ދަޢުލަތުގެ ބެލުމުގެ ދަށުގައި ތިބޭ ކުދިންގެ ތެރެއިން މިހާތަނަށް 110 ކުއްޖަކަށް އާޢިލީ ވެށްޓެއް ހޯދައިދެވިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް ޑރ. މުޢިއްޒު މި މޭރުމުން ވިދާޅުވީ މި އަހަރުގެ ރައްޔިތުންގެ މަޖިލީހުގެ ފުރުތަމަ ދައުރުގެ ފުރުތަމަ ޖަލްސާގައި ރިޔާސީ ބަޔާން އިއްވަވަމުންނެވެ. އެމަނިކުފާނު ވިދާޅުވީ، އެއްވެސް ފަރުދެއް ބާކީ ނުވާނޭހެން ހަމަހަމަކަމާ ޢަދުލުވެރިކަމާއެކު ރައްޔިތުންނަށް ޚިދުމަތްކުރުމުގެ ސިޔާސަތަކީ މި ސަރުކާރުން ހުރިހާ ދާއިރާއަކުންވެސް ޚިދުމަތް ކުރުމުގައި ޤަބޫލުކުރާ ހަމަ ކަމަށެވެ.
މި ސަރުކާރުން އެންމެ ބޮޑު އިސްކަމެއް ދެއްވައިގެން ކުރިއަށް ގެންގޮސްފައިވާ މަސައްކަތަކީ ދަޢުލަތުގެ ބެލުމުގެ ދަށަށް އެކި ސަބަބުތަކާހުރެ ގެނެވޭ ފަރާތްތަކަށް ފޯރުކޮށްދެވޭ ޚިދުމަތުގެ ފެންވަރު ރަނގަޅުކޮށް، އެ ފަރާތްތަކުގެ ޙާލަތު ބަދަލުކުރެވޭނެ ފުރުޞަތުތަކެއް ހޯދައިދިނުންކަން ފާހަގަކުރައްވަމުން ރައީސް ވިދާޅުވީ ދަޢުލަތުގެ ބެލުމުގެ ދަށުގައި ތިބޭ ކުދިންނަށް އާޢިލީ ވެށްޓެއްގެ ފުރުޞަތު ފަހިކޮށްދިނުމަށް ކުރެވުނު މަސައްކަތުން، މިހާތަނަށް 110 ކުދިންނަށް އާޢިލީ ވެށްޓެއް ހޯދައިދެވިފައިވާ ކަމަށެވެ.
މީގެ އިތުރުން އެފަދަ ކުދިން ތިބޭ މަރުކަޒުތަކުގެ ފެންވަރު ރަނގަޅުކޮށް، އެ މަރުކަޒުތަކުގައި ޚިދުމަތްކުރާ ފަރާތްތައް އިތުރަށް ތަމްރީނުކުރުމުގެ ޕްރޮގްރާމެއް މި އަހަރުގެ ތެރޭގައި ފެށިގެންދާނެކަމަށް އެމަނިކުފާނު ވިދާޅުވި އެވެ.
”ނުކުޅެދުންތެރިކަން ހުންނަ ފަރާތްތައް ބާރުވެރިކުރުވައި، އެ ފަރާތްތަކުގެ ހުނަރުތައް ތަރައްޤީކޮށް، މާލީ ތަނަވަސްކަން އިތުރުކުރުމަށް އެކި ފުރުޞަތުތައް ފަހިކޮށްދިނުމުގެ މަޤްސަދުގައި ޤާއިމުކުރާ ”އެމްޕަވާމަންޓް ހަބް“ގެ ޢަމަލީ މަސައްކަތް މި އަހަރު ޖެނުއަރީ މަހު ވަނީ ފަށާފައި. އަދި، ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ފަހިކޮށްދިނުމަށް، ކަމާބެހޭ ތިން ގަވާއިދެއް ނިމިދިޔަ އަހަރު ފާސްކޮށް ގެޒެޓް ކޮށް، ނުކުޅެދުންތެރިކަން ހުންނަ، 356 ފަރާތަކަށް މިހާތަނަށް ވަޒީފާ ދީފިން.“ — ރައީސް ވިދާޅުވި އެވެ.
ސަރުކާރުގެ އަމާޒަކީ، ކުރިޔަށް އޮތް ތިން އަހަރު ދުވަހުގެ ތެރޭގައި ކޮންމެ އަހަރަކު، ނުކުޅެދުންތެރިކަން ހުންނަ 500 ފަރާތަކަށް ވަޒީފާ ހަމަޖައްސައި ދިނުން ކަމުގައި ރިޔާސީ ބަޔާން އިއްވަމުން ރައީސް ވަނީ އިތުރަށް ވިދާޅުވެފަ އެވެ.
