ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގައި ހިތުގެ ބަލިތަކަށް ޚާއްސަ ސްޕެޝްލިސްޓް ޑޮކްޓަރެއްގެ ޚިދުމަތް ރަސްމީކޮށް ދޭން ފަށައިފިއެވެ. މިއީ މުޅި ހުވަދު އަތޮޅުގެ ތާރީޚުގައިވެސް ހިތުގެ ބަލިތަކަށް ޚާއްސަ ސްޕެޝްލިސްޓް ފަރުވާގެ ޚިދުމަތް ދޭންފެށި ފުރަތަމަ ފަހަރެވެ.
މި ޚިދުމަތް ތައާރަފްކުރުމާ ގުޅިގެން، ހުވަދު އަތޮޅުގެ ރަށްތަކުގައި ދިރިއުޅޭ ރައްޔިތުން ހިތުގެ ބަލިތަކަށް ފަރުވާ ހޯދުމަށް މާލެއަށް ނުވަތަ ރާއްޖެއިން ބޭރަށް ކުރަންޖެހޭ ދަތުރުތަކަށް ބޮޑު ލުޔެއް ލިބިގެންދާނެއެވެ. ޑރ. އަބްދުއްސަމަދު މެމޯރިއަލް ހޮސްޕިޓަލުން ބުނި ގޮތުގައި، މިހާރު ހިތުގެ ބަލިތަކަށް ޚާއްސަ ޑޮކްޓަރަށް ދެއްކުމުގެ އިންތިޒާމު ހަމަޖެހިފައިވާއިރު، މިއީ އެ ސަރަހައްދުގެ ސިއްހީ ޚިދުމަތަށް ލިބުނު ވަރަށް ބޮޑު ކުރިއެރުމެކެވެ.
މިކަމާ ގުޅޭގޮތުން ޑރ. އަބްދުއްސަމަދު މެމޯރިއަލް ހޮސްޕިޓަލުގެ ސީއީއޯ ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް، އެ ހޮސްޕިޓަލް ޓާޝަރީ ފެންވަރަށް ބަދަލުކުރުމަށް ކުރިއަށްގެންދާ މަސައްކަތްތަކުގެ ތެރެއިން ތައާރަފްކުރެވުނު މުހިންމު ޚިދުމަތެއް ކަމަށެވެ. ސަރުކާރުގެ އަމާޒަކީ އަތޮޅުތެރޭގެ ސިއްހީ ނިޒާމު ހަރުދަނާކޮށް، ރައްޔިތުންނާ ގާތުން ސްޕެޝަލިސްޓް ޚިދުމަތްތައް ފޯރުކޮށްދިނުމެވެ.
މީގެ ކުރިން ހުވަދު އަތޮޅުގެ ރައްޔިތުން ހިތުގެ ބަލިތަކުގެ ޗެކަޕްތައް ހެދުމަށާއި ފަރުވާ ހޯދުމަށް އާންމުކޮށް ދާންޖެހެނީ މާލެއަށެވެ. ނަމަވެސް މި އާ ޚިދުމަތާއެކު، ޑރ. އަބްދުއްސަމަދު މެމޯރިއަލް ހޮސްޕިޓަލުގެ ފެންވަރު އިތުރަށް މަތިވެ، ހުވަދު އަތޮޅުގެ ދެބައި (ގއ. އަދި ގދ.) ގެ ރައްޔިތުންނަށް ފަސޭހަކަމާއެކު ތިނަދޫއިން މި ފަރުވާ ލިބޭނެ މަގު މިހާރު ވަނީ ތަނަވަސްވެފައެވެ.
ޑރ އަބްދުއް ސަމަދު ހޮސްޕިޓަލް ސީއީއޯ ވިދާޅުވީ ގޮތުގައި އެ ހޮސްޕިޓަލުން މަސައްކަތް ކުރަމުންދަނީ ކުރިއަށް އޮތް ތަނުގައިވެސް އިތުރު ސްޕެޝަލިސްޓް ޚިދުމަތްތައް ތައާރަފްކޮށް، ރައްޔިތުންނަށް ބޭނުންވާ ސިއްހީ ފަރުވާގެ ފުރުސަތުތައް ފުޅާކުރުމަށެވެ.
