އިސްލާމީ ޤައުމުތަކުގެ މެދުގައި އޮންނަ އެއްބައިވަންތަކަން އިތުރަށް ވަރުގަދަކުރުމަށް އީރާނުގެ ރައީސް މަސްއޫދު ފެޒެޝިއަން ގޮވާލައްވައިފިއެވެ.
ފެޒެޝިއަން އެކަމަށް ގޮވާލެއްވީ ޤަތަރުގެ އަމީރު ޝައިހް ތަމީމް ބިން ހަމަދު އަލް ސާނީ އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފާ ފޯނުން ގުޅުއްވައި، ސަރަހައްދީ މަސްލަހަތާ ގުޅޭގޮތުން ކުރެއްވި މަޝްވަރާތަކުގައެވެ.
އީރާނުގެ ރިޔާސީ ގަނޑުވަރުން ނެރުނު ބަޔާނެއްގައި ބުނެފައިވަނީ، ސަރަހައްދީ ނުތަނަވަސްކަން ކުޑަކުރުމަށްޓަކައި ޑިޕްލޮމެޓިކް މަސައްކަތްތައް މެދުނުކެނޑި ކުރިއަށް ގެންދިއުމުގެ މުހިންމުކަން ރައީސް ފެޒެޝިއަން ފާހަގަކުރެއްވި ކަމަށެވެ. އަދި މި ދަނޑިވަޅުގައި އިސްލާމީ އުންމަތުގެ އެއްބައިވަންތަކަން ބަދަހިކުރުމަކީ ސަރަހައްދީ ހަމަޖެހުމަށް ކޮންމެހެން ބޭނުންތެރި ކަމެއް ކަމަށްވެސް އޭނާ ވިދާޅުވިއެވެ.
މި މަޝްވަރާތަކުގައި އެމެރިކާއާ ބެހޭގޮތުން ވާހަކަދައްކަވަމުން އީރާނުގެ ރައީސް ވިދާޅުވީ، އެމެރިކާއިން ހަގީގީ ޑިޕްލޮމެސީއަކަށް އެދޭނަމަ، އެ ގައުމުން ހިންގާ ހަމަނުޖެހުމަށް މަގުފަހިވާ އަމަލުތައް ވަގުތުން ހުއްޓާލަންޖެހޭނެ ކަމަށެވެ.
އީރާނުގެ ސިޔާސަތާ ގުޅޭގޮތުން ވާހަކަދައްކަވަމުން ފެޒެޝިއަން އިތުރަށް ވިދާޅުވީ، އީރާނުން އަބަދުވެސް އިސްކަންދެނީ ވާހަކަދައްކައިގެން މައްސަލަތައް ހައްލުކުރުމުގެ މާތް އުސޫލަށް ކަމަށެވެ. ނަމަވެސް، ގައުމުގެ ސަލާމަތާއި ރައްކާތެރިކަމަށްޓަކައި ދިފާއުގައި އަޅަންޖެހޭ ކޮންމެ ފިޔަވަޅެއް އެޅުމަށް އީރާނުން ފަސްނުޖެހޭނެ ކަމުގެ އިންޒާރުވެސް އެމަނިކުފާނު ވަނީ ދެއްވާފައެވެ.
މި ދަނޑިވަޅަކީ އެމެރިކާއިން އިރާނަށް އެކި ކަހަލަ އިންޒާރު ދެމުންދާ ދުވަސްވަރެއް ކަމުން، އިރާނުން ދަނީ އެކަން ކަމަށް ތައްޔާރީ ފިޔަވަޅު އަޅަމުންނެވެ. އެގޮތުން ޑޮނަލްޑް ޓްރަމްޕް ބުނީ އިރާނުން ކުރިއަށް ގެންދާ ޔޫރޭނިއަންގެ މަަސައްކަތް ވަގުތުން ވަގުަތަށް ހުއްޓަލަން ޖެހޭ ކަމަށެވެ. އަދި ދުރު ރާސްތާ މިސައިލް ހެދުން ހުއްޓާލުމަށްވެސް ޓްރަމްޕް ވަނީ ބުނެފައެވެ.
އެއަށް އިންޒާރު ދެއްވަމުން އިރާނުގެ ރޫހާނީ ލީޑަރު ޚާމަނާއީ ވިދާޅުވީ، ޔުރޭނިއަމް އުފައްދަނީ ޤައުމުގެ ހަކަތަ އުފެއްދަން ކަމަށާއި، އެކަން ނުހުއްޓޭނެ ކަމަށެވެ. ހަމައެއާއެކު ޓްރަމްޕް ހީކުރާ ގޮތުގައި އެމެރިކާ އަކީ ސުޕަ ޕަވާއެއް ނޫން ކަމަށާއި، ޙަޤީޤީ ބާރަކީ މަތް ﷲ ކަމުގައި ޚާމަނާއީ ވަނީ ވިދާޅުވެފައެވެ.
ޚާމަނާއީ ވިދާޅުވީ، އެއްވެސް ފަރާތެއް ދެކެ ބިރު ނުގަންނާނެ ކަމަށާއި، ހަމައެކަނި ބިރު ގަންނަ ފަރާތަކީ މާތްﷲ ކަމަށެވެ.
މި ބައްދަލުވުންތަކަކީ މެދުއިރުމަތީގެ މަސްލަހަތު ގޯސްވަމުންދާ ދަނޑިވަޅެއްގައި، ސަރަހައްދީ ބާރުތަކާއެކު ގުޅުން ބަދަހިކުރުމަށް އީރާނުން ފަށާފައިވާ މުހިންމު މަސައްކަތްތަކެއްގެ ބައެކެވެ.
