ކުޑަކުދިން ޤުރްއާނަށް ހިތްޖައްސައި އަހުލުވެރިކުރުވުމުގެ ގޮތުން، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)އާއި އަލް ޢަސްރު ޖަމުޢިއްޔާ ގުޅިގެން ހުޅުމާލޭގައި ކުރިއަށްގެންދަން ރާވާފައިވާ ޤުރްއާން ކްލާސްތަކަށް ބޮޑު ތަރުޙީބެއް ލިބިއްޖެއެވެ.
ބައިވެރިންގެ އަތުން އެއްވެސް ފީއެއް ނެގުމަކާ ނުލައި ކުރިއަށްގެންދާ މި ޤުރްއާން ކްލާސްތަކުގައި ބައިވެރިވުމަށް މިދިޔަ ބުދަ ދުވަހު ހުޅުވާލުމާއެކު، 24 ގަޑިއިރުގެ ތެރޭގައި ވަނީ ހުރިހާ ސްލޮޓްތަކަކަށް ކުދިން ހަމަވެފައިވާ ކަމަށް އެޗްޑީސީން ވަނީ ހާމަކޮށްފައެވެ. އެޗްޑީސީން ބުނީ މި ކްލާސްތަކުގައި ބައިވެރިވުމަށް ހަތް އަހަރާއި 10 އަހަރާ ދެމެދުގެ ޖުމްލަ 103 ކުދިން ނަންނޯޓުކޮށްފައިވާތީ، އެ ކްލާސްތަކުގައި ބައިވެރިވުމުގެ ފުރުޞަތު މިހާރު ބަންދުކޮށްފައިވާ ކަމަށެވެ.
މިއީ، ހުޅުމާލޭގައި ގުރުއާން ކްލާސްތައް ކުރިއަށްގެންދިއުމާއެކު ދީނީ ދަރުސް ދިނުމަށް، އަލް އަސްރު ޖަމިއްޔާއާއި އެޗްޑީސީއާ ދެމެދު މިދިޔަ ސެޕްޓެމްބަރު މަހު ސޮއިކުރެވުނު އެމްއޯޔޫގެ ދަށުން ކުރިއަށްގެންދާ ކްލާސްތަކެކެވެ.
އެއް އަހަރު ދުވަހުގެ މި އެމްއޯޔޫގެ ދަށުން ހުޅުމާލޭގެ އެކި މިސްކިތްތަކުގައި، ހަފްތާއަކު ފަސް ދުވަހު، ކޮންމެ ދުވަހަކު ހަތަރު ޤުރްއާން ކްލާސް ކުރިއަށްގެންދިއުމަށް ހަމަޖެހިފައިވާއިރު، މި ކްލާސްތައް ކުރިއަށްގެންދާނީ ހެނދުނާއި ހަވީރަށް ބަހާލައިގެން، އަންހެން އަދި ފިރިހެން ކުދިން ވަކިންނެވެ.
މި ކްލާސްތަކުގައި ޤުރްއާން އުނގަންނައިދޭ މުދައްރިސުން ހަމަޖެއްސުމާއި، ތަމްރީނުކުރުން ކުރިއަށްގެންދާނީ އަލް ޢަސްރު ޖަމުޢިއްޔާގެ ފަރާތުންނެވެ.
ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ އިޖްތިމާޢީ ޒިންމާގެ ދަށުން އަލް ޢަސްރާއެކު ސޮއިކުރެވުނު މި އެއްބަސްވުމުގެ މަޤުޞަދަކީ، ދީނަށް ލޯބިކުރާ މުޖްތަމަޢުއެއް ބިނާކުރުމެވެ. އެ ކޯޕަރޭޝަނުން ބުނީ ކުރިއަށްއޮތްތަނުގައި ވެސް މުޖްތަމަޢުއަށް ފައިދާހުރި މިފަދަ ގިނަ ޕްރޮގުރާމުތައް ހިންގުމަކީ އަމާޒެއް ކަމަށެވެ.
