ދަރިވަރުންގެ ކިބައިގައި އަޚްލާޤީ ރީތި ސިފަތަކާއި އާދަތައް އަށަގަންނުވައި، ދީނީ ކަންކަމަށް ލޯބިޖެއްސުމުގެ މަޤްޞަދުގައި ތަޢުލީމީ ވުޒާރާއިން އިސްނަގައިގެން ކުރިއަށްގެންދާ ”ބިންގާ“ ޕްރޮގްރާމް ރާއްޖޭގެ ހުރިހާ ސްކޫލްތަކެއްގައި ރަސްމީކޮށް ފަށައިފިއެވެ.
މި ޕްރޮގްރާމަކީ ތަފާތު ތީމްތަކަކަށް ބަހާލައިގެން، މުޅި އަހަރު ދުވަހަށް ދެމިގެންދާގޮތަށް ރޭވިފައިވާ ޚާއްސަ ހަރަކާތެކެވެ. ”ބިންގާ“ ޕްރޮގްރާމްގެ މައިގަނޑު އަމާޒަކީ ސްކޫލްތަކާއި ބެލެނިވެރިން އަދި މުޅި މުޖުތަމަޢުގެ ބައިވެރިވުމާއެކު، ދަރިވަރުންނަކީ އަޚްލާޤީ ގޮތުން ފުރިހަމަ، ނަމޫނާ ބަޔަކަށް ހެދުމެވެ.
މި ޕްރޮގްރާމްގެ މައިގަނޑު މަޤްޞަދަކީ ދަރިވަރުންގެ ދީނީ އަދި އަޚްލާޤީ އަސާސްތައް ވަރުގަދަކޮށް، ހަރުދަނާ އުޞޫލުތަކެއްގެ މަތީގައި ދަރިވަރުން ތަރުބިއްޔަތު ކުރުމެވެ. މިގޮތުން، ފަރުޟު ފަސް ނަމާދަށް ބާރުއެޅުމާއި، އިޙްތިރާމްކުރުމާއި ޒިންމާދާރުވުން ފަދަ މަތިވެރި ސިފަތައް އަށަގެންނެވުމަށްޓަކައި، ކޮންމެ މަހަކުވެސް ވަކި ޚާއްޞަ ތީމްތަކެއްގެ ދަށުން ތަފާތު ހަރަކާތްތައް ކުރިއަށް
ގެންދެވޭނެއެވެ.
ސްކޫލްތަކުގެ އިސްވެރިންގެ ސީދާ ބެއްލެވުމުގެ ދަށުން ހިންގާ މި ޕްރޮގްރާމްގައި، ކޮންމެ މަހަކު ބާއްވާ ޚާއްޞަ އެސެމްބްލީތަކުގެ ޒަރިއްޔާއިން، ކަނޑައެޅޭ މައުޟޫޢުތަކަށް ދަރިވަރުންގެ މެދުގައި މަޝްވަރާކޮށް، ޚިޔާލު ބަދަލުކުރުމުގެ ފުރުޞަތު ފަހިކޮށްދެވޭނެއެވެ. މީގެ އިތުރުން، ދަރިވަރުންގެ ދިރިއުޅުމުގެ އާދަކާދަތަކަށް ހެޔޮ ބަދަލުތަކެއް ގެނައުމަށްޓަކައި މުދައްރިސުންނާއި ބެލެނިވެރިން ގުޅިގެން ގިނަ މަސައްކަތްތަކެއް ކުރުމަށް ވަނީ ރޭވިފައެވެ.
ތަޢުލީމީ ވުޒާރާއިން ހާމަކުރައްވާފައިވާ ގޮތުގައި، މި ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ތަޢުލީމީ ދާއިރާއަށް ދެއްވާ ޚާއްޞަ އަހަންމިއްޔަތުގެ ދަށުން، ދިވެހި ދަރިވަރުންނަކީ އިސްލާމީ އަދަބު އަޚްލާޤުގެ މަތީގައި ތަރުބިއްޔަތުވާ ބަޔަކަށް ހެދުމަށް އެޅުނު މުހިންމު ފިޔަވަޅެކެވެ. މުޅި ރާއްޖޭގައި މި ޕްރޮގްރާމް ފެށުމާއެކު، ސްކޫލްތަކުގެ މާޙައުލުންނާއި ދަރިވަރުންގެ އުޅުމުން މިކަމުގެ ހެޔޮ ނަތީޖާ ފެންނާނެ ކަމަށް އެ ވުޒާރާއިން އުއްމީދު ކުރެއެވެ.
