ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ބަޔާން އިއްވަމުން ގެންދެވި ވަޤުތު، ރިޔާސީ ބަޔާނަށް ހުރަސްއެޅުމުގެ ސަބަބުން ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަޞީމް މަޖިލީހުން ބޭރުކޮށްލައިފިއެވެ.
މެންބަރު މީކާއިލް މަޖިލީހުގެ ތަޅުމުން ބޭރުކޮށްލީ، ރިޔާސީ ބަޔާން އިއްވަމުން ރައީސް ގެންދެވި ވަޤުތު، ރިޔާސީ ބަޔާނަށް ހުރަސްއެޅުމުގެ ނިޔަތުގައި މަޖިލީހުގައި އަޑުގަދަކޮށް، ރައީސްގެ އިސްތިޢުފާއަށް ގޮވައި ހެދުމުގެ ސަބަބުންނެވެ. މަޖިލީހުން ބޭރުކޮށްލުމުގެ ކުރިން، މަޖިލީހުގެ ރައީސް ޢަބްދުއްރަޙީމް ޢަބްދުﷲ ވަނީ، އެތަށް ފަހަރެއްގެ މަތިން އެކަން އެގޮތަށް ނުކުރުމަށް ނަޞޭހަތްތެރިވެފައެވެ.
އެހެންނަމަވެސް ރިޔާސީ ބަޔާނަށް ހުރަސްއެޅުމުގެ ސަބަބުން މެންބަރު މީކާއިލުގެ ނަން އިއްވައި މަޖިލީހުން ވަނީ އޭނާ ބޭރުކޮށްލައިފައެވެ. މެންބަރު މީކާއިލުގެ އިތުރުން ހަނިމާދޫ ދާއިރާގެ މެންބަރު އަދި އެމްޑީޕީގެ ޗެއަރޕާސަން ޢަބްދުލްޤަފޫރު މޫސާ ވެސް ވަނީ ރިޔާސީ ބަޔާނަށް ހުރަސްއަޅައިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ބަޔާން އިއްވަމުންގެންދަވާއިރު، އިދިކޮޅު އެމްޑީޕީއަށް ނިސްބަތްވާ މެންބަރުން ގެންދަނީ ރިޔާސީ ބަޔާނަށް ހުރަސްއެޅުމުގެ ގޮތުން ކަށިގަނޑު ފުމެ، އަޑުގަދަކޮށް، ރައީސްގެ އިސްތިޢުފާއަށް ގޮވައި މަޖިލީހުގެ ހަމަޖެހުން ނަގާލުމަށް މަސައްކަތް ކުރަމުންނެވެ.
.
