މާލޭގެ އުތުރު ފަރާތު ބާޒާރުމަތީ ސަރަޙައްދުން ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ބޮޑުބައެއް ނިމި، ތާރުއެޅުމުގެ މަރުޙަލާއަށް ތައްޔާރުވެފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
މި މަޝްރޫޢާ ގުޅޭގޮތުން އެމްޓީސީސީން މަޢުލޫމާތު ދިން ގޮތުގައި، ބޮޑުތަކުރުފާނު މަގު ހެދުމުގެ ދެވަނަ ފިޔަވަހީގެ 82 އިންސައްތަ މަސައްކަތް މިހާރު ވަނީ އެއްކޮށް ނިންމާލެވިފައެވެ. މަސައްކަތްތައް ތާވަލާ އެއްގޮތަށް ބާރުމިނުގައި ކުރިއަށްދާކަން ފާހަގަކުރަމުން އެ ކުންފުނިން ބުނީ، މި ހަފުތާގެ ތެރޭގައި މަގުގައި ތާރުއެޅުމުގެ މަސައްކަތް ފެށޭނެ ކަމަށެވެ.
https://x.com/MTCCPlc/status/2017891287421313329
މި މަޝްރޫޢުގެ ދަށުން ކުރިއަށްދާ މުހިންމު ކަންކަމަށް އަލިއަޅުވާލަމުން އެމްޓީސީސީން ބުނީ، ބިން ހިއްކުމާއި، ޝީޓް ޕައިލް ކުރުމުގެ އިތުރުން ޕެނަލް ހަރުކުރުމުގެ މަސައްކަތްތައް މިހާރު ނިންމާލެވިފައިވާ ކަމަށެވެ. މީގެ އިތުރުން ކޭބަލް ޖަންކްޝަންތަކާއި، ފެނާއި ނަރުދަމާގެ މައި ހޮޅި އެޅުމުގެ ހުރިހާ މަސައްކަތެއްވެސް މިހާރު ވަނީ ނިމިފައެވެ. ބަނދަރުގެ އެއްގަމު ތޮށީގެ ކޮންކްރީޓް މަސައްކަތްތައް މިއަދުގެ ނިޔަލަށް ނިންމާލެވޭނެ ކަމަށްވެސް އެ ކުންފުނިން ލަފާކުރެއެވެ.
މަގުގެ ދުވާރު ހެދުމާއި، ކާނުތަކުގެ މަސައްކަތްތަކުގެ އިތުރުން ފެނާއި ކޭބަލް ޓްރެންޗްތަކުގެ ކޮންކްރީޓް މަސައްކަތްތައްވެސް މިހާރު ބާރު ދުވެލީގައި ކުރިއަށްދާ ކަމަށް އެމްޓީސީސީން މަޢުލޫމާތު ދެއެވެ. އެމްޓީސީސީން ބުނީ، ތާރު އެޅުމުގެ މަސައްކަތަށް މި ހަފްތާގެ ތެރޭގައި ފެށިގެންދާނެ ކަމަށާއި، މުޅި މަޝްރޫޢުގެ މަސައްކަތްތައް ކުރިއަށް އޮތް ރަމަޞާން މަހުގެ ކުރިން ނިންމާލެވޭނެ ކަމަށެވެ.
ބޮޑުތަކުރުފާނު މަގު ހެދުމުގެ މަޝްރޫޢުގެ ދަށުން ލޯކަލް މާރުކޭޓުން ފެށިގެން ނޯތު ހާބަރާ ހަމައަށް 250 މީޓަރުގެ ސަރަޙައްދެއްގައި ތާރު އަޅައިގެން ތަރައްޤީކުރުމަށް ހަމަޖެހިފައިވާއިރު، މި މަސައްކަތް ނިމުމުން މި މަގަކީ ދެކޮޅަށް ދުއްވޭ، ހިނގާ މީހުންނަށް އަމާން އަދި ފެންބޮޑުވުމުގެ މައްސަލައަށް ދާއިމީ ޙައްލެއް ލިބިފައިވާ ޒަމާނީ މަގުތަކަކަށް ވެގެންދާނެއެވެ. މި މަޝްރޫޢު ނިމުމުން މާލޭ އުތުރު ފަރާތު ބަނދަރު ސަރަޙައްދުގެ ތޮއްޖެހުން ކުޑަވެ، މުދާ އުފުލުމާއި ދަތުރުފަތުރު ކުރުމުގައި ޢާންމުންނަށާއި ވިޔަފާރިވެރިންނަށް ބޮޑެތި ފަސޭހަތަކެއް ލިބިގެންދާނެއެވެ.
މުޅި މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1,088 މީޓަރުގެ ސަރަޙައްދެއްގައި ތާރު އަޅައިގެން ޒަމާނީ ފެންވަރަކަށް ތަރައްޤީކުރުމަށް ހަމަޖެހިފައިވާއިރު އޭގެ ތެރެއިން ފުރަތަމަ ފިޔަވަހީގެ 140 މީޓަރުގެ މަސައްކަތް މިހާރު ވަނީ އެއްކޮށް ނިންމާލެވިފައެވެ.
