އިންތިޚާބުތަކުގައި އީފާސް މެދުވެރިކޮށް ކަންކަން ފުރިހަމަކުރާ ގޮތަށް އޮތުމުން، އެކަމާ ގުޅިގެން ޕީޕަލްސް ނޭޝަނަލް ފްރަންޓް (ޕީއެންއެފް) އިން ހައިކޯޓަށް ހުށަހެޅި ދުސްތޫރީ މައްސަލަ އެ ކޯޓުން ބޭރުކޮށްލައިފިއެވެ.
މި މައްސަލަ ހައިކޯޓަށް ހުށަހެޅުއްވީ ޕީއެންއެފްގެ ފަރާތުން އެ ޕާޓީގެ ސެނެޓް މެމްބަރު އަދި ޤާނޫނީ ވަކީލު އާދަމް އާސިފްއެވެ. މި މައްސަލާގައި މައިގަނޑު ގޮތެއްގައި ފާހަގަކޮށްފައިވަނީ އަމިއްލަ ގޮތުން އިންތިޚާބުތަކުގައި ވާދަކުރައްވާ ކެންޑިޑޭޓުންނަށް 50 މީހުންގެ ތާއީދު އޮތްކަން ހާމަކޮށްދިނުމަށް، އީފާސް މެދުވެރިކޮށް ތާއީދު ފޯމު ފުރުމާއި ސޮއިކުރަން ޖެހުމަކީ އިންތިޚާބުތަކާ ބެހޭ އާންމު ގާނޫނާއި ލޯކަލް ކައުންސިލް އިންތިޚާބުގެ ޤާނޫނާ ޚިލާފު ކަމެއް ކަމަށެވެ.
މީގެ އިތުރުން، އިންތިޚާބަށް ކުރިމަތިލުމަށް ބޭނުންވާ ލިޔެކިއުންތައް ހުށަހެޅުމާއި އިދާރީ ފީ ދެއްކުން އީފާސް މެދުވެރިކޮށް ކުރަންޖެހޭ ގޮތަށް އޮތުމަކީވެސް ގާނޫނާ ހިލާފު ކަމެއް ކަމަށް ޕީއެންއެފްގެ ދައުވާގައި ބުނެފައިވެއެވެ. އެ ޕާޓީން ބުނެފައިވަނީ މިކަމުގެ ސަބަބުން އިންތިޚާބަށް ކުރިމަތިލާ ފަރާތްތަކަށް ބޮޑެތި ހުރަސްތަކެއް ކުރިމަތިވާ ކަމަށެވެ.
ނަމަވެސް، ހައިކޯޓުގެ ރެޖިސްޓްރާ ނިންމެވީ އެ މައްސަލަ ކޯޓަށް ބަލައިގަނެވެން ނެތް ކަމަށެވެ. ރެޖިސްޓްރާގެ ނިންމެވުމުގައި ބަޔާންކޮށްފައިވަނީ އިންތިޚާބަށް ކުރިމަތިލުމަށް ބޭނުންވާ ލިޔެކިއުންތަކާއި އިދާރީ ފީ އީފާސް މެދުވެރިކޮށް ދެއްކުމަށް ޝަރުތުކުރުމަކީ ޤާނޫނާ ޚިލާފު ކަމެއް ކަމަށް މައްސަލާގައި ބުނެފައިވީ ނަމަވެސް، އެކަންޤާނޫނާ ޚިލާފުވާ ގޮތް ޤާނޫނީ އުސޫލުތަކުގެ އަލީގައި އެކަށީގެންވާ މިންވަރަށް ބަޔާންކޮށްދީފައި ނުވާ ކަމަށެވެ.
މި ނިންމުމާ ގުޅިގެން ޕީއެންއެފުން ބުނެފައިވަނީ އީފާސް ފަދަ ޑިޖިޓަލް ވަސީލަތްތައް ބޭނުންކުރަން މަޖުބޫރު ކުރުމަކީ އިންތިޚާބީ ހައްގުތަކަށް އުނިކަން އަންނަ ކަމެއް ކަމަށާއި، މިކަމުގައި އިތުރަށް ކުރިއަށްދާނެ ގޮތެއް ނިންމާނެ ކަމަށެވެ.
