ކުރިއަށްއޮތް ލޯކަލްކައުންސިލް އިންތިޚާބުގެ ކެމްޕޭނު ފެށުމަށް ސަރުކާރު ހިންގާ މައި ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޕީއެންސީގެ ލީޑަރޝިޕްގެ ބޭފުޅުންނާއިއެކު ކެމްޕޭނު ޓީމުތަކުން ރާއްޖޭގެ އެންމެ ބޮޑު 2 ސިޓީ ކަމަށްވާ ކުޅުދުއްފުށި ސިޓީ އާއި އައްޑޫސިޓީއަށް ދަތުރު ފައްޓަވައިފިއެވެ.
މިދަތުރުފުޅު ތަކުގައި އެޕާޓީގެ ކެމްޕޭނު މެނޭޖަރު އަދި ޕާލަމަންޓް ގްރޫޕްގެ ލީޑަރު އިނގުރައިދޫ ދާއިރާގެ މަޖްލިސް މެންބަރު ފަލާހު ބައިވެރިވެ ވަޑައިގަންނަވައެވެ. އެޕާޓީން ބުނީ ކެމްޕޭނު ލޯންޗް ކުރުމަށް ކުޅުދުއްފުށީގައި ބާއްވާ ޖަލްސާ އޮންނާނީ މިރޭ ކަމަށެވެ. އަދި އައްޑޫ ސިޓީގައި ބާއްވާ ޖަލްސާ އޮންނާނީ މާދަމާރޭ ކަމަށް ޕީއެންސީން ވަނީ ބުނެފައެވެ.
މި ޙަރަކާތާއި ގުޅޭ އިތުރު މަޢުލޫމާތު ހޯދުމަށް ”އެކިއެމްވީ“ އިން ސުވާލުކުރުމުން ޕީއެންސީގެ ކެމްޕޭނު ތަރުޖަމާނު ފިރުޒުލް ވިދާޅުވީ ކުޅުދުއްފުށި ސިޓީގެ ޖަލްސާ ފެށުމަށް ހަމަޖެހިފައިވަނީ މިރޭ 20:30 ގައި ކަމަށެވެ. އަދި މިވަގުތު ޕާޓީގެ ލީޑަރޝިޕްގެ ބޭފުޅުން ތިއްބެވީ ކުޅުދުއްފުށި ސިޓީގައި ކަމަށް އޭނާ ވިދާޅުވިއެވެ.
ފިރުޒުލް ވިދާޅުވީ ކެމްޕޭނު މެނޭޖަރުގެ އިތުރުން ޕާލަމަންޓްރީ ގްރޫޕުގެ ބައެއް މެންބަރުންނާއި، ޕީއެންސީ މަޖްލިސް މެންބަރުންގެ އިތުރުން ކެބިނެޓްގެ ބައެއް މިނިސްޓަރުންވެސް މި ޖަލްސާގައި ބައިވެރިވެ ވަޑައިގަންނަވާނެ ކަމަށެވެ.
އިލެކްޝަންސް ކޮމިޝަން ގެ އަދާހަމައިން އެނގޭގޮތުގައި ކުރިއަށް އޮތް ލޯކަލްކައުންސިލްތަކުގެ އިންތިޚާބާއި، އ.ތ.މ ކޮމިޓީގެ އިންތިޚާބުގައި އެންމެ ގިނަ ކެންޑިޑޭޓުން ވާދަކކުރަނީ ޕީއެންސީއިންނެވެ. ޕީއެންސީން ދަނީ ރާއްޖޭގެ އެކި ކަންކޮޅުތަކުގައި އެޕާޓީގެ ކެމްޕޭނު ހަރަކާތްތައް ހިންގަމުންނެވެ. އަދި އެ ޕާޓީން ވަނީ އިންތިޚާބުގެ މެޖޯރިޓީ ސަރުކާރަށް ހޯދޭނެ ކަމުގެ ޔަޤީންކަން ދެއްވާފައެވެ.
