ކުރިއަށް އޮތް ރަމަޟާން މަހާ ދިމާކޮށް ހުޅުމާލޭގައި ހަދާ ވަޤުތީ ލޯކަލް މާރުކޭޓުގެ ގޮޅިތަކަށް ކުރިމަތިލުމުގެ ފުރުޞަތު ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން މިއަދު ހުޅުވާލައިފިއެވެ.
މިކަމާ ގުޅިގެން އެޗްޑީސީން ކޮށްފައިވާ އިޢުލާނެއްގައި ބުނީ، ހުޅުމާލޭގައި ހަދާ މާރުކޭޓު ގޮޅިތަކަށް ކުރިމަތިލުމަށް ފޯމު ހުށަހެޅުމާއި، ގުރުއަތު ނެގުން އަންނަ ބުރާސްފަތި ދުވަހުގެ މެންދުރު ފަހު 15:30 އާއި ހަމައަށް އޮންނާނެ ކަމަށެވެ. ހުޅުމާލޭގައި ހަދާ ވަޤުތީ ލޯކަލް މާރުކޭޓުން ޖުމްލަ 15 ގޮޅި ދޫކުރުމަށް ހަމަޖެހިފައިވާއިރު، މިއީ މުޅިންވެސް ހިލޭ ދޫކުރާ ގޮޅިތަކެކެވެ.
އެޗްޑީސީން ބުނީ، އެ ގޮޅިތައް ލިބޭނީ އެކަމަށް އެދި ފޯމު ހުށަހަޅާ ފަރާތްތަކުގެ ތެރެއިން، ޝަރުތު ހަމަވާ ފަރާތްތަކުގެ މެދުގައި ނަގާ ގުރުއަތުން ކަމަށެވެ. އެ ފޯމު އެޗްޑީސީގެ ވެބްސައިޓުން ލިބެން ހުންނާނެއެވެ.
ރަމަޟާން މަހާ ދިމާކޮށް ހުޅުމާލޭގައި ހަދާފައިވާ ވަޤުތީ މާރުކޭޓު ހަދާފައިވަނީ، ހުޅުމާލެ ދެވަނަ ފިޔަވަހީގެ ވިނަރެސްގެ އަށްވަނަ ޓަވަރާއި، އެ ސަރަޙައްދުގައި ހުންނަ ވަޤުތީ މިސްކިތާ ދެމެދުގައެވެ.
ފާހަގަކޮށްލަންޖެހޭ ގޮތުގައި މިއީ، ރަމަޟާން މަހަށް ތައްޔާރުވުމަށް އެޗްޑީސީން ކުރަމުން އަންނަ މަސައްކަތްތަކުގެ ތެރެއިން، ހުޅުމާލޭ ދެވަނަ ފިޔަވަހީގައި ދިރިއުޅޭ ފަރާތްތަކަށް ފަސޭހަކަމާއެކު ތަރުކާރީއާއި މޭވާ ފަދަ ކާބޯ ތަކެތީ ބާވަތްތައް ލިބޭނެ އިންތިޒާމު ހަމަޖައްސައި ދިނުމުގެ ގޮތުން ހަދާ ތަނެކެވެ.
