ޕާކިސްތާނުގެ ވެރިރަށުގެ ބޭރުގައި އޮންނަ އިމާމް ބަރްގާހު ޤަޞްރުއްޚަދީޖަތުލް ކުބްރާ މިސްކިތަށް ދިން ބޮމުގެ ހަމަލާގެ ފަހަތުގައި ތިބި ކަމަށް ޝައްކު ކުރެވޭ 4 މީހަކު ހައްޔަރުކޮށްފައިވާ ކަމަށް ޕާކިސްތާނުގެ ދާޚިލީ ވަޒީރު ވިދާޅުވެއްޖެއެވެ. މި މީހުންގެ ތެރޭގައި މުޅި ހަމަލާ ރޭވި މީހާ ވެސް ހިމެނޭ ކަމަށް ރިޕޯޓުތައް ބުނެއެވެ.
މި ހަމަލާ ދީފައިވަނީ ހުކުރު ނަމާދުގެ ތެރެއިންނެވެ. ހަމަލާގައި 31 މީހުން މަރުވެ 169 މީހުން ޒަޚަމްވެފައެވެ. މަރުވި މީހުންގެ އަދަދު އިތުރުވެދާނެ ކަމަށް އޮފިޝަލުން ވަނީ ލަފާކޮށްފައެވެ.
ހަމަލާ ރޭވި ކަމަށް ތުހުމަތު ކުރެވެނީ އަފްޣާނިސްތާމުގެ ރައްޔިތެކެވެ. އަދި ޝައްކު ކުރެވޭ މީހުން ހައްޔަރު ކުރުމަށް ހިންގި ރެއިޑްތަކުގައި އެއް އޮފިސަރަކު މަރުވެ އިތުރު ތިން އޮފިސަރަކު ޒަހަމްވެފައިވާ ކަމަށް ވެސް ވަޒީރު ވިދާޅުވިއެވެ.
ބޮން ގޮއްވާލި މީހާ ބޮން ގޮއްވުމުގެ ކުރިން މިސްކިތުގެ ގޭޓު ކުރިމަތީ ހުރި ކަމަށް ސަލާމަތީ މަސްދަރުތަކުން ބުނެއެވެ. މަންޒަރު ދުށް މީހުން ސިފަކޮށްފައިވާ ގޮތުގައި ގޮވުމުގެ ކުރިން ވޮލަންޓިއަރ ސެކިއުރިޓީ އޮފިސަރުންނާއި ހަމަލާދިން މީހާއާ ދެމެދު ބަޑީގެ ހަމަލާތައް ބަދަލުކުރެވުނެވެ.
މި ހަމަލާގެ ޒިންމާ އިސްލާމިކް ސްޓޭޓް ޖަމާއަތުން ނަގާފައިވާއިރު، މިއީ 2008 ވަނަ އަހަރު މެރިއޮޓް ހޮޓަލުގައި ބޮން ގޮއްވާލި ފަހުން އެ ޖަމާއަތުޖް ހިނގި އެންމެ ނުރައްކާތެރި ހާދިސާއެވެ.
ޕާކިސްތާނުގައި ހަނގުރާމަވެރިންގެ ހަމަލާތައް އިތުރުވަމުންދާއިރު، ކަމާބެހޭ ފަރާތްތަކުން ދަނީ މިކަމާ ގުޅޭ ތަހުގީގުތައް ކުރިއަށް ގެންދަމުންނެވެ.
