ކުޅުދުއްފުށި ސިޓީގައި ތަރައްޤީކުރާ ހައުސިންގ ޔުނިޓްތަކުގެ މަސައްކަތް އަންނަ މާރިޗު މަހު ފެށުމަށް ހަމަޖެހިފައިވާ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު ޑރ. މުއްޔަލިބު މި މޭރުމުން ވިދާޅުވީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ޕީއެންސީގެ ފަރާތުން ކުޅުދުއްފުށި ސިޓީން ވާދަކުރާ ކެންޑިޑޭޓުންގެ ކެމްޕެއިން އިފުތިތާހުކުރުމަށް އެ ސިޓީގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ. ކުޅުދުއްފުށި ސިޓީއަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަކަން ފާހަގަކުރައްވަމުން މިނިސްޓަރު ވިދާޅުވީ، އެ ސިޓީގެ ރައްޔިތުން އެދޭ ގޮތަށް ބޯހިޔާވަހިކަމުގެ މައްސަލައަށް ޙައްލެއް ހޯދައިދެއްވާނެ ކަމަށެވެ.
ބޯހިޔާވަހިކަމުގެ މައްސަލައަށް ޙައްލެއް ހޯދައިދިނުމުގެ ގޮތުން ކުޅުދުއްފުށި ސިޓީގައި 400 ހައުސިންގ ޔުނިޓް އެޅުމުގެ މަސައްކަތް އެންމެ ލަސްވެގެން ވެސް އަންނަ މާރިޗު މަހު ފެށޭނެކަމުގެ ޔަޤީންކަން މިނިސްޓަރު ދެއްވިއެވެ.
”ރާއްޖޭގެ ޢިއްޒަތްތެރި ރައީސުލްޖުމްހުރިއްޔާއަށް އަދި ދިވެހި ސަރުކާރަށް މިކަމުގައި އެއްވެސް އޮޅުމެއް ނެތް. މި ރަށުގައި ފެށި ހުއްޓިފައިވާ 400 ހައުސިންގ ޔުނިޓް ހުއްޓިފައި އޮތް މައްސަލައަކީ ވަރަށް ބޮޑު މައްސަލައެއް. މިއީ 2022 ވަނަ އަހަރުގެ ޖުލައި މަހު ފެއްޓި މަޝްރޫޢުއެއް. އިއްތިފާގަކުން އޭރު މަޝްރޫޢު ހަވާލުކުރެވުނީ އޭރު އެމްޑީޕީ ސަރުކާރުގެ މަޖިލިސް މެންބަރެއްގެ ކުންފުންޏަކާ،“ — މިނިސްޓަރު މުއްޠަލިބް ވިދާޅުވިއެވެ.
މިނިސްޓަރު ވިދާޅުވީ، 400 ހައުސިންގ ޔުނިޓް މަޝްރޫޢުއަށް އެޑްވާންސްގެ ގޮތުގައި 65 މިލިއަން ރުފިޔާ ދައްކާފައިވާ ކަމަށާއި، އަދި 21 މިލިއަން ރުފިޔާ ޕްރޮޖެކްޓު ހިނގަމުން ދިޔައިރު ދީފައިވީ ނަމަވެސް 18 މަސްދުވަހުގެ ތެރޭގައި ނިމިފައި އޮތީ މަޝްރޫޢުގެ އެންމެ 18 އިންސައްތަ މަސައްކަތް ކަމަށެވެ.
މިނިސްޓަރު ވިދާޅުވީ، އެ ކުންފުންޏާއެކު އަލުން މަސައްކަތް ފެށޭތޯ މަޝްވަރާ ކުރެވުނު ކަމަށާއި ނަމަވެސް އެކަން ކާމިޔާބުވާ ގޮތް ނުވުމުން ކޮންޓްރެކްޓް ބާތިލުކޮށް، މިހާރު އެ މަސައްކަތް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)އަށް ހަވާލުކޮށްފައިވާ ކަމަށެވެ.
މިނިސްޓަރު މުއްޠަލިބް ވިދާޅުވީ، ކުޅުދުއްފުށި ސިޓީއަކީ އުޖާލާ ޢާއިލާއެއް ބިނާކުރުމަށް އެތައް ބަޔަކު ހިޖުރަކޮށްގެން ދިރިއުޅެމުންދާ ސިޓީއެއް ކަމަށާއި، ޞިއްޙީ ފަރުވާ ހޯދުމާއި އިތުރު އެހެން ކަންކަމަށް ވެސް އުތުރުގެ ރައްޔިތުން ބޭނުންކުރަމުންދާ މައި މަރުކަޒު ކަމަށެވެ. ތަރައްޤީގެ މަގުގައި ކުޅުދުއްފުށި ސިޓީ އޮތީ އެހެން ރަށްރަށަށް ވުރެ މާ ކުރީގައި ކަން މިކަމުން ވެސް ހާމަވެގެންދާ ކަމަށް މިނިސްޓަރު ވިދާޅުވިއެވެ.
