އެމްޑީޕީގެ ކައުންސިލްތައް ޤާއިމްވެފައި ހުރި ރަށްރަށުގެ ތަރައްޤީއަށް އެ ޕާޓީން އޮތީ އިހުމާލުވެފައި ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާޙު ވިދާޅުވެއްޖެއެވެ.
ފަލާޙު މި މޭރުމުން ވިދާޅުވީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ޕީއެންސީގެ ފަރާތުން އައްޑޫ ސިޓީން ވާދަކުރާ ކެންޑިޑޭޓުންގެ ކެމްޕެއިން އިފުތިތާހުކުރުމަށް އެ ސިޓީގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ. ފަލާޙު ވިދާޅުވީ، މި އަހަރުގެ ލޯކަލް ކައުންސިލްތަކުގެ އިންތިޚާބުގައި ޕީއެންސީގެ ފަރާތުން 1،323 ކެންޑިޑޭޓުން ވާދަކުރެއްވުމަށް ހަމަޖެހިފައިވާ ކަމަށެވެ.
މިއީ ވަރަށް ގިނަ އަދަދެއްގެ ކެންޑިޑޭޓުންކަން ފާހަގަކުރައްވަމުން ފަލާޙު ވިދާޅުވީ، ޕީއެންސީގެ ފަރާތުން ކައުންސިލް އިންތިޚާބުގެ ކެމްޕެއިނަށް މިހާތަނަށް ވަޑައިގެންނެވުނު ހުރިހާ ސިޓީތަކާއި ރަށްތަކުން ފާހަގަވެގެންދިޔައީ ޕީއެންސީގެ ކެންޑިޑޭޓުންނަކީ ވަރަށް ކުޅަދާނަ، ވަރަށް ޤާބިލު، ތަޢުލީމީ އަދި ޒުވާން ވަރުގަދަ ކެންޑިޑޭޓުން ކަމަށެވެ.
”އާދެ ތި ބޭފުޅުން ބައްލަވާ އަޅުގަނޑުމެން ޕާޓީއަށް، އަޅުގަނޑުމެންގެ ޢިއްޒަތްތެރި ރައީސުލްޖުމްހޫރިއްޔާ މި އިންތިޚާބު ކާމިޔާބުކުރުމަށްޓަކައި މިހާ ބުރަ މަސައްކަތްތަކެއް މި ކުރައްވަނީ ވަރަށް ބައިވަރު ސަބަބުތަކެއް ހުރެގެން، ހަމައެކަނި އިންތިޚާބެއް ކާމިޔާބުކުރުމުގެ ބޭނުމަކުނޫން.“ — މެންބަރު ފަލާޙު ވިދާޅުވިއެވެ.
ރާއްޖޭގައި 2011 ވަނަ އަހަރުން ފެށިގެން އުފެދުނު ކައުންސިލްތަކުގައި، އެމްޑީޕީގެ ކައުންސިލްތައް ޤާއިމުވީ ރަށްރަށުގެ ތަރައްޤީއަށް އެ ޕާޓީން ހުރަސްއަޅާފައިވާކަން ފާހަގަކުރައްވަމުން ފަލާޙު ވިދާޅުވީ، އެމްޑީޕީއާއި ޕީއެންސީ ތަފާތު ވަނީ މި ސަބަބަށްޓަކައި ކަމަށެވެ. އެމްޑީޕީއާއި ޚިލާފަށް ޕީއެންސީން ރަށްރަށުގެ ތަރައްޤީއަށް މަސައްކަތް ކުރާނެ ކަމުގެ ޔަޤީންކަން ފަލާޙު ވަނީ ދެއްވައިފައެވެ.
ފަލާޙު އިތުރަށް ވިދާޅުވީ އެމްޑީޕީން ރާއްޖޭގެ ވެރިކަމާ ހަވާލުވީ ކޮންމެ ފަހަރަކު ވެސް، ޤައުމަށް ވަރަށް ބޮޑެތި އަނިޔާތައް ދީފައިވާ ކަމަށާއި އެ ޕާޓީން އަބަދު ވެސް އިސްކުރާނީ ރައްޔިތުންގެ މަޞްލަޙަތަށްވުރެ ބޮޑަށް އަމިއްލަ މަޞްލަޙަތު ކަމަށެވެ.
