ހއ. ދިއްދޫ ބިން ހިއްކުމުގެ މަޝްރޫޢުގެ ދަށުން މިހާތަނަށް 78 ހެކްޓަރުގެ ބިން ހިއްކައި ނިމިފައިވާ ކަމަށް އެ މަސައްކަތް ކުރިއަށްގެންދާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
އެމްއޭސީއެލް އިން ބުނީ، ދިއްދޫ ބިން ހިއްކުމުގެ މަސައްކަތް ތާވަލުކުރެވިފައިވާ ގޮތަށް ކުރިއަށްދާ ކަމަށެވެ. ބިން ހިއްކުމުގެ މަޝްރޫޢުގެ ދަށުން މިހާތަނަށް 78 ހެކްޓަރުގެ ބިން ހިއްކައި ނިމިފައިވާ ކަމަށާއި، އެއީ މި މަޝްރޫޢުގެ 70 އިންސައްތަ މަސައްކަތް ކަމަށް އެ ކުންފުނިން ވަނީ މަޢުލޫމާތު ދީފައެވެ.
މި މަސައްކަތް ކުރިއަށްގެންދަނީ، 46،000 ކިއުބިކް މީޓަރުގެ ކެޕޭސިޓީ ހުރި ޓްރެއިލިން ސަކްޝަން ހޮޕަރ ޑްރެޖަރެއް ކަމަށްވާ ލެއިވް އެރިކްސަން ނަމަކަށް ކިޔާ ޑްރެޖަރެއް ބޭނުންކޮށްގެންނެވެ.
އެމްއޭސީއެލް އިން ދިއްދޫ ބިން ހިއްކުމުގެ މަސައްކަތް ފަށާފައިވަނީ މި އަހަރުގެ ޖެނުއަރީ މަހުގެ ފަސްވަނަ ދުވަހުއެވެ. ދިއްދޫގެ އިތުރުން އެ ކުންފުނިން އަންނަނީ ރާއްޖޭގެ އެކި ސަރަޙައްދުތަކުގައި ބިން ހިއްކުމުގެ މަސައްކަތްތައް ކުރިއަށްގެންދަމުންނެވެ. އެގޮތުން މާލޭ ސަރަޙައްދަށް ބަލައިލާއިރު، ހުޅުމާލޭ ތިންވަނަ ފިޔަވަހީގެ ބިން އެއްކޮށް ހިއްކައި، ގިރާވަރު ފަޅު ހިއްކުމުގެ މަސައްކަތް މިހާރު ވަނީ ފަށައިފައެވެ.
އަތޮޅުތެރޭގެ ރަށްރަށަށް ބަލައިލާއިރު، ތ. ވިލުފުށީ އެއަރޕޯޓު ތަރައްޤީކުރުމަށް ބޭނުންވާ ބިން ހިއްކުމުގެ މަސައްކަތް ވެސް އެ ކުންފުނިން އަންނަނީ ހަލުވި ދުވެއްޔެއްގައި ކުރިއަށްގެންދަމުންނެވެ. މި މަޝްރޫޢުގެ ދަށުން ހިއްކަންޖެހޭ 81 ހެކްޓަރުގެ ތެރެއިން 65 ހެކްޓަރުގެ ބިން މިހާރު ވަނީ ހިއްކައި ނިމިފައެވެ.
