މި މަހުގެ 11 ވަނަ ދުވަހުގެ ފަހުން މާލެ ސަރަހައްދުގައި މަސްދަޅު ކޭސް ބަހާނީ ހަމައެކަނި މިފްކޯ މާފަންނު ފިހާރައިން ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
މާލޭ ސަރަޙައްދުގައި ރޯދަ ހަދިޔާ ބެހުން މިހާރު ހުރި ލޮކޭޝަންތަކުން ކުރިއަށްދާނީ މި މަހުގެ 11 ގެ ނިޔަލަށް!
އޭގެ ފަހުން ރޯދަ ހަދިޔާ ދޫކުރާނީ މާފަންނުގައި ހުންނަ މިފްކޯ ފިހާރައިން. pic.twitter.com/lWlqZLlV1m— Adam Shareef Umar (@Adamshareefz) February 4, 2026
ވަޒީރު ވިދާޅުވީ، މާލޭ ސަރަހައްދުގައި މިހާރު ރޯދަ ހަދިޔާ ބަހަމުންދާ ސަރަހައްދުތަކުން އެ މަސައްކަތް ކުރިއަށްދާނީ މި މަހުގެ 11 ގެ ނިޔަލަށް ކަމަށެވެ. އަދި އޭގެ ފަހުން ހަދިޔާ ދޫކުރުން އެއް ތަނަކަށް ބަދަލުކުރަން ނިންމާފައިވާކަން ވަޒީރު ވަނީ ހާމަކުރައްވާފައެވެ.
އެގޮތުން މި މަހުގެ 11 ގެ ނިޔަލަށް މާލޭގައި މަސްދަޅު ކޭސް ދޫކުރަމުންދާނީ މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑުންނެވެ. އަދި ހުޅުމާލެ ފޭސް 1 ގައި މަސްދަޅު ކޭސް ބަހަމުން ގެންދަނީ އުމަރު ޒާހިރު ބިލްޑިން، ޕޮލްކޯޓަވަރު އަދި މުހައްމަދު ގާސިމް ޕްރީ ސްކޫލުންނެވެ. ފޭސް 2 ގައި ކާމިލު ދީދީ ސްކޫލް، ހިޔާޓަވަރު 10 އަދި އެމްޕީއެލް ޓަވަރު ޕީ އިން ދޫކުރަމުންދާއިރު، ވިލިމާލޭގައި މި ތަކެތި ބަހަމުންދަނީ ވެމްކޯ ސައިޓުންނެވެ.
އެހެންނަމަވެސް 11ވަނަ ދުވަހުން ފެށިގެން މި ހުރިހާ ސަރަހައްދުތަކުން މަސްދަޅު ކޭސް ދޫކުރުން ނިންމާލާނެ ކަމަށާއި، އޭގެ ފަހުން މަސްދަޅު ކޭސް ދޫކުރާނީ ހަމައެކަނި މިފްކޯ މާފަންނު ފިހާރައިން ކަމަށްވެސް ވަޒީރު އާދަމް ޝަރީފް ވިދާޅުވިއެވެ.
