އިސްލާމިކް މިނިސްޓްރީގެ އިސްލާމިކް ވަޤްފު ފަންޑުން ޚަރަދުކޮށްގެން ޅ. ނައިފަރުގައި ބިނާކުރި ޤުރުއާން ހިތުދަސްކުރާ މަރުކަޒު، ޝައިޚް ނާޒިލް އިންސްޓިޓިއުޓް ރަސްމީކޮށް ހުޅުވައިފިއެވެ.
މިސެންޓަރުގައި 2 ކުލާސްރޫމާއި، ދެކުލާސްރޫމް އެއްކޮލުމުން ބޭނުންކުރެވޭ 100 މީހުންގެ ޖާގައިގެ ހޯލަކާއި، އޮފީހަކާއި އަންހެން އަދި ފިރިހެން ދަރިވަރުންނަށް ވަކިން ފާޚާނާއާއި ވުޟޫކުރާ ތަނާއި، އަތްދޮވެވޭނެ އިންތިޒާމާއި ބޯފެނުގެ އިންތިޒާމުގެ އިތުރުން މުވައްޒަފުން ބޭނުން ކުރުމަށް ސްޓާފްރޫމް އަކާއި ފާޚާނާ ހަމަޖެހިފައިވާކަމަށް މިނިސްޓްރީން ބުނެފައިވެއެވެ.
މިނިސްޓްރީން ބުނީ ވަޤްފު ފަންޑުގެ އެހީއާއި ޢާންމުންގެ ދީލަތި އެހީގައި ބިނާ ކުރެވުނު ކީރިތި ޤުރުއާން ހިތުދަސްކުރުމަށް ޚާއްޞަ ކުރެވިގެން ޅ. ނައިފަރުގައި ބިނާކުރެވުނު ޙިފްޡު ސެންޓަރަށް 302،600.00 ރުފިޔާގެ އެހީއެއް ވަޤްފު ފަންޑުން ދެވިފައިވާކަމަށެވެ.
މިސެންޓަރުގައި ކިޔަވައިދެވޭނީ ތަޢުލީމާ ބެހޭ ވުޒާރާއިން ފާސްކޮށްފައިވާ މުޤައްރަރަށްކަމަށާއި، މިއިންސްޓިޓިއުޓްގެ ކުލާސްތައް ތަރުތީބު ކުރެވިފައިވަނީ ޅައުމުރުގައި ކީރިތި ޤުރުއާނުގެ އަޑާއި މަޚްރަޖު، އަދި ތަޖުވީދާއި ރާގު ފަދަ ފަންނުތައް އުނގެނި، ކީރިތި ޤުރުއާން އެކީގައި ހިތުން ދަސްކޮށްގެން ޙާފިޡުންގެ ގޮތުގައި ދަސްވެނިވުމަށް މުޤައްރަރުގައި ހިމެނިގެން ކަމަށް އިސްލާމިކް މިނިސްޓްރީން ވަނީ ބުނެފައެވެ.
މިސެންޓަރުގައި ކިޔަވާ ދަރިވަރުންގެ %10 (ދިހައެއް އިންސައްތަ) ދަރިވަރުންނަކީ އިސްލާމިކް މިނިސްޓްރީން ދެއްވި އެހީގައި ހިލޭ ކިޔަވާ ދަރިވަރުންކަމަށާއި، މިއީ ރާއްޖޭގައި ޙާފިޡުންގެ އަދަދު އިތުރުކުރުމަށް އެ މިނިސްޓްރީން ކުރަމުންދާ މަސައްކަތުގެ ދަށުން ކުރެވުނު މަސައްކަތެއްކަމަށް އިސްލާމިކް މިނިސްޓްރީން ބުންޏެވެ.
ޝައިޚް ނާޒިލް އިންސްޓިޓިއުޓްއިން މިހާތަނަށް 4 ދަރިވަރުން ޤުރުއާން ޙިފްޡުކޮށްފައިވާއިރު، މިއަހަރުގެ ޖޫން މަހުގެ ތެރޭގައި އިތުރު 3 ދަރިވަރުން ޙިފްޡު ކޮމިޓީއަށް ކިޔަވައިދިނުމަށް ތައްޔާރުވަމުންދާކަމަށާއި، އަދި ޙިފްޡުކުރުމުގެ ފަހު މަރުހަލާގައި 22 ދަރިވަރުން ކިޔަވަމުންދާއިރު، މި އިންސްޓިޓިއުޓްގައި ޖުމްލަ 87 ދަރިވަރުން އަންނަނީ ޙިފްޡު ކުރަމުންކަމަށް އިސްލާމިކް މިނިސްޓްރީން ވަނީ ހާމަކޮށްފައެވެ.
