ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ކުރިއަށް އޮތް 1447 ވަނަ އަހަރުގެ ބަރަކާތްތެރި ރަމަޟާންމަހަށް ކޮންމެ ގޭބިސީއަކަށް ސަރުކާރުން ހަދިޔާކުރާ މަސްދަޅު ކޭސްތަކުގެ ތެރެއިން ގްރޭޓަރ މާލެ ސަރަޙައްދުގެ ގޭބިސީތަކަށް ރޭގެ ނިޔަލަށް 35،132 ކޭސް ދޫކޮށްފިއެވެ.
މާލެ، ވިލިނގިލި އަދި ހުޅުމާލެ ހިމެނޭ ގްރޭޓަރ މާލެ ސަރަޙައްދުގައި ރަޖިސްޓްރީ ކުރެވިފައިވާ 65،230 ޑޮމެސްޓިކް މީޓަރު ހުރިއިރު، ސަރުކާރުން މަސްދަޅު ދޫކުރަމުންދަނީ ކޮންމެ މީޓަރަކީ ގޭބިސީއެއް ކަމަށް ބަލައިގެންނެވެ. މި ތަފާސްހިސާބުތަކަށް ބަލާއިރު
، ރޭގެ ނިޔަލަށް މާލެ ސަރަހައްދުގެ ގޭބިސީތަކުގެ 53.5 އިންސައްތައަށް ވަނީ މަސްދަޅު ކޭސް ހަވާލުކުރެވިފައި ކަމަށް މިނިސްޓްރީއިން ބުނެއެވެ.
މަސްދަޅު ދޫކުރުމުގެ މަސައްކަތް ކުރިއަށްދާއިރު، ރޭ އެންމެ ގިނަ އަދަދަކަށް ކޭސް ދޫކޮށްފައިވަނީ ގަލޮޅު ދަނޑުގައި ގާއިމުކޮށްފައިވާ މަރުކަޒުތަކުންނެވެ. އެ ދަނޑުގައި ގާއިމުކޮށްފައިވާ 4 މަރުކަޒަކުން ރޭ އެކަނިވެސް 500 އަށްވުރެ ގިނަ މަސްދަޅު ކޭސް ދޫކޮށްފައިވާކަން ފާހަގަކުރެވެއެވެ.
މާލެ ސަރަހައްދުގެ އިތުރުން، ރާއްޖޭގެ ހުރިހާ ރަށަކަށް ކަހަލަ ގޮތަކަށް މިހާރު ވަނީ މަސްދަޅު ކޭސްތައް ފޮނުވާފައެވެ. ރަށްރަށުގައި މި ތަކެތި ބެހުމުގެ އިންތިޒާމުތައް ހަމަޖައްސައި، މަސައްކަތް ކުރިއަށް ގެންދާނީ އެ ރަށެއްގެ ކައުންސިލް އިދާރާގެ ބެލުމުގެ ދަށުންނެވެ.
ރޯދަ ހަދިޔާގެ ގޮތުގައި މަސްދަޅު ކޭސް ބެހުމުގެ މި ބިޔަ މަޝްރޫއަކީ ސަރުކާރު ހިއްސާވާ ބައެއް ކުންފުނިތަކާއި ސިޓީތަކާއި އިދާރީދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ
ގުޅިގެންކުރިއަށްގެންދާ މަސައްކަތެކެވެ.
މި މަސައްކަތް ރަސްމީކޮށް ފަށާފައިވަނީ ހުސްވި ޖަނަވަރީ މަހުގެ 24 ވަނަ ދުވަހުގެ ރެއެވެ.
