ޢުމްރާ ގްރޫޕްތައް މެދުވެރިކޮށް ރަމަޟާން މަހު ދަތުރުކުރާ ޢުމްރާވެރިންނަށް ފަސޭހަކަމާއެކު ޑޮލަރު ގަނެވޭނެ އިންތިޒާމެއް ބޭންކް އޮފް މޯލްޑިވްސް (ބީއެމްއެލް) އިން ހަމަޖައްސައިފިއެވެ.
ބީއެމްއެލްއިން ބުނެފައިވާ ގޮތުގައި، ޢުމްރާވެރިން ޑޮލަރު ގަތުމުގެ އިންތިޒާމު ހަމަޖެހިފައިވަނީ އަމީނީމަގުގައި ހުންނަ ބީއެމްއެލް ކަސްޓަމަރ ސަރވިސް ސެންޓަރުގެ ގްރައުންޑް ފްލޯއިންނެވެ. އެ ބޭންކުން މި ޚިދުމަތް ދޭނީ މި މަހުގެ އަށްވަނަ ދުވަހުން ފެށިގެން 26 ވަނަ ދުވަހުގެ ނިޔަލަށެވެ. މި ޚިިދުމަތް ދޭނީ ބޭންކު ހުޅުވާފައި ހުންނަ ދުވަސްތަކުގެ ހެނދުނު 09:30 އިން ފެށިގެން މެންދުރު 12:30 އާއި ހަމައަށެވެ.
ޑޮލަރު ވިއްކާނީ ޢުމްރާ ގްރޫޕްތަކުން ހުށަހަޅާފައިވާ ލިސްޓުގައި ހިމެނޭ ފަރާތްތަކަށް އެކަނި ކަމަށާއި، ކޮންމެ ޢުމްރާވެރިއަކަށްވެސް ގިނަވެގެން ވިއްކުމަށް ހަމަޖެހިފައިވަނީ 500 ޑޮލަރު ކަމަށް އެ ބޭންކުން މަޢުލޫމާތުދެއެވެ. ޑޮލަރު ގަންނަން ދާއިރު ޢުމްރާވެރިޔާގެ އައިޑީ ކާޑު ނުވަތަ ޕާސްޕޯޓުގެ އަޞްލު ހުށަހަޅަން ޖެހޭނެއެވެ. ބަދަލުގައި މީހަކު ދާނަމަވެސް އެ މީހެއްގެ އައިޑީ ކާޑުގެ އަޞްލު ގެންދަން ޖެހޭނެ ކަމަށް ބީއެމްއެލް އިން ވަނީ ބުނެފައެވެ.
މި މުޢާމަލާތްތަކަށް ފައިސާ ދެއްކޭނީ ހަމައެކަނި ބީއެމްއެލްގެ ޑެބިޓް ކާޑު ބޭނުން ކޮށްގެންނެވެ. އެ ބޭންކުން ބުނީ ނަގުދު ފައިސާއިން ޑޮލަރު ގަތުމުގެ ފުރުޞަތު ނޯންނާނެ ކަމަށާއި ގްރޫޕްތަކުގައި ނުހިމެނޭ އެހެނިހެން ޢުމްރާވެރިންނަށް ބީއެމްއެލްގެ ޔޫއެސްޑީ ބުކިންގ ޕޯޓަލް މެދުވެރިކޮށް ޑޮލަރު ގަނެވޭނެ ކަމަށެވެ. މިގޮތަށް ބުކިންގ ހަދާ ފަރާތްތަކަށް ޑޮލަރު ދޫކުރާނީ، ވެލާނާ އިންޓަރނޭޝަނަލް އެއާޕޯޓުގެ ޑިޕާޗަރ ހޯލުންނެވެ.
މާލޭ ސަރަޙައްދުގެ ބައެއް ބްރާންޗުތަކުން ޢުމްރާވެރިންނަށް ޑޮލަރު ވިއްކުމުގެ ހިދުމަތް މެދުކަނޑާލާފައިވީ ނނަމަވެސް އަތޮޅުތެރޭގެ ބްރާންޗުތަކުން ޢާންމު އުޞޫލުން މި ޚިދުމަތް ލިބޭނެ ކަމަށް އެ ބޭންކުން ވަނީ ބުނެފައެވެ. ކޮންމެ އަހަރަކުވެސް ޢުމްރާވެރިންނަށް ލުއިފަސޭހަކޮށްދިނުމުގެ ގޮތުން ޑޮލަރު ގަތުމުގެ އިންތިޒާމު އެ ބޭންކުން ހަމަޖައްސައިދޭކަން ފާހަގަކޮށްލެވެއެވެ.
