މިއީ މިއަހަރުގެ ރިޔާސީ ބަޔާނުން އެންމެ ފާހަގަކޮށްލެވުނު އެއް ޖުމްލައެވެ. ފަހުގެ ތާރީޚެގައި ރާއްޖޭގެވެރިޔަކު މިހާ ސާބިތުކަމާއެކު، މިފަދަ ބަސްފުޅެއް ވިދާޅުވެފައި ނުވެއެވެ. މިއަހަރުގެ ރިޔާސީ ބަޔާން އިއްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނުގެ ވެރިކަމުގައި ދިވެހި ދަޢުލަތުގެ ހަމަ ހުރިހާކަމެއްވެސް ހިނގާނީ އިސްލާމްދީނުގެ ހަމަތަކާއި، އުސޫލުތަކާއި އެއްގޮތްވާ ގޮތުގެ މަތީންކަމަށެވެ.
”ދަޢުލަތް ހިންގުމުގެ ހުރިހާ ކަމެއްގައި ވެސް މާތް ވެގެންވާ އިސްލާމްދީނުގައި ސާފުކޮށް ބަޔާން ކުރައްވާފައިވާ ހަމަތަކާއި އުސޫލުތަކާ އެއްގޮތަށް ކަންކަން ބައްޓަންކޮށް ތަރައްޤީ ކުރުމަކީ މި ސަރުކާރުގެ ސިޔާސަތު. އެހެނީ މާތް ﷲ ވަނީ މާތް ވެގެންވާ އިސްލާމްދީން އަޅުގަނޑުމެން މުސްލިމުންނަށް ފުރިހަމަ ކޮށްދެއްވާ އަޅުގަނޑުމެން އުޅެން އެކަލާނގެ ރުހިވޮޑިގެންވާ ގޮތް އެދީނުގައި ބަޔާން ކުރައްވާފައި. އަޅުގަނޑުމެންގެ މި ޤައުމަކީ ސައްތައިން ސައްތަ އިސްލާމް ޤައުމެއް. އަޅުގަނޑުމެންގެ ޤައުމުގައި ކަންކަން ބައްޓަން ކުރަންވާނީ މި ފުރިހަމަ ދީނުގައިވާ ގޮތުގެ މަތީން“ ރައީސް ވިދާޅުވިއެވެ.
ރައީސްގެ މި ވިދާޅުވުމުން ދިވެހިރާއްޖޭގެ ރައްޔިތުންގެ ތެރެއިން ގިނަބަޔަކަށް ހަމަ ޔަޤީނުންވެސް ތަސައްލީއެއްލިބިގެން ގޮސްފިއެވެ. ސޯޝަލް މީޑިއާގައި ރައްޔިތުން ފާޅުކުރަމުން ގެންދާ ޝުޢޫރުތަކުން މިކަން ފާހަގަވެއެވެ.
ރިޔާސީބަޔާނުގައި ރައީސް ޑރ. މުޢިއްޒު ވިދާޅުވީ އެމަނިކުފާނު ޤަބޫލުކުރައްވާ ގޮތުގައި ސައްތައިން ސައްތަ އިސްލާމީ ދަޢުލަތެއްގައި މި ފުރިހަމަ ދީނުގައިވާ ގޮތަށް ކަންކަން ހިންގުމަށް ދަޢުލަތުގެ ސިޔާސަތުތައް ބައްޓަންކުރުމަކީ އެ ދަޢުލަތުގެ އެންމެ އިސްވެރިޔާގެ މައްޗަށް ލާޒިމުވެގެންވާ ކަމެއްކަމަށެވެ. އެހެންކަމުން އެމަނިކުފާނުގެ ދައުރުގައި ތަންފީޒު ކުރައްވާނީ އެ ސިޔާސަތުކަމަށާއި، މިކަމާ ދެކޮޅުވާ ފިކުރުތަކުގެ މީހުން ވަކި ގޮތަކަށް ދެކުމަކުން އެމަނިކުފާނުގެ އެއްވެސް ފަރުވާލެއްނެތް ކަމަށް ވިދާޅުވީ އަޑަށްބާއްރުލައްވާ ވަރަށް ގަދަ ޢަޒުމަކާއިއެކުގައެވެ.
”އަޅުގަނޑު ޤަބޫލުކުރާ ގޮތުގައި ސައްތައިން ސައްތަ އިސްލާމީ ދައުލަތެއްގައި މި ފުރިހަމަ ދީނުގައިވާ ގޮތަށް ކަންކަން ހިންގުމަށް ދައުލަތުގެ ސިޔާސަތުތައް ބައްޓަންކުރުމަކީ އެ ދައުލަތުގެ އެންމެ އިސްވެރިޔާގެ މައްޗަށް ލާޒިމުވެގެންވާ ކަމެއް. އެހެންކަމުން، މި ފަޚުރުވެރި ދިވެހި ޖުމްހޫރިއްޔާގެ ރައީސުއްދައުލާ ގެ ޙައިސިއްޔަތުން، މާތް ﷲ ގެ ވާގިފުޅާ މިންވަރުފުޅާއެކު، އަޅުގަނޑު ތަންފީޒުކުރާނީ މި ސިޔާސަތު. އަދި، ދީނާ ސިޔާސަތު ވަކިކުރުމުގެ ފިކުރިއްޔާތުގެ އަހުލުވެރީން އެހެން ގޮތަކަށް މިކަން ދުށުމަކުން އަޅުގަނޑުގެ ކުޑަވެސް ފަރުވާލެއްނެތް“ ރައީސް ޑރ. މުޢިއްޒު ވިދާޅުވިއެވެ.
