މޯލްޑިވްސް ކަރެކްޝަނަލް ސަރވިސްގެ ހުޅުމާލޭ ޖަލުގައި ޙުކުމް ތަންފީޒު ކުރަމުންދިޔަ ގައިދީއަކަށް ހޮސްޕިޓަލުގައި ފަރުވާ ދެމުން އަންނަނިކޮށް މަރުވެއްޖެއެވެ.
ކަރެކްޝަނުން ބުނެފައިވާ ގޮތުގައި ފަރުވާ ދެމުން އަންނަނިކޮށް މަރުވެފައިވަނީ، ސ. ހިތަދޫ، ދިއްގާގަސްދޮށުގެ / ޙަސަން ނިޔާޒް (45އ) އެވެ. އޭނާ މަރުވެފައިވަނީ ކުއްލި މެޑިކަލް އެމަޖެންސީއެއް ދިމާވެ، ހުޅުމާލޭ ހޮސްޕިޓަލަށް އަވަސް ފަރުވާއަށް ގެންގޮސް ފަރުވާދެމުން އަންނަނިކޮށް މިއަދު މެންދުރު ފަހު 14:05 ގައި ކަމަށެވެ. މަޢުލޫމާތު ލިބިފައިވާ ގޮތުގައި އޭނާއަކީ ހުޅުމާލޭ ޖަލުގައި ދިގު ޙުކުމެއް ތަންފީޒު ކުރަމުންދިޔަ ގައިދީއެކެވެ.
ކަރެކްޝަނުން ބުނީ އޭނާ މަރުވުމާ ގުޅިގެން އެކަން އޭނާގެ ޢާއިލާއަށާއި ހިއުމަން ރައިޓްސް ކޮމިޝަން އަދި ނެޝަނަލް އިންޓެގްރިޓީ ކޮމިޝަނަށް މިހާރު އަންގާފައިވާނެ ކަމަށެވެ.
ފާހަގަކޮށްލެވޭ ގޮތުގައި، މިއަދު ހެނދުނު އައިޖީއެމް ހޮސްޕިޓަލުގައި ވެސް ގައިދީއަކު ވަނީ މަރުވެފައެވެ. އެއީ ދަފްތަރު ނރ. 439 / އިބްރާހިމް ސުހެއިލް (53އ) އެވެ. އޭނާ މަރުވެފައިވަނީ ޙާލު ދެރަވުމުން އެ ހޮސްޕިޓަލުގައި އެޑްމިޓްކޮށްގެން ފަރުވާދެމުން ގެންދަނިކޮށް މިއަދު ހެނދުނު 09:05 ގައެވެ. ސުހެއިލްއަށް ހޮސްޕިޓަލުގައި ފަރުވާދެމުން އަންނަތާ ހަފުތާއެއް ވެފައިވާ ކަމަށް ކަރެކްޝަނުން ވަނީ ބުނެފައެވެ.
