އިންޑިއާއާއި ހިމާލިޔާ ސަރަޙައްދުން އަންނަ ދުންފުހުގެ ސަބަބުންނެވެ. މިއީ ކޮންމެ އަހަރެއްގެ ވެސް އިރުވައި މޫސުމުގައި ރާއްޖެއަށް ކުރިމަތިވާ މައްސަލައެއްކަން ފާހަގަކޮށްލެވެއެވެ.
