މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވައިގެ ދަތުރުފަތުރުގެ ސިނާއަތަށް ޚާއްޞަކޮށްގެން ”ވެލާނާ އެވޯޑްސް“ގެ ނަމުގައި ރާއްޖޭގައި ފުރަތަމަ ފަހަރަށް އެވޯޑެއް ތަޢާރަފުކޮށްފިއެވެ.
މި އެވޯޑާއި ގުޅޭގޮތުން މަޢުލޫމާތު ހިއްސާކުރަމުން އެމްއޭސީއެލުން ބުނީ މިއީ ދަތުރުފަތުރުގެ ގުޅުންތައް ވަރުގަދަކުރުމަށާއި ޚިދުމަތުގެ ފެންވަރު ރަނގަޅުކުރުމަށާއި އަދި ދަތުރުވެރިންނާއި ވިޔަފާރިވެރިންގެ މެދުގައި މަގުބޫލު މަންޒިލެއްގެ ގޮތުގައި ދިވެހިރާއްޖެ ދެމެހެއްޓުމަށް ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ ޕާޓްނަރުން ކުރާ އަގުހުރި މަސައްކަތް ފާހަގަކޮށް، އެކަމުގެ އަގުވަޒަންކުރުމުގެ ގޮތުން ކޮންމެ އަހަރަކު ދޭން ކަނޑައަޅާފައިވާ އެވޯޑެއް ކަމަށެވެ.
އިތުރު ތަފްސީލް ދެއްވަމުން އެ ކުންފުނިން ބުނީ މި އަހަރުގެ އެވޯޑުގައި 3 ދާއިރާއަކުން 22 އެވޯޑް ދިނުމަށް ހަމަޖެހިފައިވާކަމަށެވެ.
މި 6 އެވޯޑް ދިނުމަށް ހަމަޖެހިފައިވާ މައިގަނޑު ކެޓަގަރީތަކުގެ ތެރޭގައި ހިމެނެނީ:
- ފަސެންޖާ އެވޯޑްސް
- ކާގޯ އެވޯޑްސް
- ލައުންޖް އެވޯޑްސްއެވެ.
މީގެ އިތުރުން އަހަރުގެ އެއާލައިން ފާހަގަކޮށް އެފަރާތައް ޚާއްޞަ އެވޯޑެއްވެސް ދޭން ނިންމާފައިވާ ކަމަށް އެމްއޭސީއެލުން ބުނެފައިވެއެވެ. މި އަހަރުގެ އެވޯޑް ރަސްމިއްޔާތު ބޭއްވުމަށް ހަމަޖެހިފައިވަނީ މި މަހުގެ 12 ވަނަ ދުވަހުގެ ރޭ ކްރޮސްރޯޑްސް މޯލްޑިވްސްގައި ކަމަށް އެކުންފުނިން މަޢުލޫމާތު ދެއެވެ.
